ئاشكراكردن"سه‌ندووق سيه"ى داعش
2016-11-15T20:40:00+00:00
شه‌فه‌ق نيوز/ په‌يامنێر رووژنامه‌نويس سه‌ر وه ريكخرياگ ترۆريستى داعش ئاشكراى هه‌ڵويستيگ له زه‌مه‌ت دادگاى عراقى كرد له‌بان ميكانيزم كار له‌ناو ئاژانس هه‌واڵگه‌رى ئه‌عماق و باس له سه‌رچه‌وه‌يل زانياريه‌يليان كرد ك له‌لايه‌ن وه‌رپرسه‌يل كه‌رته‌يل سه‌ربازيه‌و ئه‌دريه‌ێدو يه‌يش خسته‌ڕوى و نمايش چالاكيه‌يل له ئاژانسه‌گه زويتر دقه‌ت له‌لى ئه‌كريه‌ێد له‌لايه‌ن ليژنه‌ى دقه‌تكردن ده‌قه‌يل له‌ڕوى رووژنامه‌گه‌رى و زووانگه‌ريه‌و، يه‌يش بيجگه جه‌ختكردن له بڕيگ روێداگ وه‌رجه نمايشكردنى له‌بان راى گشتى.
ئه‌و په‌يامنێره ك ناسرياگه وه "ئه‌بو ساڵح" باس له‌وه كرد ك مه‌كينه‌ى رهسانن ريكخرياگ داعش حاڵ حازر ته‌ركيز له‌بان نمايش ياساشكنى ئاسايشى كردگه له به‌غداو جارجاريگ پشت وه گه‌وراكردن و سه‌خته‌وكردن په‌لاماره‌يل ئه‌وه‌سێد و له هه‌مان وه‌خت وێنه‌يل نائاشكرا له‌ناو پايته‌خت ئه‌يه‌رێده كار جوور وێنه‌گرتن دار و دره‌خت و باخ و بووسانه‌يل وه مه‌هانه‌ى ئه‌وه‌گ تا مه‌ردم بويشن وجوود له‌تى ديرێد.
ئه‌بو ساڵح له باسيگ له‌لايه‌ن ناوه‌ند رهسانن ده‌سڵات دادوه‌رى ئه‌را(شه‌فه‌ق نيوز)وت: سه‌رچه‌وه‌ى په‌يامنێره‌يل مه‌كينه‌يل رهسانن ريكخرياگ داعش له‌زانيارى له‌لايه‌ن وه‌رپرسه‌يل كه‌رته‌يل سه‌ربازيه‌و ئه‌دريه‌ێد و وت: ئه‌وان له مه‌يدانه‌و هه‌واڵه‌يل تازه وه‌پيمان ئه‌يه‌ن جوور ئاكام په‌لاماره‌يل دژ هيزه‌يل ئاسايشى و مه‌ده‌نيه‌يل له ناوچه‌يل و بازاڕه‌يل.
ئه‌بو ساڵح وت: هه‌ر په‌يامنێريگ ئه‌تويه‌نێد مامڵه وه‌ل سڵاداره‌يل بكا ئه‌را وه‌رگرتن زانيارى يا وێنه‌و ئاشكراى يه‌يش كرد و وت: كه‌رته‌گه‌ى ئيمه مامڵه وه‌ل سێ كه‌س ئه‌كا ئه‌را وه‌رگرتن زانيارى له‌ليان.
دوياى ئه‌وه‌يش ئه‌بو ساڵح وت: په‌يامنێر له‌لايه‌ن خوه‌يه‌و هه‌واڵه‌گه جيواز ئه‌كا ئه‌را وه‌رپرس رهسانن كه‌رته‌گه يا ده‌سميه‌تده‌ره‌گه‌ى و ئه‌ويش هه‌واڵ له چه‌ن په‌يامنێريگ له‌ناو كه‌رته‌گه‌ى وه‌رئه‌گرێد ك هه‌ر يه‌كيگ له‌ليان تايبه‌ته وه ناوچه‌يگ دياريكرياگ.
