كه‌مه‌وبوين خوه‌نيشانده‌ره‌يل له عراق هووكارى چه‌س؟
له‌ى باوه‌ته‌و، چه‌وديره‌يل ئويشن: حكومه‌ت وه دو شيواز وه‌ل خوه‌ينيشانداينه‌يل مامڵه كردگه، شيوازيگ خوه‌ى له ئاشكراكردن پرووژه‌ى خاسسازيه‌يل دوينێد و ئه‌و شيوازه‌گه‌يش ئاسايشيه وه‌خاتر نواگيرى له‌و خوه‌ينيشانداينه‌يله ك يه‌يش جارجاريگ نه‌رم و جارجاريگيش تون وتيژ.
وه‌ل ئه‌وه‌يشا دياره داوه‌زين شماره‌ى خوه‌ينيشانده‌ره‌يل وه شيوه‌يگ وه‌رچه‌و ئه‌چێده‌و ئه‌را ئه‌و دڵته‌نگى گه‌ورا ك كه‌فته‌سه ده‌روين خوه‌ينيشانده‌ره‌يل له ئاكام رى وشوونه‌يل حكومى ك په‌يوه‌سه وه جيوه‌جيكردن داواكاريه‌يليان و له‌وانه‌يش په‌يجوريكرن وه‌ل گه‌ناته‌كاره‌يل له حكومه‌ت وه‌رين.
مه‌ردمانيگ باوه‌ريان ئه‌وه‌سه ك ئى ڕى شوونه‌يل ئاسايشيه جوور به‌سانن ريه‌يل و ناچاركردن خوه‌ينيشانده‌ره‌يل ئه‌را ئه‌وه‌گ ماوه‌ى فريه‌يگ وه‌پا ڕى بكه‌ن تا بڕه‌سنه مه‌يدان ته‌حرير يه‌كيگه له‌و هووكاره‌يله ك كاريگه‌رى ديرێد له‌بان كه‌مه‌وبوين شماره‌ى خوه‌ينيشانده‌ره‌يل.
يه‌يش بيجگه ئه‌وه‌گ ك جارجاريگيش چالاكوانه‌يل ئه‌كه‌فنه وه‌ر گرتن و رفانن و يه‌يش جوور هووكاريگ تر ئه‌ياده هساو له كه‌مه‌وبوين شماره‌يل خوه‌ينيشانده‌ره‌يل له مه‌يدان ته‌حرير له‌ناوڕاس به‌غدا، وه‌تايبه‌ت دوياى كوشتن شماره‌يگ له چالاكوانه‌يل ئه‌و خوه‌ينيشانداينه‌يله له شاره‌يل تر.
ئمجا وه هه‌ر حاڵ كه‌مه‌وبوين شماره‌ى خوه‌ينيشانده‌ره‌يل ماناى دويا جموجويل خوه‌ينشانداين نيه، وه‌تايبه‌ت ئه‌گه‌ر ئى جموجويله له‌بان شيواز سياسى هه‌ڵه‌يگ كار بكاو زه‌ره‌د بڕه‌سنێده چين فراوانيگ له عراقيه‌يل.
ته‌لال زه‌وبه‌عى سه‌رۆك ليژنه‌ى ده‌سپاكى له په‌رله‌مان عراقى ئويشێد: هيزه‌يل ئاسايشى عراقى وه‌ربه‌سه‌يل فريه‌يگ داناگه ئه‌را نواگيرى له هاووڵاتيه‌يل تا به‌شدارى خوه‌ينيشانداينه‌يل نه‌كه‌ن له مه‌يدانه‌يل سه‌ره‌كى له عراق.
زه‌وبه‌عى داوا له حكومه‌ت عراقى كرد پاسه‌وانه‌يل ته‌ماميگ ئه‌را مقه‌يه‌تيكردن له خوه‌ينيشانده‌ره‌يل دابين بكا و كۆنترۆڵ تومه‌تباره‌يل بكا له مه‌سه‌له‌يل گه‌ناته‌كارى و پيشكه‌شيان بكاده دادگا ئه‌را دادگاييكردن.
خوه‌ينيشانداينه‌يل مه‌ردمى وه‌رده‌وام ئه‌را ماوه‌ى نزيكه‌ى دو مانگه له به‌غداو پاريزگايه‌يل تر عراقى رووژه‌يل جومعه ئه‌نجام ئه‌گرێد و هه‌ر وه‌و خاتريشه هان حه‌يده‌ر عبادى سه‌رۆك وه‌زيره‌يل دا ئه‌را بريارداين پرووژه‌ى خاسسازى، وه‌لى خوه‌ينيشانده‌ره‌يل باس له‌وه ئه‌كه‌ن ك ئى پرووژه‌ى خاسسازيه هيمان به‌س نيه‌و هه‌وه‌جه‌ى فيشتر ديرێد.
له هه‌مان وه‌خت خوه‌ينيشانده‌ره‌يل داواى ده‌ركردن فه‌رمان ده‌سگيركردن وه‌رپرسه‌يليگ له ئه‌ميندارێتى به‌غدا و وزاره‌ت كاره‌بايش ئه‌كه‌ن و يه‌يش جوور يه‌كيگ له به‌ر ئازادكردن و خاسسازى تاريف ئه‌كه‌ن.
وه‌ل ئه‌وه‌يشا هيزه‌يل ئاساياشى رى وشوونه‌يل خوه‌يان تونتره‌و كردنه له مه‌يدان ته‌حرير و ناوچه‌يل ده‌ورگردى وه‌خاتر مقه‌يه‌تيكردن له ياساشكانن و له‌وه‌ر ئه‌وه‌يش ده‌سكردنه چه‌سپانن مه‌سه‌له‌ى وشكانن ئه‌و كه‌سه‌يله ك ئه‌چن ئه‌را خوه‌نيشانداين له‌و شوونه.
