(تایبەت) وەرپرس وەرین دۆسیەی عراق لە وەزارەت دەیشت ئەمریکی: نێچیرڤان بارزانی جي بڕوای ئەمریکی - ئیرانی دەگمەنە

شەفەق نیوز- واشنتن

وەرپرس وەرین کاروبار سیاسی ئەرا عراق لە وەزارەت دەیشت ئەمریکی تۆماس واریک، دووپات کرد، کە سەرۆک هەرێم کوردستان نێچیرڤان بارزانی ئاستیگ "دەگمەن" لە بڕوایی لەلای هەردوگ واشنتۆن و تاران دیرێد، و دۊنێد کە شمارەیگ فرە کەم لە کەسایەتییەیل لە ناوچەگە تۊنن بۊشن ئی پێگە دیرن لەلای هەردوگ لایەنەگە.

 واریک، لە لێدوانیگ تایبەت ئەرا ئاژانس شەفەق نیوز وە جویر کۆمێنت لەبان جۊلەیل دۊایی ئەرا وازکردن کەناڵەیل دانوسەنین ناونی ویلایەتە یەکگرتگەیل و ئیران وت، کە ناوجیکردنە هەرێمییەیل ترەک رەسینەسە رییگ بەسیاگ، لە مەوقەیگ واشنتۆن متمانە وە دەسپاکی نێچیرڤان بارزانی و زانیارییە قۊلەیلی وە کاراکتەرەیل و بڕیاردەرەیل لە لایەن ئیرانییەو دیرێد.

 هەک وت کە تاران، وەگەورەیی، وە خود شیوە نووڕێدە سەرۆک هەرێم کوردستان لەڕۊ زانستنی وە واشنتۆن و میکانیزمەیل بڕیارداین لەناوی، ئەوەگ پایەیگ وەپی بەخشێد کە دەسخستنی لەلای ناوبژیوانەیل ترەک سەخت بوود.

 ماڵپەڕ "ئەکسیۆس"، لە 16ی ئاب، هۊردەکارییەیل کەناڵیگ پەیوەندی نهێنی ئاشکرا کردۊد کە ئیدارەی ئەمریکی سەرۆک دۆناڵد ترمپ پشتی وەپی بەسۊد ئەرا رەسین راسەوخۆ وە سەرکردایەتی سوپای پاسداران ئیرانی، و نێچیرڤان بارزانی هەڵوژارد ئەرا ئەنجامداین کار ناوبژیوان وەختیگ واشنتۆن گومانەیلیگ لای دروس بۊ لەباوەت رادەی نوێنەرایەتیکردن دانوسەنینکارەیل ئیرانی ئەرا هەڵوێست سوپای پاسداران، کە دەسەڵاتیان لە بڕیارداین ئیرانی لە جەنگەگە گەورەتر بۊ.

 وەپای "ئەکسیۆس"، وەڕێوەبەر هەواڵگری نیشتمانی ئەمریکی لەو مەوقە تۆلسی گابارد لە نزیکەی 10ی ئایار پەیوەندی وە بارزانییەوە کرد، وە رەزامەنی ترمپ و جیگرەگەی جی دی ڤانس، و داوای لەلی کرد کەناڵیگ راسەوخۆ وەگەرد فەرماندەی سوپای پاسداران ئەحمەد وەحیدی واز بکەێد ئەرا زانستن هەڵوێست سوپا لەو دانوسەنینەیلە کە وەرپرسەیل ئیرانی وەگەرد واشنتۆن ئەنجامیان دان.

 راپۆرتە ئەمریکییەگە دەسنشان کرد ئەرا ئەوەگ هەڵوژاردن بارزانی راگوزەر نەۊە، چۊنکە پەیوەندییەیل دریژیگ وەگەرد کەسایەتییەیل ئیرانی و ئەمریکی دیرێد، و وە فارسی قسە کەێد و وەرجە یە لە تاران خوەنیەس، لە وەختیگ وەرپرسیگ ئەمریکی وەرین کە قسە ئەرا "ئەکسیۆس" کردۊد وەسفی کرد وە ئەوەگ کەسایەتییگ پراگماتیە کە جی رێزە و بازنەیل بڕیار لە تاران و واشنتۆن ناسێد.

 لەباوەت دەرفەتەیل سەرکەفتن ئەو رۆڵە کە سەرۆک هەرێم کوردستان تۊنێد بڕانێد وە وەراورد وەگەرد تەقەلایل قەتەر و پاکستان، واریک ئەرا شەفەق نیوز وت کە "پیشکەشکردن نووڕینیگ نوو هەمیشە کاریگ وەپایە، و یەیش ئەوەسە کە سەرۆک هەرێم کوردستان وەڕاسی پیشکەشی کەێد"، وەلی رەشبینی خوەی نیشان دا لەباوەت ئەگەر کووتاییهاوردن وە ململانێیەگە لە ماوەی نزیک، "مەزەنە نیەکەم وەرجە هەڵوژاردنەیل ناوەڕاس کە لە سێیەمین رووژ تشرین دۊەم لە بانان ئەنجام دریەێد کووتایی باێد".

 واریک وەرجە یە پۆست وەڕێوەبەر کاروبار سیاسی ئەرا عراق وە وەکالەت لە وەزارەت دەیشت ئەمریکی وەرگردۊد، و لە بەغداد و واشنتۆن لەبان دۆسیەیل عراق کار کردۊد، وەرجە ئەوەگ دۊاتر پۆست جیگر یاریدەدەر وەزیر ئاسایش ناوخۆیی ئەمریکی ئەرا کاروبار دژەتیرۆر بگرێدە دەس، و ئەو ئیسە هاوڕی یەکەم نانیشتەجییە لە ئەنجومەن ئەتڵەسی.