ته‌قينه‌وه‌ی قه‌يران سياسی تازه‌يگ له عراق
ئه‌و جياوازی و ناكووكيه له‌باره‌ی گه‌ناته‌كاری هه‌ڕه‌شه‌يگه وه‌رجه هاوردنه‌وه‌ی شار موسڵ و چالاكی حكومه‌ت وسانگه ئه‌را ماوه‌ی چه‌نه‌ها مانگه، يه‌يش بيجگی شوونه‌وار گرژی ناونی خوه‌ينيشانده‌ره‌يل و هيزه‌يل ئاسايشی له به‌غدايش له وه‌خته‌يليگ زويتر له ئمساڵ.
سه‌ليم جبوری سه‌رۆك په‌رله‌مان عراقی ئه‌و تومه‌ته‌يله خسته دروو ك خريا پاڵی له دانيشتن په‌رله‌مانی به‌سياگيگ له‌لايه‌ن خالد عوبێدی وه‌زير وه‌رگری عراقی ك له‌شوون ئه‌وه له‌بان لاپه‌ڕه‌ی فه‌رمی فه‌يسبوكيش ئاشكرای كرد وه ئه‌وه‌گ به‌ڵگه ديرێد له‌باره‌ی ريككه‌فتنه‌يل سه‌ندن چه‌ك و ته‌قه‌مه‌نی.
عوبێدی له‌يرا به‌ڵگه له‌بان ئه‌و بڵاوركرياگ ئه‌لكترۆنيه نه‌ياو له نامه‌يگ جياجيا باس له‌وه‌يش كرد ك بڕێگ له نوێنه‌ره‌يليش تومه‌تبارن له تاوانه‌يل هاوشيوه.
له‌ی باوه‌ته‌و عوبێدی تومه‌تبار جبوری و موسه‌نا سامه‌ڕائی راوێژكاری كرد وه ده‌سداشتن له مه‌سه‌له‌ی گه‌ناته‌كاری ك په‌يوه‌سه وه ريككه‌فتن چه‌ك و مساومه‌كردن، يه‌يش له دانيشتنيگ ژير وه‌ژير ك تايبه‌ت كريا ئه‌را ميوانداريكردن وه‌زير وه‌رگری عراقی له ئه‌نجومه‌ن نوێنه‌ره‌يل له باره‌ی دوسيه‌يل گه‌ناته‌كاری.
وه‌زير وه‌رگری عراقی له‌و ميوانداريه له‌وه‌رده‌م په‌رله‌مانتاره‌يل باس له چوينێتی ئه‌و كرده‌وه‌يل سياسيه كرد جبوری مه‌شقی كردگه وه‌خاتر ريكخستن ئه‌و ريككه‌فتن چه‌ك و سه‌ندن سه‌ياره‌يل ئه‌را كه‌سه‌يل زيك له خوه‌ی وه‌خاتر وه‌رگرتن پويل له‌بان هساو خوين عراقيه‌يل ك بڕ ٢ مليار دۆلار بويه.
عوبێدی جه‌خت له‌وه‌يش كرد ك شماره‌يگيش له ئه‌ندامه‌يل تر له فراكسيۆنه‌يل جياجيا له نموونه‌ی محه‌مه‌د كه‌ربولی له‌بان فراكسيۆن ئه‌لحه‌ل و عاليه نسه‌يف له‌بان ئئتلاف ده‌وڵه‌ت ياساو كه‌سه‌يل تر ك فشار خستنه‌سه بانی وه‌خاتر ده‌سكه‌فتن به‌رژه‌وه‌ندی و ريككه‌فتنه‌يل چه‌ك و دامه‌زرانن مه‌ردم و له هه‌مان وه‌خت تومه‌تبار بڕيگ له بازرگانه‌يليش كرد.
له‌لايه‌ن خوه‌ييشه‌و جبوری فه‌رمانيگ ده‌ركرد وه دامه‌زرانن ليژنه‌يگ تايبه‌ت ئه‌را په‌يجوری له‌و ناوه‌يله ك ياد كريان له‌و دانيشتنه، هه‌ر خود جبوری بڕيار خوه‌يكيشانه‌وه‌يش دا له‌و دانيشتنه ئه‌نجومه‌نه.
