ئه‌و ژنه
مه‌نووچێر که‌ێخسره‌وپووڕ/ واران نم نم واریا...
هناێگ پیا که‌فته رێ، ژن چیه ناو تهم و مژ...
شه‌وق چراخ فانووسه‌گه بی وه چه‌و گورگێگ و ئیکه‌ش له پشت چریکه‌ێ به‌رزێگ کوشریاوه...
شه‌و وه مکوڵ نیشتۊد...
---
گیس خیس ئه‌و ژنه و پرشنگه‌گان واران بوو خۊن وه خوه‌ێان گرتۊن.
کۊوه‌ێگ له سێفه‌یل گه‌نیاێ رێ پیاگه به‌ساۊدن.
---
پیا و ژنێگ بوو سێف گه‌نیاێ وه خوه‌ێان گرتۊن، له ناو گڵا و چیلیه‌گان و گژ و گیا ره‌د بین.
---
له ناو ده‌ر ماڵه بۊچکڵانه‌ێ باخه‌گه، ژنێگ وه گیسه‌یل خیس وه شان و کووڵ رشیا و شه‌ۊ دڕیا، سه‌ر و مل و مه‌مگه‌یل وه ده‌ر‌ه‌و که‌فتێیه‌و ڕکیاد و له‌رزیاد.
---
«پیا-ژن» وه ده‌مه چه‌قوو تێژێگ مل «ژن-پیا» گرتۊده نیشانه...
---
سێ مناڵ هه‌ر وه شێوه‌ێ خووشه‌یل ره‌نگ په‌ڕیاێ هه‌نگۊر دیار دیان و ژنێ تره‌ک ده‌س وه که‌مه‌ر و داس وه ده‌س وساۊد و وه چه‌و زاق و دڕیاگه‌و نووڕستیاد...
---
ده‌نگ پاێگ له ناو تهم و مژ هاتیاد...
ده‌نگ پاێ «ژن-پیا»، «پیا-ژن»، ئه‌و ژنه؟!
ژنێ ک هاتۊد ئه‌ڕاێ ها‌وچه‌وی* وه گه‌رد ئه‌وانه.
---
پیا، ژنه‌گه ناسی؛ چۊ خه‌زاڵێگ ره‌م کردێ، زڵفه‌یل هۊل، چۊ که‌ڵ مه‌سێگ، خرامان، خرامان ژنێگ، ژنێ ک پیا هاوردۊد ئه‌ڕاێ ها‌وچه‌وی وه گه‌رد ئه‌و ژنه‌یله.
دێو ژنێگ وه ده‌سێگێ خه‌نجه‌ر و وه ده‌سێگێ داسێگ تێژ.
---
چریکه‌ێ به‌رزێگ، پرشنگه‌ێ خۊن، واران، ده‌م ئێواره، رۊ وه سه‌رشه‌و، تهم و مژ نه‌مه‌ن، هساره هه‌ڵات
له ژێر پووس سه‌رد و سیه‌ێ شه‌و، پیا و ژن چین وه‌ره‌و ئاوای
هساره‌ێ دۊدارێگ دۊر و دۊرتره‌که‌و بیادن...
---
رێیه‌گه ته‌مام بی، له ئاوای ده‌نگ ساز و دێوڵ هاتیاد
وه گه‌رد هه‌ر زرمه‌ێگ ک وه دێوڵ کوتیان ژن و پیا چیانه نووا.
----
وه بان زین ئه‌سب که‌وێگ دۊوه‌تێگ وه شه‌ۊ دۊوتانه‌ێ خوه‌ێیه‌و نیشتۊد و پیا هه‌وسار له مل و کووڵ ئارام ئارام گام هێز دیاد و جامه‌ک و ئاینه‌گه‌ردنێگ له وه‌راێوه‌رێانا.
دۊکه‌‌ڵ ئه‌سپه‌ن و گژ و گیا بۊده هه‌ورێگ له بان سه‌رێان، هه‌ر جوور که‌شکه‌شان*، جوور تهم و مژ
پیا ده‌نگ به‌رزه‌و کرد، نه! که‌سێگ ده‌نگێ نه‌شنه‌فت...
چمان ده‌نگێ له دۊره‌و هاتیاد
جوور رمه‌ێ دێوڵێگ بی ک له ئاسووه‌یل دۊر و که‌وکه‌وی ئاسمان هاتیاده گووش
وه‌تی هووره چڕێگ بی له خێڵ هووره‌چڕه‌گان باوانم
واران وارانه! نه! ئاگروارانه
نه! که‌سێگ ده‌نگێیان نه‌شنه‌فت
ئاسمان سا کردۊد..
