داعش ئحساس وه مه‌ترسی شكه‌ست ئه‌كا له موسڵ
محه‌مه‌د ئه‌لتائی ك يه‌كيگه له ده‌مچه‌رمگه‌يل هووز ته‌ی و له هه‌رێم كوردستان نيشته‌جيه دويای ئه‌وه‌گ له موسڵ هه‌يوای، وت: ريكخرياگ داعش ماڵه‌يل ئال حه‌نه‌ش وشكاننه ك سه‌رگه‌ورای هووزه‌يل ته‌يين له عراق له حه‌يولوحده له باشوور خوه‌رهه‌ڵات موسڵ.
ئه‌لتائی ئه‌را(شه‌فه‌ق نيوز)وت: چه‌كداره‌يل داعش ده‌سگير شێخ سه‌فوه‌ك ئه‌لحه‌نه‌ش و محه‌مه‌د و عه‌بدولڕه‌حمان كوڕه‌يلی كردنه‌و دويای ئه‌وه‌يش ده‌سگير هوار ئه‌لحه‌نه‌ش و كه‌هلان غازی ئه‌لحه‌نه‌ش و ئه‌حمه‌د سداع غازی ئه‌لحه‌نه‌ش و سێ برای تر ك پيكهاتنه له سهێب وه‌تبان و سه‌ڵاح وه‌تبان و سه‌باح وه‌تبان ئال حه‌نه‌ش ده‌سگير كردنه‌و بردنه‌سه‌يان وه‌ره‌و شوونيگ ناديار.
ئه‌لتائی ئاماژه وه‌يه‌يش كرد و وت: ده‌سگيركردن ئه‌وانه وه گووره‌ی ده‌سكه‌فتن زانياريه‌يل نادروسيگ بويه له باره‌ی ئه‌وه‌گ گوايا ئه‌و مه‌ردمه بڕيگ جايه‌ڵ جوان له هووزه‌گه دامه‌زراننه ئه‌را دژايه‌تی و جه‌نگ دژ داعش له موسڵ و هه‌ر وه‌و خاتريشه له‌لايه‌ن ئه‌و ريكخرياگ ترۆريستيه‌و ده‌سگير كريانه.
شێخ غازی ئه‌لحه‌نه‌ش مير هووز ته‌ی له عراق له‌ساڵ ٢٠٠٦ له‌لايه‌ن ريكخرياگ ئه‌لقاعيده‌وه ده‌سگير كريا له‌وه‌خت ده‌رچگنی له مزگفتيگ نزيك له ماڵه‌گه‌ی خوه‌ی له حه‌يولوحده له باشوور خوه‌رهه‌ڵات موسڵ.
ئه‌لحه‌نه‌ش خاوه‌ن نفوز فريه‌يگه له‌گشت عراق و دويای ئه‌وه‌يش ئه‌رك شێخ هووزايه‌تی دريا ده‌س سه‌باح ئه‌لحه‌نه‌ش كوڕی ك روی له‌ده‌يشت عراق كرد له‌شوون داگيركردن موسڵ له‌لايه‌ن ريكخرياگ ترۆريستی داعشه‌و.
بيجگه ئه‌وه‌يش سوڵتان هاشم وه‌زير وه‌رين وه‌رگری عراقی له سه‌رده‌م سه‌دام حسێن ك خوه‌ی ته‌سليم وه هيزه‌يل ئه‌مريكی كرد له‌شوون داگيركردن عراق يه‌كيگه سه‌ر وه‌ی هووزه.
سه‌رچه‌وه‌يگ ئاسايشی له سه‌ركردايه‌تی فه‌رمانده‌يی نه‌ينه‌وا وه پله‌ی عه‌قيد ك نه‌تواس ناوی ئاشكرای بدێ ته‌ئكيد له‌بان ئی هه‌واڵه كرد و وت: ريكخرياگ داعش وه‌ل نزيكه‌وبوين ئازادكردن موسڵ هه‌وڵ كوشتن گشت ئه‌و كه‌سه‌يله ئه‌ياد ك مه‌ترسی ديرن له‌بان ريكخرياگه‌گه.
