پایسکڵ لە خەیاڵ دافینشی تا عشق فرود کەرکوکی

شەفەق نیوز/ یەکەم پێشبینی ئەرا شیوەی پایسكڵ چوودەو ئەرا لیۆناردو دافینیشی هونەرمەن ئیتالی، لە کۆتایی سەدەی پانزەهم ١٤٩٣ زاینی، بەڵکم هویرکردنەوەگەی گرنگی وەخوەی نەدی لەو مەوقە، و لەهویرەو چگ تا کۆتایی سەدەی هیژدەهم ١٧٩١ زاینی، تا ئەوەنە دی سیڤراک کۆنت فەڕنسا هات، ک بویە خاوەن خاسی لە دروسکردن یەکەمین پایسکڵ وەبی پایدان و دەسگ، وە ئاز پا ریکردیاید، و ناوی نریا وە سیلیریفێر.
لەو مەوقەو چەن دەسکارییگ لە سیستم جوولەکردنی کریا لە لەیان چەن داهێنەریگ لەلیان تریفۆ بوی و داهێنەر ئەڵمانی داریس فۆن سامیر بڕاون، ک لە ساڵ ١٨١٣دەسگ ئەرای دانا ، و داهێنەر ماکمیلان لە وڵات گال ک سیستم جوولەکردنەگە دانا لە ساڵ ١٨٣٩ ، و لە ساڵ ١٨٥٥ ئرنست میشۆ کوڕ بیر میشۆ گەشە وەپی کرد.
لە شار کەرکوک، ناوەند پارێزگا وەنەفت دەوڵەمەنەگە ، فرود ئەحمەد لە ساڵ ١٩٥٥ وەختا تەمەنی ١٤ ساڵ بویە پایسکڵ خاسەوکەێد، و گشت مارکە و چینەگانی زانێد و لەخاسەوکردن گشتی زانێد.
فرود ئەرا ئاژانس شەفەق نیوز ئووشێد: ئی کارە لە سەرتاییەو فێرخوازی بویم لە مناڵیەو، ئەراوە وە گشت ئاسانییگ تویەنم بزانم کام مارکەی پایسکڵ خاسە یا خاس نیە، چوونکە من رەسیمە پلەی عشق وەگەرد ئی کارە.
فرود ئەحمەد هەمیش ئووشێد؛ وەختا پاسكڵیگ لەماڵ بیاشتایمن، خراوی کەم ئیجا وەل خوەمەو بەمەی ئەرا دوکانەگە تا خاسەیەو بکەم، وەختا دەسکردمە پایسکڵ خاسەوکردن ماشین کەمبوی وەگوەرەی کلگەیل دەس، و پایسکڵ گرنگی گەورایگ لە ژیان مه‌ردم داشت.
وتیش: ژینگەگە پاکتر بوی لەو وەختە، وەلی ئیسە وە پێچەوانەوە بویە، ماشینەگان فرەن و پایسکڵ کەمەو بوی، و کەم جار یەکیگ بدوینێد پایسکڵ بڕانێد.
لە سوود پایسکڵ سواری، پەیمانگەی پەروەردەی جەستەیی لە کۆلۆنیا ئووشێد؛ پاسیکڵ سواری یەکیگە لە شیوە گونجیایەگان ئەرا خاسەوکردن کارەیل لەش، و مقەیەتی تەندروسی وە گشتی، ئەگەر ئایەم وەردەوامبوی لەی وەرزشە تەنیا تا ١٠ خولەک لە رووژیگ، و بوودە خاوەن لەش گورجیگ، و وەهێزکردن ماسولکە و جوولەی خوینی و جومگەیل لەش، و هەمیش خاسەوکردن رەوش دڵ ئەگەر رووژانە نیم ساعەت پایسکڵ سواری وەکار هاورد، و ئیجا کەمەوکردن لە کیش لەش.
بایمنەو ئەرا کەرکوک و فرود ئەحمەد پایسکڵ خاسەوکەرەگە و نهێنی وەرخودانەگەی و مەنینی لەی کارە ک نزیکە لەناو بچوود، ئووشێد: من پایسکڵ خاسەوکەم وە نرخیگ کەمتر لە گشت خاسەوکەرەیل، تا کارەگەم و فێرخوازیەگەم ک له‌ مناڵیەو تا ئیسە عاشقی بویمە لەدەسم نەچوود.
دەور یەک بلیۆن پاسکڵ لە ئاست گشت جهان هەس، وەگورەی دوو پایسکڵ وەرانوەر یەک ماشین، و پایسکڵ جوور یەکیگ لە وەسیلەیل سەرەکی ئەرا جوولەکردن دانریەێد لە بڕیگ لە ناوچەگان تا ئی رووژمانە، و وەکارهاوردن خاسیگە ئەرا بازیکردن، ک ناسریاگە وە بازی مناڵەیل، و ئامێر گورجەوکردن لەش، و ریکارەیل سەربازی و پۆلیس، و هەمیش لە پەیام ناردن زوینە وەکار تیەریەێد و لە پێشبڕکی پایسکڵ.