بنه‌ماى ياسايى و پيشخستن كۆمه‌ڵگا
عه‌بدولسه‌تار به‌يره‌قدار/ ياسا بنه‌مايگ ياسايه حوكم ره‌فتار ئنسانى ئه‌كا، ئمجا له‌وه‌ر ئه‌وه‌گ ره‌فتار ئنسانى ها له‌په‌ره‌سه‌ندن هه‌ميشه‌يى، ئه‌وه بنه‌ماى ياساييش بايه‌سه وه‌ل ئه‌و په‌ره‌سه‌ند ئنسانيه په‌ره بسينێد، هه‌ر وه‌و خاتريشه ملله‌ته‌يليش جياوازن له‌ڕوێ په‌ره‌سه‌ندن رووشنهويرى و ته‌كنۆلۆجيه‌و وه گووره‌ى جيوازى چه‌رخ و ماواو له‌وه‌ر ئه‌وه‌يش پيشخستن هه‌ر بنه‌مايگ ياسايى وه‌خواست به‌شدار ئه‌دێ له راسه‌وكردن هزر ياسايى و دوياخريش رووشنهويرى ئه‌را كۆمه‌ڵگا.
تاوانه‌يليگ هه‌ن ده‌ق ديرن له ياساى سزايه‌يل ك وه‌هويچ حاڵه‌تيگ نه‌بايه‌د ده‌رفه‌تيگ ئه‌رايان له‌ئيسه بوينيمنه‌وه‌و كرده‌وه‌ليگيش هه‌ن دوينيمنه‌ى جوور تاوانه له حاڵ حازر، وه‌لى ده‌ق له هويچ ياسايگ نيه سزا له‌بانى بدريه‌ێد، يه‌يش له‌وه‌ختيگ كۆمه‌ڵگامان ناڵنێد وه‌ده‌س كيشه‌يل كۆمه‌ڵايه‌تى جوور فريه‌يى يه‌تيمه‌يل و بيوه‌ژنه‌يل و بيكاره‌يل... هتد، ئه‌ويش وه بوونه‌ى ئه‌و جه‌نگ قه‌يرانه‌يل سياسيه‌و ك روێدا.
هه‌ر وه‌و خاتريشه ئيمه هه‌وه‌جه وه بنه‌مايه‌يل ياسايى ديرێم ك ره‌فتار تاكه‌يل راسه‌و بكا وه‌و جووره ك دادگه‌رى له دوباره دابه‌شكردنه‌وه‌ى سامان و جيوه‌جيكردن يه‌كسانى بخاده ئه‌وله‌وياتى و هه‌ر له‌وه‌ر ئه‌وه‌يش بايه‌سه هه‌ڵه‌په‌ڵه بكريه‌ێد له داناين بنه‌مايه‌يل ياسايى بته‌ويگ وه‌و جووره‌گ چاره‌سه‌ر كيشه‌يل تازه‌كرياێ بكا وه‌شيوه‌يگ رێك وپێك و هويچ كيشه‌يگيش نيه له نه‌فوه‌رگرتن له وجوود بنه‌مايه‌يليگ ياسايى خود كيشه‌گه چاره‌سه‌ر بكا له كۆمه‌ڵگايگ تر.
وه‌لێ خواست ئه‌وه‌سه چه‌ودێرى ئه‌وه بكريه‌ێد ك بنه‌ماى ياسايى تازه گونجياێ بدێ وه‌ل گوزاره‌يل كۆمه‌ڵگا ك وه‌و شيوه ته‌ماشا نه‌كريه‌ێد له ژينگه‌يه ئه‌را جيوه‌جيكردنى له ژينگه‌يگ جياواز، چوينكه داناين بنه‌ماى ياسايى بنه‌مايه‌يل كۆمه‌ڵگا پيچه‌وانه‌وه ئه‌كا و ئه‌دێده هووكار بته‌وكردن متمانه‌ى تاكه‌يل كۆمه‌ڵگا وه دانه‌ره‌يلى وه ئه‌وه‌گ ستوينيگ بنه‌ڕه‌تيه له مقه‌يه‌تيكردن له‌بان نه‌ريته‌يل باڵا ك كۆمه‌ڵگا نه‌وه له‌شوون نه‌وه وه‌رى ئه‌گرێد.
