وه وێنه.. گه‌وراترين قه‌ورسان له جه‌هان رووژانه پيشوازى له سه‌د ته‌رم ئه‌كا
ماڵپه‌ڕ "ميدڵ ئيست" وه‌ل قه‌ورهه‌ڵكه‌نه‌يل له قه‌ورسان وادى سه‌لام باسكرد ك مه‌ردم شيعه كوشياگه‌يليان له‌تى وه‌خاك سپارن له‌وانه‌گ له جه‌نگه‌يل فه‌لوجه و شاره‌يل تر كوشيانه.
حامد ئه‌لواد قه‌ورهه‌ڵكه‌ن ئويشێد: وه‌ل زيايبوين شماره‌ى تويشهاتگه‌يل له ئاكام جه‌نگ وه‌خاتر هاوردنه‌وه‌ى شار فه‌لوجه له‌ژير ده‌سڵات ريكخرياگ ترۆريستى داعش، ك ئه‌كه‌فێده دويرى 200كم باشوور نه‌جه‌ف، هه‌ميشه خه‌ريكيم وه وه‌خاكسپاردن كوشياگه‌يل مه‌يدان جه‌نگ.
ئه‌لواد ئويشيد: له نويسينگه‌ى تايبه‌ت خوه‌م رووژانه پيشوازى له 13 تا 14 ته‌رم ئه‌كريه‌ێد، وه‌لێ قه‌ورسانه‌گه وه‌گشتى رووژانه پيشوازى له فيشتر له 100 مردگ ئه‌كا.
ئه‌لواد باوه‌ڕى ئه‌وه‌سه قه‌ورسانه‌گه ك وه‌رجه 1400 ساڵ دامه‌زرياگه شوون فيشتر له 5 مليۆن ته‌رم له‌تى بويه‌سه‌و ك وه دريژى رويوه‌ر 6 كم چوارگووشه‌سه‌و ئيسه‌يش جه‌نگ وه‌رده‌وام ناونى داعش و سوپاى عراقى و هاوپه‌يمانه‌يلى بويه‌سه هووكار به‌رزه‌وبوين شماره‌ى كوشياگه‌يل له گشت وڵاته‌گه.
ئه‌لواد باس له‌وه‌يش ئه‌كا و ئويشێد: ته‌رم ئه‌و جه‌نگاوه‌ره‌يله ك له‌ى دوياخره كوشيانه نه‌ك هه‌ر ته‌نيا له فه‌لوجه‌وه، به‌ڵكوو له سه‌قڵاويه‌و جرف ئه‌لسه‌خه‌ر و رومادييشه‌و ئه‌يه‌ريه‌ن.
وه‌لى حكومه‌ت عراقى شماره‌ى راسكانى ئه‌و كوشياگه‌يل بڵاو ناكا ك كوشيانه له مه‌يدانه‌يل جه‌نگ و هه‌ر وه‌و خاتريشه ئه‌نداميگ له هيزه‌يل ئاسايش ك جيگيرن له ده‌يشت قه‌ورسانه‌گه ئاگادار ئاژانس فرانس پرێس كرد ك فيشتر له 70 چه‌كدار كوشياگ له‌وانه‌گ له فه‌لوجه كوشيانه له 1 حزه‌يران تائيسه له‌ورا وه‌خاك سپاريانه‌و شايه‌ت حكومه‌ت باسيان نه‌كردگه.
وه‌ل ئه‌وه‌يشا جويل وينغ سه‌رنويسه‌ر "ميوسينغ ئه‌ون ئايراك" وت: حكومه‌ت عراقى سياسه‌تيگ فه‌رمى ديرێد ئه‌را بڵاونه‌كردن شماره‌يل راسكانى كوشياگه‌يل وه‌خاتر مقه‌يه‌تيكردن له مه‌عنه‌ويات سه‌ربازه‌يل.
وينغ ئاماژه وه‌يه‌يش كرد و وت: جه‌نگ فه‌لوجه له‌وه‌ختيگه‌و سه‌خته‌و بوى ك سوپاى عراق وه پشتگيرى يه‌كه‌يل حه‌شد شه‌عبى و هاوپه‌يمان ناوده‌وڵه‌تى وه سه‌ركردايه‌تى وڵاته‌يل يه‌كگرتگ دژ ريكخرياگ ترۆريستى داعش ده‌سوه‌پيكرد له په‌لاماره‌يلى ئه‌را بان شار فه‌لوجه و هه‌ر له‌و وه‌ختيشه‌و شماره‌ى كوشياگه‌يل روى له زيايبوين وه‌رده‌وام كرد.
له هه‌مان وه‌خت شوونه‌يل فراوانيگيش پڕ له نيشانه‌و قه‌ور هه‌س له وادى سه‌لام شايه‌تى له‌بان ئه‌و قوبانيه‌يله ئه‌يه‌ن ك شيعه‌ى عراق پيشكه‌شى كردگه وه‌خاتر مقه‌يه‌تيكردن له مه‌زارگه‌و شوونه‌يل ئايينيان.
ئمجا هه‌ر له‌وه‌ر ئه‌وه‌يش ك قه‌رسانه‌گه ئه‌كه‌فێده نزيك مه‌زارگه‌ى ئيمام عه‌لى كوڕ ئه‌بى تاڵب (سڵام خودا له‌لى)، هه‌ر وه‌و خاتريشه موسڵمانه‌يل شيعه مه‌يل ئه‌وه ديرن مردگه‌يليان له په‌ناى ئه‌و كه‌سايه‌تيه وه‌خاك بسپارن.
يه‌كيگ له‌و قه‌ورسانه‌يليشه ك سه‌ردانى فيشتره، ئه‌ويش قه‌ور ئايه‌توڵڵا ئه‌لعوزما محه‌مه‌د سادق ئه‌ه‌لسه‌دره، ك له كه‌مينيگ كوشيا له ساڵ 1999.
هه‌رچه‌نى ك قه‌وسانه‌گه رويوه‌ر فراوانيگيش ديرێد، وه‌لێ وه‌ل ئه‌وه‌يشا پارچه زه‌ويه‌يل نزيك له مه‌زارگه‌ى ئيمام عه‌لى خه‌ريكه نامينێد و گشتى وه‌كار هاورياگه.
نرخ 500 مه‌تر چوارگووشه‌ى زه‌وى له‌و قه‌ورسانه ك له‌ساڵ 1991 ك ره‌سيه نزيكه‌ى 1500 دۆلار، ئيسه ره‌سيه‌سه نزيكه‌ى 10 هه‌زار دۆلار.
ئيسه‌يش وادى سه‌لام له‌وه‌ر حه‌ماسيه‌ت شيعه‌و له‌وه‌ر خوه‌شه‌ويسييان ئه‌را ئيمام عه‌لى مليۆنه‌ها قه‌ور له‌تى دياره‌و وه‌رده‌واميش زياى ئه‌كاو بويه‌سه شوونيگ يادگارييش ئه‌را سه‌دان هه‌زار كه‌س له‌وانه‌گ له ساڵ 2003 وه دوياوه كوشيانه.
يه‌يش بيجگه ئه‌وه‌گ قه‌ورسانه‌گه وه خاسترين و پيرووزترين قه‌وسانه‌يل له‌لاى موسڵمانه‌يل شيعه شماريه‌ێد، وه‌لێ وه‌ل ئه‌وه‌يشا مه‌ردمان فريه‌يگيش ئوميده‌وارن كووتايى وه جه‌نگ وه‌ل داعش باێد و سه‌قامگيرى بكه‌فێده‌و تا كووتايى وه كوشيانيش باريه‌ێد.
