بانک ناوەندی عراق لە ماوەی ساڵ ٢٠٢٤ زیاتر لە ٨٠ ملیار دۆلار فرووشێد

شەفەق نیوز/ دامەزریای "عراق المستقبل" ئەرا توێژینەوە و سڵاکاری ئابووری، ئمڕوو چوارشەممە، وت: فرووشەیل دۆلار بانک ناوەندی عراق لەماوەی ساڵ گوزەشتەی ٢٠٢٤ لە ٨٠ ملیار دۆلار زیاتر بویە.

مەنار عوبەیدی سەرۆک دامەزیایەگە ئەرا ئاژانس شەفەق نیوز وت: بڕ فرووشەیل بانک ناوەندی لە ساڵ ٢٠٢٤ رەسیە ٨١ ملیار دۆلار ئەمریکی.

وتیش: ٧٢٪ لە فرووشەیل بەشەو بەستە لە میکانیزمەیل قایمکردن باڵانسەیل لە بانکەیل کلکردن لە جویراجویر دراوەیل بیانی.

عوبەیدی وتیش: ٢٤٪ لە فرووشەیل لەڕی سەکووەیل بازرگانی سەروە بانک ناوەندی بەشەو کریانە، کە لە کۆتایی ٢٠٢٤ وە فەرمی لەکار وسیان، وتیش تەنیا ٤٪ لەو فرووشەیلە کاش بوینە ئەرا گەشتکەرەیل لە فرۆکەخانەیل عراق.