دانيشتنه‌يل فريه‌يگ له كوردستان له‌وه‌ر چاره‌سه‌ر قه‌يرانه‌يل ساز ئه‌كريه‌ێد
له‌ى باوه‌ته‌و، سه‌رچه‌وه‌يگ سياسى ئاگادار ئه‌را(شه‌فه‌ق نيوز)وت: ئه‌و دانيشتن ناونى يه‌كتێى و گۆڕانه له باره‌گاى يه‌كێتى نيشتمانى له سلێمانى ساز ئه‌كريه‌ێد وه‌خاتر باسكردن له مه‌سه‌له‌ى وازهاوردن وه‌زيره‌يل گۆڕان له حكومه‌ت هه‌رێم و نواگيرى سه‌رۆك په‌رله‌مان له چگنى ئه‌را هه‌ولێر.
برياريشه ئمڕوو دانيشتنيگ تر ساز بكريه‌ێد ك سێ سه‌ركرده له‌و په‌نج سه‌ره‌كيه له‌تى به‌شدارى بكه‌ن له هه‌رێم وه‌خاتر تاوتويكردن بار ئيسه‌ى هه‌رێم و ئه‌و گرژيه‌يله ك كه‌فته‌سه ناونى پارتى و گۆڕان له‌ى دوياخره.
جى باسه، ئه‌و دانيشتنيشه هه‌ر يه‌ك له كۆسره‌ت ره‌سول جيگر ئه‌ميندار گشتى يه‌كێتى نيشتمانى كوردستان و محه‌مه‌د فه‌ره‌ج ئه‌ميندار گشتى يه‌كێتى ئسلامى و عه‌لى باپير مير جه‌ماعه‌ت ئسلامى كوردستانى به‌شدارى له‌تى ئه‌كه‌ن و بيجگه ئه‌وه‌يش وه گووره‌ى ئه‌و زانياريه‌يله ك ره‌سيه (شه‌فه‌ق نيوز) برياريشه يه‌كێتى نيشتمانى كوردستان و پارت ديموكرات كوردستانيش دانيشتنيگ جيا ساز بكه‌ن.
