عراق بايه‌سه چه بكا له‌شوون روێداگه‌يل ناوچه‌ى سه‌وز؟
سه‌دان كه‌س ك زوورميان له لايه‌نگره‌يل ره‌وت سه‌درى بوين درويكردنه ناوچه‌ى سه‌وز وه‌ره‌و ناو باره‌گايه‌يل حكومه‌ت و ئه‌نجومه‌ن نوێنه‌ره‌يل و باڵوێزخانه‌يل وڵاته‌يل بيگانه‌و له ناونيانيش باڵوێزخانه‌ى ئه‌مريكى و بريتانى و ته‌نانه‌ت چينه ناو نويسێنگه‌ى حه‌يده‌ر عبادى سه‌رۆك وه‌زيره‌يليش.
هيزه‌يل ئاسايشى له‌ى روێداگه بۆمبه‌يل ده‌نگدار و ره‌شاشه‌يل ئاو و بۆميه‌يل ئه‌سرڕشن هاوردنه كار وه‌ل ته‌قه‌كردن وه‌ره‌و ئاسمان وه‌خاتر چويچانن و ده‌ركردن خوه‌ينشانده‌ره‌يل وه‌ره‌و ده‌يشت ناوچه‌ى سه‌وز.
وه گووره‌ى قسه‌ى وه‌رپرسه‌يل ئه‌وه ده‌ركه‌فت ك له‌ى روێداگه‌يله دو خوه‌يشنيشانده‌ر كوشيانه له ئاكام ته‌قه و ده‌يان كه‌سيش زه‌خمدار بوينه‌و له‌ناونيانيش چه‌كداره‌يليگ له هيزه‌يل ئاسايشى له‌وه‌خت ئه‌و تون وتيژيه‌يله.
ئه‌و رى وشوونه‌يله ك هيزه‌يل ئاسايشى گرته‌ى وه‌ر بته‌وتر بوى له‌وه‌گ خوه‌ينيشانده‌ره‌يل گرتنه‌ى وه‌ر له‌وه‌خت وه‌ناوچگن ناوچه‌ى سه‌وز وه‌رجه چه‌ن هه‌فته‌يگ ك له‌يوا كرد هيزه‌يل ئاسايشى بگريه‌نه وه‌ر كوچگ.
خوه‌ينيشانده‌ره‌يل له‌وه‌رده‌م يه‌كيگ له ده‌روازه‌يل سه‌ره‌كى ناوچه‌ى سه‌وز گرده‌و بوين و هيزه‌يل ئاسايشى جارجاريگ ده‌سكردنه وه‌شانن غاز ئه‌سرڕشن و ئاوڕشكردن وه‌ره‌و روى خوه‌ينيشانده‌ره‌يل و يه‌يش له‌يوا كرد زوورميان بچنه ده‌يشت.
ئمجا بڕيگ له خوه‌ينيشانده‌ره‌يل تويڕه تومه‌تبار سياسيه‌يل عراقى وه ئه‌وه كرن ك جوور ريكخرياگ ترۆريستى داعش مامڵه ئه‌كه‌ن ك ده‌سدريژى ئه‌كه‌نه بان مه‌ده‌نيه‌يل له به‌غدا.
هيزه‌يل ئاسايشى جار وه‌رين بيلايه‌نى خوه‌ى نيشاندا هه‌ناى ك خوه‌ينشانده‌ره‌يل چينه ناو ناوچه‌ى سه‌وز و ئه‌را ماوه‌ى چه‌ن سه‌عاتيگ زاڵ بوينه بان باڵه‌خانه‌ى ئه‌نجومه‌ن نوێنه‌ره‌يل عراقى.
دى له‌يوا دياره ك ماوه‌ى وه‌خشين وه‌ل ئى كرده‌وه‌يله ته‌مام بوى، وه‌تايبه‌ت له‌شوون كوشيان بڕيگ له خوه‌ينشانده‌ره‌يل و زه‌خمداربوين بڕيگ تر، ك يه‌يش گوير نيه وه‌ره‌و تون وتيژى فيشتر گام بنه‌ێد له‌ناونى هه‌ردوگلا.
