پهیا كردن لاشهێ 80 ئێزیدى له گوڕسانێگ دهسهجهمی له نهینهوا
![پهیا كردن لاشهێ 80 ئێزیدى له گوڕسانێگ دهسهجهمی له نهینهوا](https://media.shafaq.com/media/archive/files/Archive.jpg)
وهزارهگه وهدهركردن بهیاننامهێگ و كل كردن كوپیێگێ ئهڕا شهفهق نیوز وتگه : گوڕسانهگه له لاێهن مهردم ئاوای (ئهلجهدعه) وه پهیا كریاگه ك لاشهێ 80 هاوڵاتی ئێزیدی له تهمهنهیل جوراوجور هالهتێ.
وهزارهگه ئاماژه وهیهیش كردگه ك چالاكهیل ماف مروڤ و پسپورهیل ، وهزارهگه لهو گوره ئاگادار كردنهسهو.
ڕیكخراو داعش ك وهئهنجام تاوانهیل ترسناك دژ وه كهمایهتیه ئاینی و مهزهویهگان ناوبانگ دهركردگه پارهكه پارێزگای نهینهوا و ناوچهیلتر باكور خوهر ئاواێ وڵات داگیر كرد.
وهگورهێ ڕاپورتهیل مهحهلی و ناودهوڵهتی ، چهن مانگ دویاێ ئهوه داعش چهن ناوچهێگ ئێزیدی نشین له قهزاێ شهنگال له خوهر ئاوای نهینهوا كونترول كرد و كوشتارهیل گهوراێگ له ناوچهگه خستنهڕێ ك مهردمهگهێ وه كافر و شهیتان پهرهس له قهڵهم ئهدهن.
ڕاپورتهیل باس ئهوهیش كردنه ك توندڕهوهیل ئسلامی سهدان دوێهت و ژن ئێزیدی وه دیل گردنه.
له چهن مانگ گوزهیشته هێزهیل پێشمهرگهێ كوردستان چهن گوڕسانێگ دهسهجهمی پهیا كردن ك ژمارهێگ قوروانی ئێزیدی لهتێان بویِه.
وهزارهێ ماف مروڤ عراق له زوان چهن شایهت حاڵێگهوه تهئكید كردگه ك گروپه تروریستیهگان ، ژنێگ ئێزیدی ك ئاماده نهوێه وهگورهێ ( جیهاد نكاح ) دهس دریژی بكریهێگه سهری له لاێهن تروریستهیلهوه له سێداره دریاگه ، و له ناوراس شار موسلیش 3 جوان وهبی ئهوهگ كهس بزانی چهكردنه له لایهن داعشهوه ئعدام كریانه.
لهلاێگترهوه وهزارهگه له زوان چهن شایهت حاڵێگهوه خهوهرداگه ك 15 هاوڵاتی مهدهنی له ئهنجام كهفتنه خوارهوێ گولله هاوهنێگ له عامریهێ فهلوجه كوژیانه و زهرهدهیل ماڵى فراوانێگ وه ماڵ و بنایهگان گهڕهكهگه ڕهسانگه و بێجگه ئهوهیش ، تروریستهیل جامع شههید نهزهان ئهلجبوری له ناحیهێ زاب ڕماننه له شوون ئهوهگ ، كهلپهلهگان ناوێ دزینه.
ج ك