خه‌و كۆریا‌یل و واقع ئه‌ڵمانیه‌یل !!
دیواره كه‌ن ك ساڵه‌یل ساڵه جوور دیوار به‌رلین هه‌ردو وڵات كردیه‌سه دو كوته‌و؛ ئه‌و دیواره ك وه‌بی خواست و ئراده‌ی خوه‌یان و له سایه‌ی ره‌فتار فه‌رمانڕه‌واگانیان خاك و ئاو ومێژوو كلتور وچاره‌نویس و به‌رژه‌وه‌ندیه‌گانیان كردیه‌سه دوكوته‌و؛ نه‌گ هه‌رئه‌وه به‌ڵكم فه‌ره‌جار
بارگرژیه‌گان ناونی ئه‌و دو وڵاته ره‌سیه‌سه نزیك دواره‌وه بوین ئه‌و جه‌نگ و ماڵویرانیه ك له ده‌یه‌ی په‌نجای سه‌ده‌ی گوزه‌یشته له‌ناونی هه‌ردو وڵات رویدا . له‌لایگتره‌و وه‌ختیگ مه‌ردم هه‌ردو كوريا له‌ناو خوه‌شی و ئاره‌زوی گه‌ورای یه‌كه‌وگردن نیمچه دوورگه‌گه‌یان بوین ؛ میدیاگان خه‌وه‌ر له‌یه‌كداین دو كه‌شتی جه‌نگی كوريای باكوور وباشوور په‌خشه‌وكردن ك دویرنیه ئی پێشهاته ترسناكه بووگه مایه‌ی له‌باربردن یاگه‌ر دویره‌و خستن زیاتر خه‌وه‌یل مه‌ردم هه‌ردو وڵات . له‌باوه‌ت ئه‌و رویداگه خه‌وه‌ره‌یل ئویشن ك كه‌شتییگ كوريای باكوور هاتگه‌سه ناو ئاوه‌یل كۆريای باشوور و سه‌ربازه‌یل باشوور له‌لیان هاتنه‌سه‌ده‌س و ته‌قه له‌ناونی هه‌ردولا ڕیوداگه.
ئه‌گه‌ر بنوڕیمه رویداگ و بار گرژیه‌یل گوزه‌یشته ؛ ئه‌وه كه‌فیگه هویرمان ك تائیسه چه‌ندین جارو وه‌چه‌نه‌ها شیوه كۆريای باكوور شه‌ڕ وه‌كۆريای باشوور فروشتگه ك باشووریه‌گان دوس میانه‌ڕه‌و ئه‌مریكاو خوه‌رئاواس و له روی سیاسی و ئابووریه‌و خاوه‌ن پایگایگ جه‌هانی وه‌هێزه ؛ وه‌لی وه‌پێچه‌وانه‌وه كۆريای باكوور ك خاوه‌ن رژیمیگ شوعی ته‌كڕه‌وه‌و له‌ڕی به‌رنامه نه‌وه‌ویه‌گه‌یه‌وه بویه‌سه مایه‌ی هه‌ڕه‌شه ئه‌را هاوساگانی و كۆمه‌ڵگای ناوده‌وڵه‌تییش نگه‌ران كه‌یگ و هه‌روه‌ی خاتریشه ئداره‌ی سه‌رۆك بوش ئه‌و وڵاته خستویگه ڕز محوه‌ر شه‌ڕ.
ئه‌ڵاجه‌و‌ی هاله‌وره ك سه‌ربار ده‌س دریژی كردن ئه‌را بان سنووره ئاویه‌گان باشوور ؛ كۆريای باكوور ده‌س وه‌جی له‌سیئول تواستگه ك داوای به‌خشش وعه‌فو بكه‌یگ و وه‌ی جووره سه‌رله‌نوو غه‌ڵه‌ت وملهوڕیه‌گان گوزه‌یشته‌ی خوه‌ی دواره‌وه كرد و تواست ( جوور ئه‌و دزه بكه‌یگ ك وه‌رجله خاوه‌ن ماڵ ده‌م واز بكه‌یگ هاواركرد ) سه‌رنج كومه‌ڵ ناوده‌وڵه‌تی وه‌ره‌ولای خوه‌ی بكیشیگ و له‌یوا نیشان بیه‌یگ ك ئه‌وه كۆريای باشووره ك شه‌ڕ وه‌پی فرووشیگ . له‌چه‌ن ڕوییگه‌وه بارودوخ ئیسه‌ی هه‌ردو كۆريا منه‌یگه بارودوخ جاران هه‌ردو ئه‌ڵمان ؛ كوريایلیش جوورئه‌ڵمانیه‌گان یه‌ك ملله‌تن و بنه‌چه‌یان یه‌كیگه و خاوه‌ن یه‌ك خاك و مێژوون ؛ دو كوته‌وبوین هه‌ردو وڵات كوريا وئه‌ڵمانیا له‌ئاكام جه‌نگ جه‌هانی دیوم و ململانی گه‌ورا هێزه‌یل هاته دی وه‌لی هه‌ڵ ومه‌رج سیاسی و ناوده‌وڵه‌تی و خواست و ئراده‌ی ئه‌ڵمانه‌گان هیشت ملله‌ت ئی وڵاته جنگ دو كوته‌وبوین فه‌ڕه بیه‌ن و له گشت بواره‌یل بكه‌فنه نوا. له‌كوتایی یه‌مه‌نگه بویشیم ك ئه‌ڵمانه‌یل له‌یاد بیس ساڵه‌ی یه‌كه‌وگردن ؛ په‌تای دوكوته‌وبوین خسنه‌سه زواڵه‌دان مێژوو وه‌لی ده‌سه‌ڵاتداره‌یل كوریای گه‌ورا له یاد ٥٦ ساڵه‌ی دوكوته‌و بوین نیشتنه پوف كه‌نه ئاگره كزه‌و بویه‌گه . بنیشنه خوه‌شال .
