عراق.. داهاتەیل نەفت نیسان تەنیا بەش مووچەیل کەن

شەفەق نيوز/ پسپۆڕ ئابووری نەبیل مەرسومی.. ئمڕوو سێشەممە، دووپات کرد کە داهاتەیل نەفت عراق، ئەرا مانگ نیسان گوزەشتە، تەنیا ئەرا بەشەوکردن مووچەیل و خەرج کۆمپانیایل مووڵەتە نەفتیەیل بەس کەێد.

 مەرسومی لەبان سۆشیال میدیا نویسان: داوەزیان هەناردەیل نەفتی عراق، و داوەزیان نرخ نەفت خاو لە من 72.5 دۆلار ئەرا یەک بەرمیل لە مانگ ئادار ئەرا 66.7 دۆلار لە مانگ نیسان، بویە مدوو داوەزیان داهاتەیل نەفت 7.716 مليار دۆلار ئەرا 6.738 مليار دۆلار، ئەوەیش وەڕیژەی داوەزیانیگ رەسێدە 15%".

دویەکە دووشەممە، وەزارەت نەفت عراق ئاشکرای ئامارەیل هەناردەیل نەفت خاو و داهاتەیل دارایی ئەرا مانگ نیسان گوزەشتە کرد.

وەزارەتەگە لە بەیاننامەیگ رەسیە ئاژانس شەفەق نیوز وت: بڕ هەناردەیل نەفتی و داهاتەیل مانگ نیسان گوزەشتە، وەگورەی ئامار کۆتایی لەلایەن کۆمپانیای "سومو"، رەسیە 100 ملیۆن و953 هەزار و282 بەرمیل، و داهاتی رەسیە شەش ملیار و738 ملیۆن و309 هەزار دۆلار.

وتیش: بڕ ئەو نەفت خاوە کە لە مانگ گوزەشتە لە کێڵگەیل نەفتی ناوڕاس و باشوور عراقەو هەناردە کریاس رەسێدە 99 ملیۆن و752 هەزار و879 بەرمیل، لە وەختیگ هەناردەیل کێڵگەی قەیارە لە پارێزگای نەینەوا رەسیە 900 هەزار و584 بەرمیل، و بڕ هەناردەکردن ئەرا ئوردو 299 هەزار و819 بەرميل بوی.