کەرکوک لە سەردەم جبوری.. کورد و تورکمان دویرەوخستنەگە بەشەوکەن
شەفەق نیوز/ لە باوەت دابەشکردن پۆستەیل وەڕیەوبردن پارێزگاگە، کورد و تورکمان لە کەرکوک ساکاڵای دویرەوخستن و وەکنارداین کەن، هەرچەن شایستەی دانیشتوانیە، وتومەتبار پێکهاتە عەرەوەگە کەن، وەزاڵبوین ئاشکرا لەبان دامەزراوەیل جیوەجیکار لە پارێزگاگە، ک دوڵەمەن نەفتە، لەوەختیگ ئەندام عەرەویگ لە ئەنجومەن پارێزگاگە ئاماژە دەێد ک ئاڵشتبویەیل پۆستەگان دویای رویداوەیل ساڵ ٢٠١٧ زیان وەعەرەو لە گشتی فرەتر داگە، چوینکە لەبنەمای بەرژەوەنی کەسایەتی و چینایه‌تیی دانریا.
بەڵکم راکان جبوری پارێزگەر ک لە نەتەوە عەرەوەگەس رەت ئەوە کەرد، ولەڕی ئاژانس شەفەق نیوز داوای بەڵگەنامەیگ کرد ک قسەیلیان بچەسپنێد.
روژ ١٦ تەشرین یەکەم ٢٠١٧ ، هێزەیل ئەمنی عیراقی وەپشتگیری حەشد شەعبی چینە ناو کەرکوک، لەوەخت حکومەتەگەی حەیدەر عبادی سەرۆک وەزیر وەرینو دویای کیشانەوی هێزەیل پێشمەرگە لەلی، ئەو رویداوەیلە بوینە هۆکار ئاڵشتبوینێگ سیاسی و وەڕیەوبەرایەتی گەورایگ لە پارێزگاگە، لەناویان لەکارلاوردن پارێزگەر وەرین.
دەسڵاتەیل عیراق بڕیگ رێوشوێن وەجیهاوردن لە شیوەی سزادان کورد لە کەرکوک وناوچە دابڕیاگان، دویای ریفڕاندۆم سەروەخوەیی لە ٢٠١٧ ، ئەو رێوشوێنەیلە دویرەوخستن کوەردیل لە پۆستەیلیان گردەو، ودەرکردن ئەفسەرەیل وهەواڵە کردنیان ورەو خانەنیشینی، بیجگە دەرکردن فەرمانەیل دەسوەسەر کردن دژ بڕیگ تریان.
دویرەو خستن وەڕیەوبەرەیل کورد
جەمال شەکور ئەندام وەرین ئەنجومەن پارێزگای کەرکوک لە یەکێتی نیشتمانی کوردستان، ئەرا ئاژانس شەفەق نیوز ئوشێد؛ پارێزگاگە دویای رویداوەیل تەشرین یەکەم ٢٠١٧ هەڵمەتیگ وه‌خوه‌ی دی ئەرا دویرەوخستن کورد لە فرەیگ لە پۆستەگان، وەبی تەماشاکردن لە شایستە هەڵبژاردەیلیان و دانیشتوەیلیان و نه‌مان هاوسەنگی له وەڕیەوبردن. وتیش؛ فرەیگ لە وەڕیەوبەرەیل کورد لە پۆستەیلیان دویرەوخریان، ودابەش پۆستەیلیان کردنە بان یەک پێکهاتە، ئەویش پێکهاتەی عەروە، لەبان بەرژەوەنی پێکهاتە کوردەگە تەنانەت تورکمانەگەیش.
شەکور دوینێد ک رێژەی نوێنەریاتی کوردی لە دامەزراوەیل کەرکوک لە ٣٠% رەد نیەکێد، وتەعیین کوردەیل لە ١٥% نەچگە بان، وتیش ک رژیمە وەرینەگە بیبەش کوردەیل کرد لە تەعینەگان کەرکوک، ودارەی نەتەوەگەی خوەی.
ئەندام ئەنجومەن پارێزگاگە لە یەکێتی دووپات کەێد لەبان گرنگی بنەمایل کورد ئەرا پێکەوە ژیاین ناوبەین گشت پێکهاتەیل دویر لە زاڵبوین نەتەوەیی، وململانەیلیگ ك زیان وە یەکێتی کەرکوک وپێکهاتەیلی بیەێد.