جبوری باس له‌وه كرد ك په‌يجووری واز ئه‌كريه‌ێد له‌و ناوه‌يله ك له‌لايه‌ن وه‌زير وه‌رگری عراقيه‌و تومه‌تبار كريان و په‌يوه‌سه وه مساومه‌كردن له‌بان ريككه‌فتن مه‌سه‌له‌ی پڕچه‌ككردن سپای عراقی.
له هه‌مان وه‌خت عوبێدی ئاماده‌گی خوه‌يشی ده‌رخست ئه‌را ئه‌وه‌گ بچێده وه‌رده‌م ليژنه‌ی ده‌سپاكی له‌وه‌ر ده‌رخستن گه‌ناته‌كاری له‌ناو وزاره‌ته‌گه‌و جه‌خت له‌وه‌يش كرد ك مساومه له‌بان هيزه‌يل ملله‌ت ناكاو پرس وپرسكاری وه‌ل هه‌ر كه‌سيگ ئه‌كا ك هه‌وڵ رفوكردن ئه‌و ريككه‌فتنه‌يل بكا ك له‌هه‌ر پله‌و پايه‌يگ يا ده‌سڵاتيگ بدێ.
هه‌ر له‌ی باوه‌ييشه‌و، ليژنه‌ی ده‌سسپاكييش ئاشكرای دامه‌زرانن ليژنه‌يگ په‌يجووری وه‌ل ئه‌و ناوه‌يله دا ك له‌لايه‌ن وه‌زير وه‌رگری عراقيه‌و تومه‌تبار كريان له‌باره‌ی گه‌ناته‌كاری و ريككه‌فتن چه‌كداری و كاره‌يل تر گه‌ناته‌كاری.
جبوری له كۆنگره‌يگ رووژنامه‌نويشی ته‌له‌فزيۆنی له دويای ئه‌و دانيشتنه، ئه‌و روێداگه وه گه‌مه‌بازی و مه‌هزه‌له‌ت تاريف كرد.
نوری مالكی سه‌رۆك وه‌رين وه‌زيره‌يل ك ناچار بوی ده‌س له‌كار بكيشێده‌و له ئاكام داگيركردن موسڵ له‌لايه‌ن ريكخرياگ ترۆريستی داعش، له‌و وه‌خته‌يله كاروبار وه‌زير وه‌رگری گرته ده‌س و ريكخرياگ داعش نزيكه‌ی سێكوتی خاك عراق داگير كرد وه‌رجه دوساڵ، وه‌لێ دوياخر له چه‌ن شوونيگ ده‌ركريا له‌بان ده‌س هيزه‌يل چه‌كدار شيعه‌و سوپا.
ئيسه‌يش عبادی ئه‌را ماوه‌ی فيشتر له دو ساڵه هه‌وڵ له‌ناوبردن گه‌ناته‌كاری ئه‌ياد له عراق ك له پله‌ی ١٦١ هاتگه له ئاماره‌يل ريكخرياگ ناوده‌وڵه‌تی شه‌فافيه‌ت ئه‌را گه‌ناته‌كاری ك ١٦٨ ده‌وڵه‌ت گرته‌سه خوه‌ی، وه‌لێ تويش دژايه‌تی هاتگه له‌لايه‌ن زوورم كه‌رته‌يل نوخبه‌ی سياسی.
عوبێدی له ديمانه‌يگ ته‌له‌فزيۆنی باس له‌وه كرد ك ميوانداريكردنی ئه‌را وه‌رده‌م په‌رله‌مان ته‌نيا پيلانيگ بويه له‌لايه‌ن گه‌ناته‌كاره‌يل له‌وه‌ر ئه‌وه‌گ دژ ئه‌و گه‌ناته‌كاری و گه‌ناته‌كاره‌يله وسياگه‌و باس له‌وه‌يش كرد ك له‌وه‌خت وه‌رگرتن پۆسته‌گه‌ی تائيسه هه‌وڵ كه‌مه‌وكردن گه‌ناته‌كاری داگه له ريككه‌فتنه‌يل و دارده‌ی سه‌ربازه‌يل بنديواری ك ئه‌ندامن له سوپاو وجوود نه‌يرن له‌ڕاسی و مووچه‌يش وه‌رئه‌گرن.
