بەغداد ناوەین دوو جیهان.. لات و دەوڵەمەن هەرکەس شوین خواردن خوەی دیرێد.. وینە

شەفەق نیوز/ چەن مدوویگ هیلێد بەشیگ لە مەردم روی وەرەو چێشتخانە ئاست بەرزەیل بکەن، لە وەختیگ بڕیگ ترەک لەلای کوشکیگ یا عەرەوانەیگ لەبان جادە تاقە خوەراکیگ خوەن، وەلێ وەگشتی پویل گیرفان خوەی ئەو جیاوازیە لە تام و کەلتور ناوەین عراقیەیل دروس کەێد.

 سەرمەد رازی هاوڵاتییگ تەمەن 45 ساڵە ئویشێد: تەنیا ئەرا چێشتخانە بەغدادیە ئاست بەرزەیل چوود کە چاشیاس هەر دەرفەتیگ بوود وەگەرد خیزانەگەی سەردانیان بکەن.

  رازی لە قسەیلی ئەرا ئاژانس شەفەق نیوز دووپات کەێد کە کەشوهەوای ساحیرانە هەس لەناو بەشیگ لە چێشتخانەیل، کە مۆسیقای نەرم و فچەفچ ناوەین میوانەیل، وەگەرد ئەو خوەراک خاسە کی کاپتنەیل وە شیوەیگ شارستانی پیشکەشی کەن، وتیش: ئیجویر کەشوهەوایگ و ئەو چین خوەراکەیل خاسە لەلای چێشتخانە میللیە سادەیل و پڕ لە قاڵ و قیڕە وەدەس نیەکەفێد.

باس ئەو جیاوازی گەورە ناوەین چێشتخانەیل لەلای نرخەیل کەێد، کە ئەو خواردنە کە ئەرا یەی کەس پیشکەش کەن، کە ئەرا نموونە برنج و مامرە، لە 15 هەزار دینار زیاتر نییە، وەلێ لەناو چێشتخانە ئاست بەرزەیل لە 50 هەزار دینار زیتترە، بیجگە پویل چای و خزمەتەگەی، کە وەیجویرە تاقە خوەراکیگ ئەرا دوو کەس تەنیا لە 100 هەزار دینار رەدکەێد، و فرە کەس توانا نەیرن ئی پویلە وەرانوەر یەی تاقە خوەراکیگ بیەن.

لەی باوەتە، خانمە ئەندازیار وەسەن تاهر دووپات کرد کە خواردن لەناو چێشتخانە ناودیارەیل لە بەغداد خوەێد، کە کوالیتی بەرز و خواردن خاس دیرن، وتیش قەت لە چێشتخانەیل میللی نەخواردیە، چوینکە دڵنیا لە پاکی خوەراکیان نییە.

 وەسەن لە قسەیلی ئەرا ئاژانس شەفەق نیوز ئویشێدیش؛ لە مانگ رەمەزان خوەشی تیەێد لەماڵ دەمەو بکەێد، لەناو گردەوبوین خیزانەگە، وەلێ جاروبار وە وەختەگەو بڕ نیەکەێد تا خوەراک دەمەوکرن دروس بکەێد، کە خوەی و خیزانەگەی ئەرا چێشتخانەیل بوفێه واز چن تا هەرکەسیگ وەگورەی دڵ خوەی خواردن بوەێد، دووپات کرد کە جیاوازی ناوەین تام و کەلتور و رەفتار و داب ونەریتی ناوەین مەردم جیاوازی لە پەسەنکردن شوین و خوەراک و ئەو رەفتارەیل نشان دەن.  

وەرانوەر ئەوە، عەباس عەبد عەلی تەمەن 58 ساڵە (خاوەن چێشتخانەی میللی) ئویشێد: مەوقەی دەمەوکردن واز کەێد تا خواردن پیشکەش بکەێد، کە ئەرا دەمەوکردن شۆربا و خورما و دوو وەگەردی نەێد، و فرەی بسینەیلی لە خاوەن داهات سنووردارن، و هۆڵیگ ئەرا خیزانەیلیش هەس.

عەبد عەلی لە قسەیلی ئەرا ئاژانس شەفەق نیوز ئویشێدیش: نرخ تاقە خوەراک دەمەوکرن وەگورەی داواس، وەلێ وەگشتی لە 20 هەزار دینار ئەرا یەی نەفەر زیاتر نییە،  و نرخە نزمەیل لەی چێشتخانەیل میللیە ری وە مەردم فرەیگ دەێد تا چشتیگ وە نرخیگ بخوەن کە زوور وەبان گیرفانیان نارێد.

 بیجگە داری و نەداری، کەسەیلیگ هەر خوەشیان لە خواردن کەلتووری تیەێد زیاتر لە خواردنەوە مودێرن، کە حەسەن عەلی هاوڵاتییگ تەمەن 45 ساڵە ئویشێد: ئەو خواردنە کە چێشتخانەیل میللی پیشکەشی کەن لە برنج و مامر و چشتەیلیگ ترەک لەلای منەو فرە خاسترە لە هن چێشتخانە ئاست بەرزەیل.

لە وەختیگ تەنیا یەک یا دوو قاو خریاسە وەردەم میوان چیشتخانە بەرزەیل، لە چێشتخانەیل میللی پڕە لە جویراجویر خوەراک، کە ئەو نشانە، پسپۆڕ زانست دەرەین ئاکادیمیایی کەریم جابری باسی کەێد کە نشان نەوس و هەرسناکی بەشیگ ئەرا خوەراک دەێد، جاروبار رەسێدە ئەوە کە شانازی وە کارە بکەن. 

 جابری لە قسەیلی ئەرا ئاژانس شەفەق ئویشێد: دویر لە چڵیسی، هەواداری ئەرا چگن وەو شوینەیلە هەس، و لایەن دەروینی رۆڵیگ لەو پەسەنکردنە رانێد، کە هاتێ پویل فرەیگ هەڵگردیە، وەلێ خوەشی تیەێد لە شوینیگ ئەرزان بخوەێد.

لە کۆتایی قسەیلی وتیش: ئەو چیشتخانەیل میللیە کە خواردن وە ئەرزان دەێد، لەڕوی نویسەر و هونەرمەن و شاعرەیل دەرفەت ئەرا چشت و سیمایەیلیگ واز کەێد، قا گووشگردن لە باسیگ، کە دویای ئەوە بوونە کار هونەری.