ده‌زگای شه‌فه‌ق و رێكخراو ماڵ كورد له‌ كۆڕ پارت كورد فه‌يلی عێراقی به‌شداری كردن

ده‌زگای شه‌فه‌ق و رێكخراو ماڵ كورد له‌ كۆڕ پارت كورد فه‌يلی عێراقی به‌شداری كردن
2009-07-12T13:12:09+00:00

ژماره‌ی فره‌يگ له‌ كه‌سايه‌تيه‌يل و رێكخراوه‌يل كورد فه‌يلی و ژماره‌يگ له‌ كه‌سايه‌تيه‌يل نيشتمانی ئاماده‌ی كۆڕه‌گه‌ بوين و هه‌ريه‌ك له‌ مامۆستايه‌يل پارێزه‌ر ئه‌مير هنداوی و رياز فه‌يلی دوو سمينار پێشكه‌ش كردن .

مامۆستا ئه‌مير هنداوی له‌ سميناره‌گه‌ی ئشاره‌ت كرده‌ باوه‌ته‌يل ده‌ستووری له‌ عێراق و حقوق هاووڵاتيه‌يل كورد فه‌يلی ك له‌ليان برياس و باوه‌ت ناسنامه‌ی عێراقی و سه‌ختيه‌يليگ ك هاووڵاتی كورد فه‌يلی له‌وه‌خت سه‌ردانی ئه‌را دائره‌یل حكوومه‌تی تويشی تيه‌يگ . رێزداريان هه‌ميش ئشاره‌ت كرده‌ كێشه‌يل دارايی و زوڵميگ ك تا ئيسه‌ ده‌رحه‌ق وه‌‌  كورده‌يل فه‌يلی كريه‌يگ و له‌بان ئه‌ی باوه‌ته‌ ك ئه‌ی دائره‌يله‌ وه‌ تايبه‌ت دائره‌یل ناكوكيه‌يل دارايی ك يه‌ك جارتر له‌ حه‌ق كورده‌يل فه‌يلی زوڵم كردنه‌  ته‌ئكيد كرد و وت شه‌ش ساڵ له‌ رميان ده‌سه‌ڵات ديكتاتۆری عێراق گۆزه‌ری و ئه‌ی دادگايه‌له‌ تائيسه‌ نه‌تيوه‌نستنه‌ ژماره‌يگ له‌ باوه‌ته‌يليگ ك درياسه‌ ده‌سيان يه‌ك لاوه‌ بكه‌ن .

 وه‌لی رێزدار رياز جاسم فيلی له‌ سميناره‌گه‌ی ئشاره‌ت كرده‌ باوه‌ت ناسنامه‌ و وت ئه‌ی باوه‌ته‌ جاری تيه‌ريكه‌ و يه‌ك لاوه‌ نه‌كرياگه‌ ناوبرياگ هه‌ميش ئشاره‌ت كرده‌ ياسای ژماره‌ی 26 ساڵ 2006 و گله‌و داين ناسنامه‌ وه‌گوره‌ی به‌ند سيوم ئه‌را كورده‌يل فيلی . رياز فه‌يلی له‌ دريژه‌ی قسيه‌يله‌گه‌ی وت له‌ ده‌ستوور ته‌نيا وه‌ كورد فه‌يلی ئشاره‌تيگ كرياس‌ و حقوقيان دياری نه‌كرياگه‌ .

له‌شوون كوتايی هاتن وه‌ هه‌ردوو سميناره‌يله‌گه‌‌ قاپيه‌يل گۆفتگوو و به‌شداری له‌وه‌راوه‌ر به‌شداربيوه‌يل له‌ی كۆڕه‌ كرياوه‌ و رێزدار شاكر كه‌ريم له‌لايه‌ن رێكخراو ماڵ كورد له‌باوه‌ت كێشه‌يل دارايی و ماڵ و مڵكی پرسياريگ پێشكه‌ش مامۆستا ئه‌مير هنداوی كرد و مامۆستا هنداويش وت قانون كێشه‌يل دارايی له‌ به‌رژوه‌ندی كورده‌يل فه‌يلی نيه‌ و له‌شون ئه‌ی وه‌خته‌ ك گۆزه‌ريه‌ بايه‌د ئه‌ی ياسايله‌ حه‌قيان زامن بكه‌يگ وه‌لی تائيسه‌ هويچ كاريگ ئه‌نجام نه‌گرتگه‌ .

شاكر كه‌ريم له‌ به‌شداری ديومی له‌باوه‌ت سميناره‌گه‌ی رياز فه‌يلی وت گرنگی ديباجه‌يل ده‌ستوور له‌ به‌نده‌یلی كه‌متر نيه‌ و عێراق له‌ دوو نه‌ته‌وه‌ و زوان ره‌سمی پێك هاتگه‌ ك ئه‌وانه‌يش زوانه‌يل عه‌ره‌بی و كوردين ك له‌ پێك هاته‌يل گرنگ وه‌حساو تيه‌ن، وه‌ی خاتره‌ كورد فه‌يلی ك به‌ش جياوه‌ نه‌كرياگيگ له‌ نه‌ته‌وه‌ی كورده‌ نه‌بايه‌د له‌ چوارچيوه‌ی كه‌مايه‌تيه‌يل عێراقی وه‌حساو بان .
Shafaq Live
Shafaq Live