وینە.. گەوراترین زەرەدمەنەیل لە پایتەخت خۆپیشاندانەگان دادکەن
شەفەق نیوز/ وەرجە کەمتر لە مانگیگ لە فراوانترین خۆپیشاندان لە عراق دویای ٢٠٠٣ ، ک حکومەتەگەی عادل عەبدولمەهدی رمان، ئمڕوو مەیدان تەحریر لە ناوەڕاس بەغداد ک ناوەند سەرەکی ناڕەزایەتیەگانە چووڵە لە خۆپیشاندەران، وچادرەیل مانگردنەگان ئەرا دەور ٦٠% کەمەو بوین، ک بەشیگ لە مانگرەگان واز هاوردن لە ناڕەزایی، لەوەر هووکارەیل جوورا جوریگ.
بەڵکم، لەوەختیگ بەشیگ لە ناڕەزاگان رک گردنه لە دووارە کردن فراوانی خۆپیشاندانەگان ک نزیکە لە یەکەم ساڵیادی لە تەشرین یەکەم ئایندە، خاوەن دوکانەگان لە ناوچەی ناڕەزایەتیگان گەوراترین زەرەدمەنن لەوەر بەسانن گشت دەروازەگان، تەنانەت دویای کەمەوبوین ژمارەی خۆپیشاندەرەگان وچادرەیل، بەڵکم هیمان مەیدانەگە و جادەگانی دەوری بەسیانە، و ئەویش هووکار زەرەدیانە.
ناڕەزاگان لە مەیدان تەحریر وەگەرد ئاژانس شەفەق نیوز قسە کردن، ورک گردن ک ئەوەسا وەشیوەیگ کەم کەمیگ تا دوو هەفتە لە ئیسەو ئامادەکەن ئەرا نووەوکردن شۆڕش دوویەم تەشرین، وەگورەی قسەیلیان.
وژمارەیگ لە خاوەن دوکانەگان داوا لە فەرماندەی ئۆپراسیۆنەگان بەغداد کردن جادەی سەعدون بکەنەو وەگەرد چەودیری لە چادرەگان ومقەیەتییان، وتنیش؛ نەبایەد ماوەی بەسانن جادەگە دیژەو بکریەێد.
یەکیگ لەخاوەن دوکانەگان لەڕی ئاژانس شەفەق نیوز پەیامیگ ئاڕاستە کرد ئەرا فەرماندەی ئۆپراسیۆنەگان بەغداد، وت: تو جادەی سەعدون لەڕی ئەبو نوواسەو بڕید، ئایا ئەیە پلانیگ ئەمنیە، یا ئەرا جیوەگیکردن داوای کەسیگە؟ وئایا کارەگە داواکردن خوازێد تا بەڕە کۆنکریتەگان لەنوای دوکانەگەی لاوەین؟.
وتیش؛ ئمڕوو دوکانەیلمان زەرەدمەن بوون وەبی کڕیارن، و بەرژەوەنیمان وژیانمان لەبان ئی کارە وسیاگە، یا کۆنکریتەگان لاوەی لە ئەبو نوواس تا سەعدون تا کڕیارەگە بڕەسێدە پیمان، یا بیلەی وەبەسیاگ وئاشکرا بوود ک خوەی فەرمانیگە لە لایەنەیل باڵا، ودووپاتکرد ک خۆپیشاندەرەگان ریگری نێەکەن لە کردنەوەی جادەگان، ک داواکریاگە جادەگە تەنیا لە ری نەفەق تەحریر چواردەوری بکریەێدەو، هەمیش وت؛ دیارە لایەنەیلیگ سوودمەن هەس لە کار خۆپیشاندانەگان وخوازن وەردەوام بوود، تا رەوشەگە جوور خوەی بمینێد.
خاوەن دوکانیگ تر ئەرا ئاژانس شەفەق نیوز وت: ئیمە فرە زەرەدمەن بویمنە لەوەر بڕین جادەگە لە خەڵانی، و ئەبونەواسیش وەتەواوی بڕیاگە، وئەرا ساڵیگە کارەیلمان وسیانە، وکرای دوکانیش بایەدە بیەیمن.
