ئايا پايه‌ی كورد له‌قوناغ دويای هه‌ڵوژاردن ئاينده‌ی عراق چوين بوود ؟
، گشت ئه‌يانه پايه‌ی كورد له قوناغ ئاينده دياری كه‌ن .
ماوه‌يگه رای و ئه‌ڕای چوين جياواز له‌بان شيواز به‌شداريكردن كورد له هه‌ڵوژاردنه‌يل عراق له‌ناونی يه‌ك ليستی و فره ليستی و دوياخريش يه‌ك هه‌ڵويستی له‌لايه‌ن رووشنهويره‌يل و سياسيه‌يل كورده‌وه ها له‌وجوود .كه‌سه‌يليگ له‌يوا وه‌خاس زاننه‌ی ك كورد وه فره ليستی له هه‌ڵوژاردنه‌يل به‌شداری بكه‌يگ ، وه‌لی له‌يوا دياره هويچ وه‌ختيگ فره ليستی نيه‌تويه‌نيگ زامن يه‌ك هه‌ڵويستی بكه‌يگ ته‌نيا وه يه‌ك ليستی نه‌وگ ، راسه له‌لايگه‌وه شايه‌ت فره ليستی نسبه‌ی ده‌نگده‌ره‌يل زياتر بكه‌يگ ، وه‌لی له وه‌رانوه‌ر ئه‌وه‌يش و له‌لايگ تره‌وه وه وجوود فره ليستی ئه‌وه‌سه ك هه‌ر ليستيگ وه ئاره‌زوو خوه‌ی به‌رنامه دانه‌يگ و سياسه‌ت كه‌يگ و له‌هه‌مان وه‌خت وه‌ئازادی تويه‌نيگ هاوپه‌يمانێتی وه‌ل لايه‌نه‌يل ترا بكه‌يگ ك يه‌يش بووگه سه‌به‌ب فه‌وتيان ده‌نگ كورد و دوياخريش چه‌ن پۆست گرنگ يا موهميگ له‌ده‌سده‌يم ك موهمترينيان له‌ده‌سداين پۆست سه‌ركووماره ، ك ئه‌گه‌ر بايگ و ئيمه وه فره ليستی به‌شداری بكه‌يم شايه‌ت ئی جاره ئه‌و پۆسته له‌ده‌س به‌يم و بووگه به‌ش عه‌ره‌ب سونی ، چوينكه له‌ی هه‌ڵوژاردنه عه‌ره‌به‌يل سونی وه‌شيوه‌يگ فراوانتر له‌ئه‌وساو له‌هه‌مان وه‌خت وه هاوپه‌يمانيه‌تيگ گه‌وراتره‌وه به‌شداری كه‌ن ، له‌هه‌مان وه‌خت وه‌ل ئه‌وه‌يشا قه‌يريگ له‌وڵاته‌يل ده‌وروه‌رمان هه‌وڵ ئه‌وه ده‌ن عه‌ره‌به‌يل سونی ئه‌و پۆسته وه‌ربگرن ، يه‌يش وه مه‌به‌س بردنه‌وه‌ی عراق ئه‌را ناو جه‌هان عه‌ره‌بی و ئسلامی و ده‌ور كورديش له‌ناوچه‌گه كزه‌و بكه‌ن .
له‌باوه‌ت پۆست سه‌رووك وه‌زيره‌يليش ئه‌وه ئاشكراس ك ئه‌و پۆسته ئه‌را شيعه‌سه ، چوينكه ئه‌وان له عراق زوورمينه‌ن . يه‌يش له‌وه‌ختيگ له‌قوناغ ئيسه ئيمه‌ی كورد ليست دويه‌مين له ئه‌نجوومه‌ن نوێنه‌ره‌يل عراق و چه‌نه‌ها پۆست گه‌ورای سه‌روه‌ری ديريم . يه‌يش بيجگه ئه‌وه‌ك چه‌نه‌ها ده‌سكه‌فتيش داشتيمنه ، وه‌لی ئه‌وه‌سه نزيكه‌ی چوار ساڵه چونه‌ها كيشه‌ی وه‌ك (بودجه) يا ميزانيه‌و قانوون نه‌فت و غاز و پيشمه‌رگه‌و ناوچه‌يل كيشه‌دار و داوڕياگ له‌هه‌ريم ......هتد هه‌ر وه‌بی چاره‌سه‌ر مه‌ندنه‌سه‌وه . ئمجا ئايا وه يه‌ك ليستی و يه‌ك ده‌نگی و يه‌ك هه‌ڵويستی له‌ماوه‌ی چوار ساڵ گوزه‌يشت تا ئيسه ئه‌گه‌ر نه‌تويه‌نستويم ئه‌و كيشه‌يله يه‌كلاوه بكه‌يم ، ئايا ئيسه حاڵمان چوين بووگ ئه‌گه‌ر ئی جاره وه فره ليستی به‌شداری له‌هه‌ڵوژاردنه‌يل په‌رله‌مان عراق بكه‌يم ؟ ئايا بايه‌سه پايه‌مان له به‌غدا چوين بووگ ؟ له‌وه‌ر ئه‌وه بايه‌سه هيز ولايه‌نه‌يل سياسی كوردستان ته‌ماشای دوير بكه‌ن وهه‌ر هيز ولايه‌نيگ له‌لای خوه‌يه‌وه هه‌وڵ خوه‌ی به‌يگ ئه‌را ئه‌وه‌ك ملله‌ت كوردمان يه‌كگرتگ بووگ تا هه‌قه‌يلمان له‌ده‌س نه‌يه‌يم .
