به‌ریتانیه خوه‌ێ ئاماده ئه‌كا ئه‌ڕا كل كردن پسپوره‌یل سه‌ربازی ئه‌ڕا مه‌ترسیدارترین شوونه‌یل عراق
2015-05-30T13:27:06+00:00
ڕوژنامه‌ێ " زی تایمز " به‌ریتانی ، ئمڕو شه‌ممه ، خه‌وه‌ردا ك پلان جێگیر كردن سه‌ربازه‌یل شاره‌زا و پسپور جور یه‌كه‌یل پوێچه‌ڵ كردنه‌وه‌ی بومب ، ته‌عبیر له توێڕه‌یی گه‌ورا ئه‌فسه‌ره‌یل سوپای به‌ریتانیه ئه‌كا ، له شوون ئه‌وه‌گ وه‌زاره‌ێ دارایی ئه‌و وڵاته ئاشكرای كردگه یه‌ك ملیارد ئسته‌رلینی له بووجه‌ێ وه‌زاره‌ێ وه‌رگری به‌ریتانیه كه‌مه‌و ئه‌كا.
سه‌رچاوه‌یل حكومه‌ت به‌ریتانیه ئاشكرای كردنه ك شایه‌د ئه‌رك مه‌شق وه‌پێكردن سه‌ربازه‌یل عراقی له ناوچه‌یل كوردنشین فه‌راتر بچوگ ك ئه‌و باوه‌ته له دانیشتن ئه‌نجومه‌ن ئاسایش نه‌ته‌وه‌یی به‌ریتانیه ك ڕوژ په‌نج شه‌ممه وه سه‌روكایه‌تی سه‌روك وه‌زیره‌یل ده‌یڤید كامیرون باس كریاگه.
سه‌رچاوه‌ێگ ڕوژنامه‌گه‌ری وتگه : توایم باس ئه‌وه بكه‌یم ك چه توێه‌نیم بكه‌یم تا سوود له‌و سه‌ربازه‌یله وه‌ربگریم ك شاره‌زایی له پوێچه‌ڵ كردنه‌وه‌ێ بومب دێرن.
جه‌نه‌رال بوب بروس ك سه‌رپه‌ره‌سی سه‌ربازه‌یل به‌ریتانی له عراق ئه‌كا و هاله پایگاێگ له كوه‌یت زیاتر وتگه ، ته‌قالا كه‌یم ك وه‌گوره‌ێ توانا هاوكاری وه‌ل سه‌ربازه‌یل و ڕاوێژكاره‌یل ئه‌مریكی بكه‌یم.
ڕوژنامه‌گه ته‌ئكید كردگه ، سه‌ربازه‌یل به‌ریتانی ئاماده‌ن تا وه‌ل سه‌ربازه‌یل ئه‌مریكی بچنه ناوچه مه‌ترسیداره‌گان ئه‌ڕا مه‌شق وه‌پێكردن سه‌ربازه‌یل عراقی ، وه‌لێ ئه‌ڕا ئه‌و كاره نیاز وه هه‌ڵكردن چراغ سه‌وز ئه‌نجومه‌ن ئاسایش نه‌ته‌وه‌یی دیریم ، ئاماژه وه‌یه‌یش كردگه ك ژماره‌ێ ئه‌و هیزه‌یله ك ئه‌گه‌ر كل كردنیان ئه‌ڕا ئه‌و ناوچه‌یله هه‌س كه‌مه شایه‌د ده‌یان سه‌رباز زیاتر نه‌ون.
ئه‌و هێزه‌یله له به‌غدا ئه‌مینن ، وه‌لێ شا یه‌د ئه‌ڕا شوونه‌یلتریش كل بكریه‌ن ك سه‌ربازه‌یل ئه‌مریكی مه‌شق وه هێزه‌یل عراقی ئه‌كه‌ن.
سه‌ربازگه‌ێ تاجی ك ئه‌كه‌فێگه بیس كیلومتری شار به‌غدا یا پایگای ئاسمانی " عه‌ینولئه‌سه‌د" له پارێزگاێ ئه‌نبار، له جومڵه‌ێ ئه‌و شوونه‌یله‌نه ك شایه‌د سه‌ربازه‌یل به‌ریتانی ئه‌ڕایان كل بكریه‌ن.
به‌ریتانیه زیاتر له 100 سه‌رباز و پسپور سه‌ربازی له عراق دێرێ ئه‌ڕا مه‌شق وه‌پێكردن هێز پێشمه‌رگه له هه‌ریم كوردستان ك له باوه‌ت چوێنیه‌تی لاوردن بومبه دانریاییه‌گان مه‌شق وه‌و هێزه‌یله كه‌ن ، بێجگه ئه‌وه‌یش قه‌ناس وه‌ده‌سه‌یل و چوێنیه‌تی خاسه‌و كردن چه‌ك هوكاره‌ی پێشمه‌رگه كه‌ن و یه‌یش به‌شێگه له‌و ئه‌ركه‌یله ك ئه‌ڕا یه‌كم جار له لاێه‌ن وه‌زیر وه‌رگری مایكل فالون ئعلان كریاگه.
ج ك