ئه‌و سه‌رچه‌وه له‌باسيگ ئه‌را(شه‌فه‌ق نيوز)وت: وه گووره‌ی زانياری هه‌واڵگری ك كه‌فته‌سه ده‌سمان باس له‌وه ئه‌كا ك شێخ سه‌فوه‌ك ئه‌لحه‌نه‌ش لايه‌نگر داعش بويه‌و زويتريش به‌يعه‌ت ئه‌و ريكخرياگه كردگه له گرته‌يگ ڤيديۆيی.
شێخ سه‌فوه‌ك ئه‌لحه‌نه‌ش ك يه‌كيگه له ده‌مچه‌رمگه‌يل هووزه‌گه له‌و گرته‌ی ڤيديۆييه ده‌رچيه‌و به‌يعه‌ت ئه‌و ريكخرياگ ترۆريستيه كردگه له يه‌كه‌مين ده‌ركه‌فتن وێنه‌گرتن داعش دويای زاڵبوينی له‌بان موسڵ له‌ساڵ ٢٠١٤.
ئه‌لحه‌نه‌ش له‌و وه‌خته له‌و ڤيديۆ وت: هيزه‌يل عراقی مه‌ينه‌تی هاوردنه‌سه بان موسڵ و رينمايی باقی هووزه‌يل تر كرد و وت: وجوود ريكخرياگ داعش له‌وه‌ر ئه‌وه‌سه قورتار موسڵ له‌و زوڵمه بكا ك هاته‌سه تويش مه‌ردمه‌گه.
يه‌كيگ تر له مه‌ردمان نيشته‌جی نزيك له ماڵه‌يل ئال حه‌نه‌ش له حه‌يولوحده له موسڵ ك ناسرياگه وه ئه‌بو عه‌لی وت: ريكخرياگ داعش نزيكه‌ی ٦٢ كه‌س له هووز ته‌ی ده‌سگير كردگه.
ئه‌بو عه‌لی ك ئه‌فسه‌ريگ خانه‌نشينه وه پله‌ی عه‌قيد له باسيگ وه‌ل(شه‌فه‌ق نيوز)له‌ناو شار موسڵ له‌ڕی ئه‌نته‌رنێت وت: دو سه‌ياره له‌وه‌رده‌م ماڵ ده‌مچه‌رمگه‌يل هووزه‌گه وسيانه‌و زوورم جايه‌ڵ جوانه‌يل هووزه‌گه ده‌سگير ئه‌كه‌ن، يه‌يش بيجگه رووڵه‌يل تر هووزه‌گه‌يان له ناوچه‌يل تر جياجيا له موسڵ.
ئه‌بو عه‌لی ئاماژه وه‌يه‌يش كرد ك ريكخرياگ داعش ئه‌گه‌ردێده شوون عه‌بدی ئه‌لحه‌نه‌ش ك ئه‌ويش ئه‌فسه‌ريگ خانه‌نشينه وه‌پله‌ی عه‌قيد و ئه‌گه‌ردێده شوون عه‌بدولسه‌لام شه‌كه‌رچی ك پلان ئه‌را كوده‌تا له‌بان داعش دانانه له موسڵ.
هه‌ر له‌ی باوه‌ته‌و، ئه‌بو عه‌لی هه‌ميش وت: هه‌ڵمه‌ت ريكخرياگ داعش دريژه داشت له مه‌سه‌له‌ی گه‌ردين له‌شوون كه‌سه‌يل تر ك بڕيگ له‌ليان ئه‌فسه‌ره‌يل وه‌رينن له ده‌زگای هه‌واڵگری و سه‌ر وه حزب به‌عسن و باوه‌ڕی ئه‌وه‌سه ك خه‌ريك كوده‌تان دژی.
