دێرسيم داغ كورد بويچگترين په‌رله‌مانتار توركيا
شه‌فه‌ق نيوز/ دێرسیم داغ، دويه‌ته كورديگ ته‌مه‌ن 22 ساڵان و وه سه‌ركه‌فننی له هه‌ڵوژاردنه‌گه‌ی رۆژ 24/6/2018 توركیا، بويه‌ته بويچگترين په‌رله‌مانتار ئه‌و وڵاته له مێژوو تازه.
دێرسیم كاندید پارت دیموكرات ملله‌ته‌يل "هه‌ده‌په" بوى له شار دیاربه‌كر و بانگه‌شه‌ی ئه‌وه كردياد نوێنه‌رایه‌تی دويه‌ته‌يل و جايه‌ڵ جوانه‌يل ئه‌كا له په‌رله‌مان توركیا.
دێرسیم ساڵ 1996 له یه‌كێگ له شارۆچكه‌يل سه‌ر وه دیاربه‌كر له دايگ و باوگيگ كورد له دایگ بويه‌و یه‌كيگه له 12 مناڵه‌گه‌ی ئه‌و خێزان كورد فه‌قيره ك ئه‌را ژیان پشتیان وه باوگیان به‌سانه. باوگ دێرسیم جفتیاره و دایگیشی ژن ماڵه.
ئه‌و دويه‌ته كورده ئويشێد: ساڵ 1996 له شارۆچكه‌گه‌مان كووچ كرديم، جوور هه‌ر خێزانيگ سیاسی كورد له ناوچه‌گه، ئه‌و وه‌خته ته‌مه‌نم ته‌نيا 5 مانگ بويه هه‌ناى ك خێزانه‌گه‌مان چوينه‌سه كويچه‌يگ مه‌ردمى له ناوچه‌ی ئاسنله‌ر له شار ئه‌ستانبوڵ و له‌ورايش له سفره‌وه ده‌س وه ژیان كرديمنه.
دێرسیم وتگه: وه‌خته‌يل مناڵیيم يڕ له سه‌ختى بويه، هاوڕێ نه‌ياشتم زووان كوردی بزانن، وه‌لێ ژیانم خاستر بوێ دويای ئه‌وه‌گ چه‌ن ساڵيگ چيمه خوه‌ندنگا.
دێرسیم ئه‌زره‌ت و ئوميدێ ئه‌وه بويه بدێده پزيشك ده‌روينى يا رووژنامه‌نويس، وه‌لێ دوياجار تێكه‌ڵ كار سياسى بويه‌و له‌و وه‌خته‌يله ك له قوناغ ئاماده‌يى بويه بڕياره داگه ئه‌ده‌ب و زووان كورده بخوه‌نێد ك له‌مناڵييه‌و له‌لێ بيبه‌ش بويه، له‌وه‌ختيگ ئه‌وه ساده‌ترين ماف ئاده‌ميزاده له سه‌رجه‌م كۆمه‌ڵگايه‌يل كه وه زووان دايگ بخوه‌نێد.
دێرسیم مانگ حوزه‌یران ئمساڵ به‌ش زووان كوردی له زانكۆی مێردین ته‌واو كرد و دوياى چه‌ن هه‌فته‌يگ كه‌میش تويه‌نست يه‌كيگ له كورسيه‌يل په‌رله‌مان توركيا ئه‌را خوه‌ى مسۆگه‌ر بكا.
ئه‌و دويه‌ته كورد كه‌فته‌سه ژير كاریگه‌ری هه‌ده‌په كه خوه‌یان ته‌نيا جوورده‌نگ كورد هساو ناكه‌ن و خوه‌یان وه "نوێنه‌ر سه‌رجه‌م چه‌وسياگه‌يل توركیا" زانن.
له‌و باره‌وه ئويشيد: "ئحساس ئه‌كه‌م له‌ناو هه‌ده‌په له دايگ بويمه، خيزانه‌گه‌م سیاسین، من له ساڵه‌يل نه‌وه‌د له‌دايگ بويمه‌و گه‌وره بويمه، ئه‌ويش ماوه‌ى جيوازكردن و ئاواره‌بوين و سزانن ئاوايه‌يل كورد و ده‌سگيركردن سياسيه‌يل بوێ، ساڵانيگ سه‌خت و پڕ ده‌رده‌سه‌رى بوى ئه‌را خيزانه‌گه‌مان و ملله‌ته‌گه‌مان ك داواى مافه‌يليان له ده‌وڵه‌ت توركيا ئه‌كه‌ن.
دێرسيم ترس نه‌يرێد له‌ناو هه‌ده‌په ك چاره‌نويسى جوور په‌رله‌مانتاره‌يل وه‌رجه خوه‌ى له‌لى باێد ك ئيسه به‌شيگيان هانه زيندان و ئويشيد: له‌هويچ ڕێ وشوون و سزايگ ترس نه‌يرم ك جوور نوێنه‌ريگ كورد روێ وه‌ڕوييم بووده‌وه، گشت ئه‌و كاره‌يله ك ئه‌نجاميان ئه‌يه‌م ئه‌را وه‌ديهاوردن دادپه‌روه‌رى و يه‌كسانيه ئه‌را گشت هاووڵاتيه‌‌يل توركيا.
دێرسيم ئاواته‌خوازه سه‌رجه‌م ئافره‌ته‌يل جه‌هان و وه‌تايبه‌ت رۆژهه‌ڵات ناوين، هه‌وڵ بيه‌ن بڕه‌سنه ناوه‌نده‌يل و بڕيار و سازش له‌بان مافه‌يليان نه‌كه‌ن و نه‌يلن كه‌سيگ تر له‌جێ ئه‌وان و مناڵه‌يليان بڕيار بيه‌ێد.
