ئیران فڕۆکەیگ بیفڕۆکەوان ئەمریکی خەێدە خوارەو و دووپات کەێد: هورمز چۊ جاران گلەو نیەخوەێد
شەفەق نیوز - تەهران
عەباس عراقچی، وەزیر دەیشت ئیرانی، رووژ یەکشەممە، وت کە پەیکەر ئەمنی ئەرا بڕیگ لە وڵاتەیل ناوچەگە، کە پشت وە دەسوەردان بیگانە بەسیان، رمیان، وە دانان ئەوە کە بنکە ئەمریکییەیل ئاسایش ئەرا وڵاتەیل ناوچەگە وەدی نەهاوردن، بەڵکم بەشداری کردن لە شیویانی.
عراقچی لە لێدوانەیلیگ ئەرا میدیایەیل راگەیانن ئیرانی وتیش کە سیاسەتە ئیرانییەیل جیگیر میننەو، چ جەنگ دووارە هەڵسێد یا نە، وە دەسنشانکردن ئەوە کە تاکە ری ئەرا وەدیهاوردن ئاشتی و سەقامگیری لە ناوچەگە لە وەیەکەوژیان وڵاتەیلی وە ئاشتی وەدی تیەێد، دۊر لە دەسوەردان بیگانە.
لە قسەیلی وتیش کە ئیران ئامادەس ئەرا هاوکاری وەرد گشت وڵاتەیل ناوچەگە، وەتایبەت وڵاتەیل کەنداو، وە پیشوازیکردن لە هەر گامیگ وەرەو وەدیهاوردن ئاسایش خوەیی و پشت بەسین وڵاتەیل ناوچەگە وە توانایەیل تایبەت خوەیان.
دەسنشان ئەرا ئەوە کرد کە ئەو پرۆسەیلە کە باسیان کرد وە یەکلاییکەر ئەرا هێزە چەکدارە ئیرانییەیل، هەژمارەیل ئەمنی پشت بەسیاگ وە هێزە بیگانەیل شکانن، وە دووپاتکردن ئەوە کە ئاگربەس نیەتۊیەنرێد وەدی باەریەێد مەگەر وە وسانن تەواوەتی ئەرا جەنگ لەبان گشت بەرەیل، وەگەرد هەوەجەی کۆتاییهاوردن وە ململانێیەیل وە شیوەیگ گشتگیر.
عراقچی هوشدار دا لەوە کە رێڕەوەیل رەدبوین لەڕی گەروو هورمزەو چۊ جاران نیەگلەنەو، و وەڕیەوبردن گەرووەگەیش چۊ وەرجە جەنگ نیەوود.
دیاری کرد کە ئەو لایەنەیلە کە دەرک وە ئەنجامەیل رویوەڕویبۊنەیل وەرین کەن تەقەلا نیەن جەنگیگ سەربازی نوو دژ وە ئیران بکەن، وتیش کە تەهران دوینێد دوو تاقیکردن وەرین ئەنجامەیل ئی وژاردە نیشان دانە.
لەی چوارچیوەو، سوپای ئیرانی راگەیان کە وەرگرییە ئاسمانییەیلی فڕۆکەیگ بیفڕۆکەوان لە جۊر "لۆکاس" خستنەسە خوارەو، کە وت سەروە ویلایەتە یەکگرتگەیلە، لە ئاسمان بەندەر عەباس لە باشوور وڵاتەگە.