له‌ى باوه‌تيشه‌و، كه‌مبرلى كاغان سه‌رۆك په‌يمانگه‌ى شيه‌وكاريه‌يل جه‌نگ وت: وه‌ناوچگن باڵه‌خانه‌يل حكومى له به‌غدا ئاسايى بوى ئه‌را كۆنترۆڵكردن، وه‌لێ ئاژاوه كاره‌يل تون وتيژى و دزى له‌لى ئه‌كه‌فێده‌وه‌و كۆنترۆڵكردنى زه‌حمه‌ته.
وه‌ل ئه‌وه‌يشا جان كوبس نوێنه‌ر نه‌ته‌وه‌يل يه‌كگرتگ له عراق وت: ئه‌وه‌گ له‌ى دوياخره روێدا ئاماژه‌س ئه‌را ئه‌وه‌گ ئى روێداگه‌يله ريڕه‌ويگ تر ئه‌گرێده وه‌ر و شايه‌ت قوربانى فيشتريش له‌لى بكه‌فێده‌و.
كاغان ئاماژه وه مه‌ترسى گه‌ورايگ ئى كرده‌وه‌يل تون وتيژيه ئه‌كا له‌ناونى لايه‌نگره‌يل سه‌درى و هيزه‌يل ئاسايشى جوور به‌شيگ له كرده‌وه‌يل ركابه‌رى سياسى وه‌ل لايه‌نه‌يل تر.
له هه‌مان وه‌خت موقته‌دا سه‌در باس له‌وه كرد ك ئى خوه‌ينشانداينه‌يله وه‌رده‌وام بدێ و هه‌ڕه‌شه‌ى ئه‌وه‌يش كرد ئى كرده‌وه فيشتره‌و بدێ له حاڵه‌تيگ ئه‌گه‌ر نواگيرى له‌ى خوه‌ينشانداينه بكريه‌ێد.
دياره خوه‌ينشانده‌ره‌يل پشتگيرى مه‌رجه‌ع گه‌وراى شيعه عه‌لى سيستانى گرينگ بوى ئه‌رايان و هه‌ر يه‌يش له‌يوا كرد عبادى ئاشكراى پلان خاسسازى بكا، وه‌لێ دوياى وه‌سه‌رچگن ساڵێگ هيمان هويچ خاسسازيگ نه‌كرياگه بيجگه چه‌ن ئاڵشتكارييگ دياريكرياگ.
وه‌و خاتريشه زه‌يد ئه‌لعه‌لى توێژه‌ر له زانكۆى برستۆن و دانه‌ر كتاويگ له‌بان عراق باوه‌ڕى ئه‌وه‌سه ك تائيسه پيشكه‌فتن خاسيگ ئه‌نجام نه‌درياگه له هويچ بواريگ و بڕياره‌يل گرينگ جيوه‌جى نه‌كريانه و حكومه‌تيش كه‌فته‌سه حاڵه‌ت په‌شيوى و په‌رله‌مانيش وه ته‌مانى له كار كه‌فتگه.
ئه‌لعه‌لى هه‌ميش وت: سه‌دريه‌يل هيز فيشتر دانه‌سه خوه‌ينيشانده‌ره‌يل، وه‌لێ كار له‌بان سياسه‌تكردن جموجويل و هه‌وڵه‌يليان ئه‌كه‌ن.
ئمجا له‌وه‌ختيگه‌و ك خوه‌ينشانده‌ره‌يل چينه‌سه ناو ناوچه‌ى سه‌وز، ئه‌نجومه‌ن نوێنه‌ره‌يل هويچ دانيشتنيگ ساز نه‌كردگه‌و ره‌فتار سه‌دريه‌يل به‌شبه‌شه‌وبوين قويليگ خسته‌سه ناونى خوه‌يان و حزبه‌يل تر سياسى.