تورکمان: جبوری ئۆپراسیۆن ئاڵشت کردن وەڕیەوبەرەیل جیوەجی کەێد
لای خوەییش قاسم حەمزە بەیاتی ئەندام وەرین ئەنجومەن پارێزگای کەرکوک ئەرا ئاژانس شەفەق نیوز باس کرد؛ ک نوێنەرایەتی پێکهاتەی تورکمانی لە دەسڵاتە وەڕیەوبەریەگەی کەرکوک لە ٢٠% رەد نیەکێد، لەوەختیگ نوێنەرایەتی عەرەوی دویای کارەیل ئاڵشتکردن وەڕیەوبەرەیل لە ٣٢% فرەترە، وتومەتبار سەعید جبوری پارێزگەر ئیسە کرد وە جیوەجیکردن ئەو ئۆپراسیۆنە.
بەیاتی ئاماژە دەێد ک چینیگ لە فەرمانگەیلە دریانە عەرەو لەبان بەرژەوەنی کورد، ک تورکمانیش شایستەی دانیشتوانی وسیاسیان وەدەسیان نەکەفت لە وەڕیەوبردن کەرکوک، دویای چەکانن ئەنجومەن پارێزگاگان لە دویا دویای ساڵ وەرین، وداوا کرد ک چارەسەر کەیس هاوسەنگی وەڕیەوبردن لەپارێزگاگە بکریەێد، وەل رەتکردن کەیسەیل ماوەیل وەرین، وکارکردن ئەرا بونیادنان رێکخریاگیگ وەڕیەوبردن هێزداریگ لە کەرکوک، ك شایستەیل گشت پێکهاتەیل دابین بکەێد.
عەرەوەیل کەرکوک: پۆستەگان سوود ئەرامان نەیاشتن
لە لای خوەیەو رەمڵە عوبەیدی ئەندام ئەنجومەن کەرکوک لە پێکهاتە عەرەوەگە وت؛ ئاڵشتکردن بەشیگ لە پۆستەگان دویربوی لە هویچ سوودمەنییگ ئەرا عەرەو، و لە قسەیلی ئەرا ئاژانس شەفەق نیوز دیاری کرد ک پەسەن کردن وەڕیەوبەرەیل وەگورەی بەرژەوەنی کەسایەتی ولایەنی هات.
عوبەیدی دوینێد ک لە ئەنجام ئاڵشت کردن وەڕیەوبەرەیل گونجیاگ نەوی ودویربوی لە تەمایل، وئەنجامەگانی لە گشتی فرەتر زیان وە پێکهاتە عەرەوەگە دا، ودانوستانەگە ناوبەین پێکهاتەیلە دویای رویداوەیل تەشرین یەکەم ٢٠١٧ ئەنجامداین هاوسەنگی وەگورەی رێژەی دانیشتوان وەشیوەیگ پارچەییگ بوی، وتەما وشایستەی هویچ پێکهاتەیگ وەجی نەهاوەرد.
ونێەتواێد قسە بکەێد دەربارەی وەدەسهاوردن پۆستەیلەگە ئەرا عەرەو تەنیا لەبان بەرژەوەنی ئەو پێکهاتەگان، وتیش؛ فرەی وەڕیەبەریە ئالشت بویه‌گان لە دەیشت مەرجەیل کەس گونجیاگ لەشوین گونجیاگ دانریان، وکەسەیل پیشەیی و وەتوانا ئەرامان نەهاورد، مەگەر وەرێژەیل کەمیگ.
وەگورەی چەودێرەیل، ئەو رویداوەیل پارێزگای کەرکوکه دویای ریفڕاندۆم سەروەخوەیی کوردستان له ساڵ ٢٠١٧ ، هیشت ئاڵشتبوین فرەیگ لە گشت دامەزراوەگان ئه‌نجام بدریه‌یه‌د و هیشت ئەنجومەن پارێزگاگە و دەسڵات یاسایی پەکیان بکەفێد، ویەکلایی گرفتەیل ناو پارێزگاگە نەکرد.
لای خوەییش راکان سەعید جبوری پارێزگەر کەرکوک تومەتەیل رەتکرد لە دویرەوخستن کورد و تورکمان، هەنای وت؛ ژمارە خاسترە لە قسە، وهەرکەسیگ تومەت لەبانمان دیرێد با بچەسپنێدەی، ودووپات کرد ک پێکهاتە کوردەگە هیمان زاڵە لەبان فرەیگ لە فەرمانگەیل وه‌تایبه‌ت فه‌رمانگه سیاسیەگان.
وهەمیش ئەرا ئاژانس شەفەق نیوز وت؛ قسە لەباوەت داناین قەومەیل خوەم ونزیکەیلم لە پۆستەگان هویچ بنەمایگ لە راسی نیەرێد، ودەرەیل فەرمانگە ودامەزراوەگان وازن ئەرا رەتکردن تومەتەگان.
