روبێعی ئاگر له ڕوێ ئمارات كه‌ێگه‌و: بومبه‌یل و خوه‌ێ كوژه‌یل ئێوه داعش له عراق دروس كرد
2015-05-31T19:18:57+00:00
قسه‌گان ڕوبێعی ئه‌ندام وه‌رین په‌رله‌مان عراق له جواو لێدوانێگ وه‌زیر كاروبار خارجیه‌ێ ئمارات عه‌بدوللا بن زاید ئال نه‌هیان كریاگه ، ك سوریه و عراق وه سه‌رهه‌ڵداین داعش له ناوچه‌گه تومتبار كردگه.
ئال نه‌هیان له كونگره‌ێ ڕوژنامه‌گه‌ریێگ وه‌ل هاوتا ڕوسیه‌گه‌ێ له موسكور وتگه : گه‌مارو داین تروریزم و له ناوبردنێ وه‌بێ چاره‌سه‌ر كردن هوكاره‌یل سه‌رهه‌ڵداینێ له كومه‌ڵگا مومكن نییه.
زیاتر وتگه : هوكاره‌یل سه‌رهه‌ڵداین تروریزم ، هه‌ردو ڕژیم دمه‌شق و به‌غدا بوێنه ، ك ملله‌ته‌یلیان سه‌ركوت كردنه و یه‌كسانی و دادپه‌روه‌ری له ناونی هاوڵاتیه‌یلیان به‌رقه‌رار نه‌كردنه.
ڕوبێعی وه‌ده‌ركردن به‌یاننامه‌ێگ ك كوپیێگێ ئه‌ڕا شه‌فه‌ق نیوز كل كریاگه وتگه : ده‌یان خوه‌ێ كوژ ئماراتی خوه‌یان له عراق ته‌قاننه‌سه‌و و لاشه‌ێ بو گه‌نیان كوت كوت بوێه و ناوه‌گانیان دێرم ، بێجگه ئه‌وانه‌یش 300 ته‌ن مه‌واد دروس كردن بومب له لاێه‌ن ده‌زگا ئه‌منیه‌گان عراقی گیریاگه ك له دوبه‌یه‌وه هاتگه‌سه ئه‌ڕا عراق و زورم ڕژیمه‌یل عه‌ره‌ب ده‌س له دروس كردن داعش داشتنه نه‌گ حكومه‌ت عراقی.
زیاتر وتگه : له ساڵه‌یل 2006 – 2007 زانیاری وردێگ ڕه‌سیه‌سه ده‌سمان له باوه‌ت ڕه‌سین 300 ته‌ن مه‌واد ته‌قینه‌وه تایبه‌ت وه‌دروس كردن بومب ئه‌ڕا به‌سره ك له دوبه‌یه‌وه هاتگه و سه‌ره‌نجام هێزه‌یل ئه‌منی ده‌س نانه بان باره‌گه و ئه‌و كرده‌وه‌ێ تروریستیه پوێچه‌ل َ كردنه‌و ، باس ئه‌وه‌یش كردگه ك مه‌حاڵه ئه‌و مه‌واده له دوبه‌ێ ده‌ربچوگ و ده‌زگا ئه‌منیه‌گان ئه‌و وڵاته خه‌وه‌ر له‌لێ نه‌یاشتون.
ڕوبیعی ئاماژه وه‌یه‌یش كردگه ك ده‌یان خوه‌ی كوژ ئماراتی خوه‌یان له عراق ته‌قاننه‌سه‌و ، وداعش ده‌سكرد عراق نییه ، به‌ڵكم ئه‌وانه دروسی كردنه ك كومه‌ك وهاوكاری دروكین وه‌ناو هه‌ژاره‌یل له وڵات ئمارات سینن و ملیونان دولار ئه‌ڕا گروپه تروریستیه‌گان كل ئه‌كه‌ن و ئاماده‌یی خوه‌ی نیشانداگه ك ناو ئه‌و ئماراتیه‌یله ئاشكراوه بكا ك خوه‌یان له عراق ته‌قاننه‌سه‌و.
له كوتایی به‌یاننامه‌گه‌ێ ووتگه : جواو حكومه‌ت عراقی له ڕێ ئبراهیم جه‌عفه‌ری وه‌زیر كاروبار خارجیه‌ێ عراق لاواز بوێه و عراق زانیاری ده‌قیق له باوه‌ت ئه‌و وڵاته‌یله دێرى ك پشتگیری گروپه‌یل تروریستی ئه‌كه‌ن.
ج ك
