توركيا وە تووپ پەلامار باکوور دهۆک دەێد
سەرچەوەگە ئەرا ئاژانس شەفەق نیوز وت: پەلامارەگە بویە هوکار هیزگردن ئاگر لەناو بووسانەیل خەڵک ئاوایەگە، و هویردەکاری لە بڕ زەرەدەیل ئی پەلامارە نیەریمن.
سەرچەوەگە وتیش: هیزەیل تورکیا وەرجە هەفتەیگ سەربازگەی نوویگ لەبان لویتکەی کویەیل مەتین لە ناوچەی سوری سکێری دروس کردن، دویای جەنگ سەختیگ ناوەین جەنگاوەرەیل پەکەکە و هیزەیل تورکیا لەی ناوچە.
لەلای خوەیانیش، خەڵک ئاوای سکێری باس رخیان لە بەرزەوەبوین وەردەوامی گورزەیل تورکیا کردن، کە رووژنانە دەورگرد ئاواییان کەێدە ئامانج.
بەشیر سکێری خەڵک ئاوایەگەس، ئەرا ئاژانس شەفەق نیوز وت: جەنگ ناوەین پەکەکە و سوپای تورکیا کاریگەری گەورەیگ لەبان ژیان خەڵکەگە دیرێد، کە وەپیمان نیەکریەێد بچیمنە باخ و بووسانمان، و نەیش پەس بڵەوڕنیمن، هەر و یەکجاری گیر هاتیمنە.
سادق نهێلی وت: ئاوایەگە نیمچە چووڵیگ بویە لەوەر ئەو پەلامارەیلە، و وەرجە دوو رووژ تەنیا سێ خیزان لەناوی مەنیمن، و گولەیگ کەفتە نزیکمان، خاسە کەسیگ زەخمدار نەوی، وەلێ ئی رویداوە هیشت ئاگر لەناو باخ و بووسانمان هیز بگرێد.