ئه‌بو ساڵح ئويشێد: هه‌واڵه‌گه له‌لايه‌ن وه‌رپرس ره‌ساننه‌و ره‌وانه‌ى لايه‌نه‌يل رهسانن ناوه‌ندى ئه‌كريه‌ێد تا وه‌كارى بارن و بڵاويه‌و بكه‌ن.
په‌يامنێره‌گه‌ى داعش باس له‌وه‌يش كرد ك بڵاوكردنه‌وه‌ى هه‌واڵ له‌ڕى ده‌روازه‌يل رهسانن تايبه‌ت وه ريكخريايه‌گه ئه‌نجام ئه‌گرێد و له‌وانه‌يش ئاژانس خه‌به‌رى ئه‌عماق و جه‌خت له‌وه‌يش كرد ك گرته‌يل ڤيديۆييش وه ته‌مامى ره‌وانه ئه‌كريه‌ێد و دوياخر ئه‌چێده بوار مونتاج و بڕين له‌لايه‌ن شاره‌زايه‌يل ته‌كنيكى وه‌گووره‌ى به‌رنامه‌يل پيشكه‌فتگ.
ئه‌پامنێره‌گه وت: به‌ياننامه‌يل مه‌يدانى شايه‌ت دو رووژ يا سێ رووژ دويا بخريه‌ێد، وه‌لێ هه‌واڵه‌يل تر له هه‌مان رووژ بڵاو ئه‌كريه‌ێد وه‌گووره‌ى هيز و كاريگه‌رى له جاده و يه‌يش مينێده بان كه‌فائه‌ى په‌يامنێر له جيوازكردنى.
ئه‌بو ساڵح يه‌يش ده‌رخست ك ئاژانس ئه‌عماق له‌ى ماوه‌ى دوياخره دقه‌ت له‌بان روێداگه‌يل به‌غدا كردگه وه‌ل دقه‌تكردن له‌بان سه‌ركه‌فتنه‌يلى له شوونه‌يل تر.
له‌باره‌ى ره‌ساننه‌و، ئه‌بو ساڵح وت: شيوازيگ تر ريكخرياگ داعش ك پشت وه‌پى ئه‌وه‌سێد، ئه‌ويش ئه‌وه‌سه ك كاميراى پيشكه‌فتگ ديرێد و ئمساڵ وه‌پى ره‌سيه ئه‌را ئه‌نجامداين بڕيگ له ئه‌ركه‌يلى.
ئه‌بو ساڵح باس كرد ك ئه‌رك ئه‌و كاميرايه‌يل پيشكه‌فتگه ئه‌وه‌سه وێنه‌ى باخه‌يل داره‌خورما و ميوه‌جات له به‌غداى پايته‌خت وه‌پى ئه‌گريه‌ێد، يه‌يش وه‌شيوه‌ى راپۆرت له‌باره‌ى به‌رهه‌مه‌يل له ولايه‌ت به‌غدا وه‌كارى ئه‌يه‌رن تا چه‌واشه‌ى مه‌ردم وه‌پى بكه‌ن وه‌ئه‌وه‌گ ئى ريكخرياگه وجوود ديرێد له گشت شوونيگ وه‌تايبه‌ت له به‌غدا.
په‌يامنێره‌گه‌ى ئه‌عماق وتيش: من هوير له‌وه نه‌كردم رووژيگ له رووژان كار له بوار رهسانن بكه‌م، هه‌ر وه‌و خاتريشه دوير بويم له رووژنامه‌نويسى و ته‌ماشاى كه‌ناڵه‌يل ئاسمانييش نه‌كرديام، وه‌لێ له‌وه‌ر ئه‌وه‌گ تواناى هه‌ڵگرتن چه‌ك نه‌ياشتم ناچار بويم ئى كاره بكه‌م.
دوياخريش ئه‌بو ساڵح وت: ريكخرياگ داعش مووچه‌ى مانگانه وه‌پيم دا له‌ژير ناونيشان كه‌فاله‌ت ك ره‌سياده 400 دۆلار يا كه‌ميگ فيشتر، وه‌لێ دوياخر له‌ژير كاريگه‌رى كه‌مى ته‌مويلكردن ره‌سيه ته‌نيا 220 هه‌زار دينار.
