کشتوکاڵ خانەقین دووپاتکەێد لە دابینکردن به‌شه ئاو ئەرا پلان کشتوکاڵ تاوسان
شەفەق نیوز/ وەڕیەوبەرایەتی کشتوکاڵ خانەقین، سەروە هەرێم کوردستان، ئمڕوو دووشەممە، دووپاتکرد لە دابینکردن تاقاوە ئاویاریەگە ئەرا پلان کشتوکاڵی تاوسان لە دەورگرد قەزاگە وناحیەی مەیدان و قورەتو.
خانەقین لە روی ئیداری سەروە پارێزگای دیالەس، خوەی لەو ناوچەیلەسە ک ململانی هابانی ناوبەین بەغداد و هەولێر، و لە ناوچە کوردستانیە دابڕیایەگانە.
کامران عەبدولڵا وەڕیەوبەر فەرمانگەگە ئەرا ئاژانس شەفەق نیوز وت: تاقاوە ئاویاریەگان ئەرا پلانە تاوسانیەگە دابین کریاگە، و هیچ قەیرانیگ یا کەمییگ لە ئاوەگە لەگشت ناوچەیل سەروە وەڕیەوبەرایەتیەگە نیە، ک لە چەم دیالە وەرگرێد.
عەبدولڵا دووپاتکرد ک هیچ رینمایگ یا بڕیاریگ لە کشتوکاڵ هەرێم لە برنج کاڵین نەهاتگە، ک رووژانە ئاو فرەیگ خوازێد، چوونکە قیران وکەمی لە ئاو نیە.
وتیش؛ فرەیی ئاو و پشتگیری کشتوکاڵی کوردستان هووکاربوی لە سەرکەفتن پلانە زمسانیەگەی ئی وەرزە وەشیوەی خاسیگ، و ئومیدخوازیمن لە سەرکەفتن پلانە تاوسانیەگە، وەگورەی خوازین جفتیارەیل و پێسوت ئابووری و ژیانیان.
شار خانەقی وەناوبانگە وە باخەیلی لە دارخورما وتورشیاتی و دەیان چین لە دارەیل بەرهەمدار، هەمیش نەختی زەویەگەی ئەرا دالیە و خەلە.
