توان نانه‌گه‌ی خوه‌يان بنه‌نه داوانمان
جه‌هان ديريگ وه‌يه‌يش بويه‌سه مايه‌ی ئه‌وه‌گ ك دوژمنه‌يل و ناحه‌زه‌يل ئه‌را له‌ناوبردنمان ته‌قالا بكه‌ن ك وه‌سياسه‌ته‌يل وپيلانه‌يل سيه‌و شووميان ئه‌ی هه‌ست نيشتمانپه‌روه‌ريه له‌لای كورد لاواز و كه‌مڕه‌نگه‌و بكه‌ن ، وه‌تايبه‌ت كورده‌يل فه‌يلی له‌وه‌ر ئه‌وه‌گ هه‌ميشه به‌شيگ جياوه‌نه‌كرياگ له‌ملله‌ت كورد بوينه‌و له‌وه‌ر رۆڵ گرنگ و كاريگه‌ر كورد فه‌يلی له‌مه‌يدان سياسی و جموجويل رزگاريخواز كوردستان هه‌ميشه هه‌وڵ ئه‌وه درياگه ك ئه‌و پيلانه له‌بان ئه‌ی به‌شه له‌ملله‌ته‌گه‌مان جيوه‌جی بكريه‌يگ و وه‌رده‌وامی تواستنه ك گيان نيشتمانپه‌روه‌ری له‌لای كورد فه‌يلی بكوشن و بوونه بايس ئه‌وه‌گ ك ئه‌ی به‌شه له ملله‌ته‌گه‌مان جياوه بووگ. ئمجا ئه‌را ئه‌ی مه‌به‌سه ته‌قالاكه‌ن وه‌شێوازه‌يل ته‌عريب و مه‌زه‌وگه‌ریه‌وه جووره بۆشايی و داوڕيانيگ له‌ناونی كورد ناوه‌ڕاس وباشوور وه‌ل كورده‌يل نيشته‌جای هه‌رێم كوردستان دروس بكه‌ن هه‌روه‌و جووره‌گ له‌ی چه‌ن ساڵ دوياخره په‌تای مه‌زه‌وگه‌ری عراق گرته‌وه‌ر و بويه‌بايس كێشه‌و كوشت وكوشتار له‌ناونی شيعه‌و سوننه ك تاڕاده‌يگ تائيسه‌يش جووره دوشمنايه‌تيگ له‌ناونيانه‌وه دياره ؛ ئمجا ئه‌گه‌ر مێژوو يا تاريخ كورد بخوه‌نيده‌وه وه‌ل ئه‌وه‌يا ك بيروباوه‌ڕه‌يل ئايينی جياجيای فه‌ره‌يگ هه‌س له‌ناو ئه‌ی ملله‌ته جوور كورد شيعه‌و سوننه‌و كاكه‌يی و ئێزدی و …هتد ، وه‌لی هويچ وه‌خت وه‌دريژايی مێژوو وه‌هۆی بيروباوه‌ڕ و جياوازی ئايينی و مه‌زه‌ویه‌وه هويچ كێشه‌يگ له‌ناونی ديانه‌ته‌يل و مه‌زه‌وه‌يل جياواز له‌ناو كوردا سه‌رهه‌ڵنه‌ياگه ك بووگه بايس دوشمنايه‌تی له‌ناو ڕووڵه‌يل ملله‌ته‌گه‌مان ك ئه‌يه ئه‌ڕا خوه‌ی مايه‌ی فه‌خرو شانازيه ؛ ئمجا ئيمه وه‌دريژايی مێژوو تيه‌ڵ وه‌لی پڕله‌شانازيمان هه‌رگيز ريگه وه ناحه‌زه‌يل نه‌يامنه ك جياوازی بخنه ناونيمان و هه‌روه‌ختيگ به‌رژوه‌نديه‌يل ملله‌ت و نيشتمانه‌گه‌مان كه‌فتگه‌سه مه‌ترسيه‌وه گشتمان وه‌بی فه‌رق و جياوازی ئاماده‌ی گيان فدايی بويمنه و وه‌رگری له مافه‌يل ملله‌ته به‌شخورياگه‌گه‌مان كرديمنه ، وه‌تايبه‌ت كورد فه‌يلی هه‌ميشه وه‌رجله ئه‌وه‌گ هوير له‌مه‌زه‌وگه‌ری بكه‌يگ هوير له كوردايه‌تی كردگه‌سه‌و و خاسترين و ديارترين به‌ڵگه‌يش ئه‌را ئه‌ی قسه به‌شداری و پشتگيری وه‌رده‌وام كورد ناوه‌ڕاس و باشووره له‌پرۆسه‌ی رزگاريخوازی كوردستان هه‌رچه‌ن ك خوه‌يان نيشته‌جای ده‌يشت هه‌رێم كوردستانن و هه‌رلێوا ئه‌و هه‌مگه‌ی كاره‌سات و زوڵم وزووره ك له‌ليان كريا ، ته‌نيا له‌وه‌ر ئه‌وه‌گ كوردن ، ئمجا بايه‌ته ملله‌ت كورد وه‌گشت پێكهاته‌يل و چين وتوێژه‌يليه‌وه و سه‌رجه‌م ديانه‌ت و مه‌زه‌وه‌يليه‌وه وه‌هويچ شيوه‌يگ ريگه نه‌يه‌يگ ك ئه‌و سياسه‌ت و پيلانه‌یله كاريگه‌ری بنه‌يگه بان گيان نيشتمانپه‌روه‌ری و كوردايه‌تی رووڵه‌يل ملله‌ته‌گه‌مان له‌وه‌رئه‌وه‌گ ئيمه وه‌رجله گشت چشتيگ كورد و كوردزوان بويمنه …!
