زە هیل: پلانەیل گورزوەشانن تەواو بۊنە.. پەلاماردان ئیران چەوڕی فەرمان ترەمپ کەێد
شەفەق نیوز - ئەڵگەردان تایبەت
رۆژنامەی "زە هیل" ئەمریکی ئاشکرا کرد، کە وەزارەت وەرگری ئەمریکی (پێنتاگۆن) پلانەیلیگ سەربازی ئامادە کردگە ئەرا وەشانن گورزەیل نوو دژ وە ئیران، کە شایەت جیوەجی بکریەن دۊای هەڵوژاردنەیل نووەوکردن نیمەیی ئەرا کۆنگرێس لە تشرین دۊەم / نۆڤێمبەر ئایندە، لەناو هەڕەشەیل ئیرانی ئەرا وەڵامدانیگ فراوانتر و تونتر لە رویوەڕویبۊنەیل وەرین، و بەرزەوبۊن رخەیل لە هەڵگیرسان خولیگ نوو لەو جەنگە کە وەردەوامە لە فرەتر لە هەشت مانگەو.
رۆژنامەگە لە زوان سەرچەوەیگ ئاگادار، کە داوا کرد ناسنامەی ئاشکرا نەکریەێد، وت کە فەرماندەیی ناوەندی ئەمریکی (سێنتکۆم) پلانەیلیگ داناگە ئەرا جیوەجیکردن گورزەیل زیاتر دژ وە ئامانجەیل ئیرانی، لە چەوڕی پەسەنکردن کۆشک چەرمگ، لە وەختیگ سەرچەوەیگ ترەک دووپات کرد کە فەرماندەیی سەربازی چەن وژاردەیگ پەلاماری ئامادە کردگە کە خریانەسە نوای پێت هێگسێس وەزیر وەرگری.
سەرچەوەگە رووشنەو کرد کە دۆناڵد ترەمپ سەرۆک ئەمریکی نیاز دیرێد گشت وژاردەگان وە خریایەڕوی بیلێد تا وەخت وەرگردن بڕیار کۆتایی لەباوەت دەسکردن وە پرۆسە سەربازییەیل.
وەپەی رۆژنامەگە، ئەو وژاردەیلە کە خریانەسە روی دوو رێڕەو سەرەکی گرنە خوەیان؛ یەکەم دەسکردن وەئامانجگرتن شوینە سەربازی و سیاسییەیل لەناو خاکەیل ئیرانی، و دۊەم فراوانکردن بازنەی پەلامارەیل تا دامەزراوەیل وزە و ژیرخان مەدەنی بگرێدە خوەی، وەتایبەت لە ئەگەر بەشداریکردن ئیسرائیل لە ئۆپراسیۆنەیل.
هاریسۆن مان وەرپرس وەرین لە ناوەند خوەرئەڵات ناوڕاس و ئەفریقیا سەروە ئاژانس هەواڵگری وەرگری ئەمریکی، وت کە هێزەیل ئەمریکی تا رادەیگ گەورە خوەیان دۊرەو گردنە لە جیوەجیکردن پەلامارەیل لە قۊلایی خاکەیل ئیرانی لە نیسان / ئەپریل گوزەشتەو، و فرەی پرۆسەیلی کوڵەو بۊنەسە لەبان ئامانجەیل کەناراویی.
مان مەزەنە کرد، کە ئی رێبازە پەیوەندیدار بوود وە تەقەلای کەمەوکردن ئاڵۆزییەیل و خوەیدۊرگردن لە خستن فڕۆکە ئەمریکییەیلە وەر رخباری وەخوارخستن، وتیش کە بەشداریکردن ئیسرائیل شایەت ئەگەرەیل وەئامانجگردن دامەزراوەیل وزە و ژیرخان مەدەنی زیای بکەێد، لەبان شیوەی ئەو پرۆسەیلە کە هێزەیل ئیسرائیلی لە ماوەی قۆناغەیل سەرەتایی لە جەنگەگە جیوەجی کردنە.
لە وەڵامداینیگ ئەرا پرسیارەیل رۆژنامەگە، وەرپرسیگ لە پێنتاگۆن دووپات کرد کە ئەرک وەزارەتەگە لە ئامادەکردن بژاردە سەربازییەیل و خستنەڕوییان ئەرا سەرۆک کار کەێد، وە دووپاتکردن لەبان ئەوە کە لێدوان نیەێد لەباوەت پرۆسەیل ئایندە یا سیناریۆیەیل گریمانەیی.
رۆژنامەگە دەسنشان ئەرا ئەوە کرد کە ویلایەتە یەکگرتگەیل فرەتر لە 50 هەزار سەرباز و نزیکەی 20 کەشتی جەنگی لە خوەرئەڵات ناوڕاس هیشتیەسەو، کە بڕیگ لەی کەشتییەیلە بەشداری کەن لە چەسپانن گەمارۆی دەریایی لە ناوچەی دەریای عەرەب.
ناوچەگە دوو بڕ گورزوەشەن ئەرا هەڵگرەیل فڕۆکە ئەمریکییەیل گرێدە خوەی، لە وەختیگ هەڵگر فڕۆکەیل "یو ئێس ئێس تیۆدۆر رۆزڤێڵت" رویکەێدە بازنەی پرۆسەیل فەرماندەیی ناوەندی، وەگەرد ئەگەر ئەوە کە بچوودە شوین هەڵگر فڕۆکەیل "یو ئێس ئێس جۆرج واشنتۆن".
هەرلیوا پێنتاگۆن نزیکەی چوار هەزار لە پیادەی دەریایی و دەریاوانەیل کل کردگە لەبان سێ کەشتی جەنگی، کە کەشتی پەلامار ئاوی زەمینی "یو ئێس ئێس ماکین ئایلەند" لە نویایانە.
و ئی پشتیوانییەیلە وژاردە سەربازییەیل زیاتر دەنە ئیدارەی ئەمریکا، لەناویانیش جیوەجیکردن پرۆسەیل داوەزین ئاوی زەمینی یا فراوانکردن بازنەی پەلامارەیل دژ وە ئامانجەیل ئیرانی.
لەناو ئەو شوینەیلە کە ترەمپ باس ئەگەر وەئامانجگردنیان کرد، دامەزراوەیگ کویەییە کە وە ناو "پیکاکس ماونتێن" ناسریاگە کە کەفێدە نزیک دامەزراوەی نەتەنز ئەتۆمی زەرەدمەن لە شاخەیل زاگرۆس.
