وێنە.. کارەساتیگ لە کردەوەیل داعش. لەیلای ئیزیدی گشت دوێەتەگان وەناو دویەتەگەی خوەی چڕێد
شەفەق نیوز/ سەردەمە سیاگەی ریخریاگ داعش لە سێ ساڵ زیاتر کۆتایی هاوردگە، بەڵکم چیرۆکە دڵتەنکەریەل و ئاسەوارە کارەساتیەگان لە پشتی کۆتای ناوردنە، تا هەر رووژیگ بژنەفیمن یا بنووڕیمنە کارەسات نوویگ ئەرا قوربانییەیلیگ ک زەخمەیلیان تیمار نیەوون، تەنانەت ئەگەر تەقەلا بیەن وەگەردیان ژیان بکەن تا لە ژانەیلیان سووکەو بکەن، دووارە ژیان نا مرۆییان کەفێدە وەر چەویان، وهەمیش زەخمەیلیان کولیەنەو.
خیزانەگەی لەیلای ئەیزیدی، وێنەیگە لە وێنە دڵتەنگکەرەگان ک هیمان لەناو کامپ کندالا لە پارێزگای دهۆک دیارە، و روەداوەگان خەێدە هویرمان.
لەیلا ناویگە سومبولی، ئەرا دوێەتیگ باس ئەرا ئاژانس شەفەق نیوز کرد، وە مەرجیگ ناوە راسیەگەی ئاشکرا نەوود، ک ریخریاگ داعش لە ساڵ ٢٠١٤ لە لە قەزای شەنگال رفانەی و وە ( سەبیە) فرووشتەی، تا ئیجا جوور هەزاران لە ژنە ئەیزیدیەگان بکەفێدە سوریا.
لەیلا گەورا دوێەت خیزانیگە ک داڵگ و چوار برا وە خوەشک، کوڕیگ کەمئەندام، خوەشکیگ هیمان هالە کاریگەری رخ و ئاوارەیی وەبان پا لە شەنگال تا دهۆک، کەسەیل خیزانەگە مینەی چشتیگ کەن دەسمیەتییان لە وەردەوامبوین ژیان بکەێد، و تەقەلای سووکەوکردن ئەو کارەساتە ک رەسیە پیان، بەڵکم وەبی خود.
لەیلا ئووشێد؛ دویای رفاننم لەلایەن چەتەیل داعش و بردنم وەرەو سوریا، لەورا دووگیان بویم، و بویە دوێەتیگ وەناو هبە، هبە تەنیا هاودەمم بوی ئەرا ئەوزڵکردن لە تاڵی ژیانەگە لەناونی داعشەیل، و ئەرا لەهویربردن زیانەیل دویریم لە خیزانەگەم و ئەو مناڵیمە ک رووزگارەگانی وەدەس ریخریایەگە تاڵان کریان.
هەمیش ئووشێد؛ هەنای بەختەگەم هات، و یەکیگ بویم لەوانەگ چنگ داعش رزگار کریام، رازی نەوین هبەی دوێەتم وەگەرد خوەم بووەم، و ناچار کریام لە سوریا ئەرا چارەنووس نادیاریگ بیلمەی جی.
لەیلا دووپاتکەێد؛ ک وێنەی دوێەتەگەی لە یادی نێەچوود، و ئووشێد فرە هویری کەم تا دەسکەمە گیرستن، وجاروبار مەغزم کۆنتڕۆل نێەکەم و لە ئاسانترین هووکارەگان دەس کەمە مرافە، تەنیا پەنا وە بازیکردن وەگەرد مناڵەگان کامپەگە بەم تا هویر وە دوێەتەگەم نەکەم، و گشت مناڵەگان وەناو هبە چڕم.
لەیلا پەنجەی وەرەو مناڵیگ لەناو کامپەگە دڕا کەێد ک کراسیگ وەڕەنگ سوور هالە وەری، و ئووشێد؛ ئەو مناڵ کراس سوورە دوینێن؟ ناو هبە بڕیمەسە باڵای، هەروەختیگ هویر دوێەتەگەم بکەم ئی مناڵە چڕم و وەگەردی بازی کەم، و نان و ئاو دەمە پی.
شیرین، داڵگ لەیلا، ئەویش زیان لە تاڵی وەخوەی دوینێد، ک وەگەرد ژیانە سەختەگە لەناو کامپەگە، چەوی کەفێدە زیان دوێەتە نووزگەگەی و ئەو کوڕ و دوێەتەگانی.
شیرین ئووشێد؛ مەرگ خوازم تا لەی شکەنجە قورتار بووم، ئەوەگ وەڕیمان هات هیچ کەس گوزرانی نێەکەێد، شەو و رووژ ئەرا رەوشەیل خوەمان گیرم، مناڵەیلم زیان لە شەلەل و جووراجور بیماریەیل وەخوەیان دوینن، وهەمیش وەگەرد ئی ژیان ناخوەشە لەناو کامپەگە، و کەسیگ نییە بنووڕێدە پەیمان و لەی ژیان ژانە قورتارمان بکەێد.
