مردن ژنیگ تەمەندرویژ چینی تا 80 ساڵ چەوەڕی شویەگەی کردگە

شەفەق نیوز/ وڵات چین، مردن ژنیگ تەمەندرویژ وەناو دو هوتشن لە تەمەن 103 ساڵە لە ناوچەی قويتشو باشوور خوەرئاوای وڵاتەگە وەخوەی دی، دویای ئەوە کە زیاتر لە 80 ساڵ چەوەڕی شویەگەی کرد.

وەرجە مردنی، روی سەنیای کوینەیگ هەڵگردوێد، کە هن سویرەگەی بویە لە ساڵ 1940، ئەوەیش جویر نشانەی وەفاداری ئەرا هوانگ جونفو شویی، کە وە سی ساڵ لەخوەی بوبچگتر بویە.

ئەو دووانە لە ماوەی جەنگ سویر کردنە، و دویای ماوەی کوڵیگ هوانگ چگەسە ناو سوپای  كومينتانگ، کە لەناو جویراجویر ناوچەیل وڵات چین بەشداری لە جەنگ کرد، و لە ساڵ 1943، توانست پەیای بکەێد و وەگەردی بمینێد، و تەنیا کوڕیگ وەناو هوانگ فاشانگ، لە ساڵ 1944 لەلی هاورد.

وەلێ ئەو خوەشیە وەردەوام نەوی، کە دویای ماوەی کوڵیگ هوانگ لەماڵ دەرچگ و دی گلەو نەخوارد، و دویاترین پەیامی لە رووژ 15ی يناير 1952 بوی، کە لەناوی نویسان: هەرچەن رەوشەیل خیزانەگە سەخت بوود، بایەسە گرنگی بەێد وە خوەنەواری کوڕەگەمان، رووژیگ تیەێد یەکانگیرەو بویمن.

دو ژیان سەختیگ وەبی شویەگەی وەخوەی دی، کە وە و رووژانە کار کشتوکاڵی کردگە، و ئەوانەیش دەنگ و کەڵاش چنیە تا خەرج خوەی و کوڕەی درارێد، و چەنیگ داوای کردن رازی نەوی شوی بکەێد، کە وتیاد ئەگەر شویەگەم گلەو خوارد چە؟.

  ئەو خیزانە تەقەلا و رەنج فرەیگ دا تا هوانگ پەیا بکەێد، وەلێ نوینی وەدەسیان نەکەفت.