يونسكۆ ئاوهدانكردنهوهى شار موسڵ وه "سه‌خت" تاريف ئه‌كا
شه‌فه‌ق نيوز/ له‌باره‌ى ئاوهدانكردنهوهى شار موسڵ دوياى ئه‌وه‌گ ريكخرياگ تيرۆريستى داعش له‌ناوڕاس له‌ساڵ 2014 روێ له‌لێ كرد و داگيرى كرد و دوياخريش رووژ وه‌ڕووژ وه بوونه‌ى جه‌نگ و بۆردومانه‌و بويه وێرانه، ريكخرياگ يونسكۆ له راپۆرتيگى له زووان وه‌ڕيه‌وبه‌ره‌گه‌ێ ئاوهدانكردنهوهى ئه‌و شاره وه سه‌خت تاريف كرياگه.
له‌ى باوه‌ته‌و، ئۆدرى ئه‌زولاى وه‌ڕيه‌وبه‌ر گشتى ريكخرياگ يونسكۆ ئاشكراى ئه‌وه كردگه ك دوباره ئاوهدانكردنهوهى شار موسڵ عراقى ك ئه‌كه‌فێده باكوور وڵاته‌گه‌ى سه‌خت ئه‌دێ، وه‌تايبه‌ت دوياى كاڵين شماره‌يگ فريه له مين له‌تى.
ئه‌زولاى له‌وه‌خت سه‌ردانه‌گه‌ێ ئه‌را مه‌دريد باس له‌وه كردگه ك ئاوهدانكردنهوهى ئه‌و شاره پرووژه‌يگ پڕ هه‌وه‌جه‌س، وه‌لێ فريه‌يش سه‌خته و ئويشيد: ئيمه زانيمن ئاوهدانكردنهوهى موسڵ هه‌وه‌جه وه وه‌خته‌يل فريه دريژيگ ديرێد.
ئه‌زولاى ئويشێد: پرووژه‌ى ئاوهدانكردنهوهى شار موسڵ هيمان ها سه‌ره‌تاى كاركردنى و ئاماژه وه‌يه‌يش ئه‌كا ك هه‌وه‌جه وه ته‌ياره‌يل بى ته‌ياره‌وان ديرێد ئه‌را مه‌زه‌نه‌كردن زه‌ره‌ده‌يل وه‌بوونه‌ى وجوود مينه‌يل فريه‌يگ له‌تى.
يه‌يش له‌وه‌ختيگه ك ريكخرياگ يونسكۆ له سبته‌مبه‌ر گوزه‌يشت ده‌سپيشخه‌رى ئه‌را گرده‌وكردن دارايى ئاشكرا كرد له‌وه‌ر خاتر ئاوهدانكردنهوهى ئه‌و شاره.
وه‌ڕيه‌وبه‌ر گشتى ريكخرياگ يونسكۆ له‌و باوه‌تيشه‌و وت: ئيمه زياتر وه كه‌ميگ له 100 مليۆن دۆلار ئه‌را ئى ده‌سپيشخه‌ريه گرده‌و كرديمنه‌و ئى بڕه داراييشه گه‌وراس له ئاست يونسكۆ و له هه‌مان وه‌خت ئسراحه‌تى خوه‌يشى ئه‌را گرده‌وكردن ئه‌و بڕه پويله ده‌رخست.
ئمجا له بڕ سه‌د مليۆن دۆلار، نزيكه‌ى 50 مليۆن دۆلار جوور به‌خشين له ده‌وڵه‌ت ئيمارات عه‌ره‌بى يه‌كگرتگه‌و پيشكه‌ش كرياگه.
دى شار موسڵ ئه‌را ماوه‌ى سێ ساڵ له‌ژير ده‌سڵات ريكخرياگ تيرۆريستى مه‌ندو تويش بۆردومان سه‌خت هات و جه‌نگه‌يل سه‌ختيگيش له‌تى ئه‌نجام دريا وه‌رجه ئه‌وه‌گ هيزه‌يل حكومه‌ت عراقى بتويه‌نن بارنه‌وه‌ى له يۆليۆ 2017.
وه‌ل ئه‌وه‌يشا له گاميگ ره‌مزى ئه‌را دوباره ئاوهدانكردنهوهى ئه‌و شار ويران كرياگه، له مانگ ديسه‌مبه‌ر گوزه‌يشت كوچگ بنه‌ڕه‌ت ئه‌را دوباره ئاوهدانكردنهوهى مزگفت گه‌وراى ئه‌لنورى وه مه‌ناره لاره‌گه‌يه‌و دانريا.
