كۆمكار عه‌ره‌بى هه‌ڵويست نيشاندا له په‌يجوريه‌يل سعودى له‌باره‌ى خاشقچى
شه‌فه‌ق نيوز/ ئه‌ميندارێتى گشتى كۆمكار ده‌وڵه‌ته‌يل عه‌ره‌بى، خوه‌شاڵ بوێ وه‌و فه‌رمانه‌يل شانشينيه ك له‌لايه‌ن شا سه‌لمان بن عه‌بدولعه‌زيز پاشاى سعوديه‌و درچيه وه‌ل به‌ياننامه‌گه‌ى جيگر گشتى سعودى له‌باره‌ى جه‌مال خاشقچى رووژنامه‌نويس سعودى.
كۆمكار عه‌ره‌بى باس له‌و په‌يجوريه‌يل كرد ك سعوديه تائيسه ئه‌نجامى ئه‌ياد و ئاماژه وه مكوڕبوين شاى سعودى ئه‌كا له‌بان ده‌رخستن راسيه‌يل له مه‌سه‌له‌گه ك بويه جى گرنگى راى گشتى و هه‌ر وه‌و خاتريشه ئه‌مينداريه‌گه له به‌ياننامه‌يگ پرسه‌و سه‌ره‌خوه‌شى له كه‌س وكار ئه‌و رووژنامه‌نويسه كرد ك له‌ناو باڵيۆزخانه‌ى وڵاته‌گه‌ى له ئه‌سته‌مبوڵ كوشيا.
جى باسه، دوياى ئه‌وه‌گ په‌يجوريه‌يل سعودى ته‌ئكيد له كوشيان خاشقچى كرد له‌ناو بڵيۆزخانه‌ى وڵاته‌گه‌ى له ئه‌سته‌مبوڵ توركى، نوێنه‌رايه‌تى گشتى سعودى 18 كه‌س سعودى له زه‌مه‌ت مه‌سه‌له‌گه ده‌سوه‌سه‌ر كرد بيجگه ئه‌وه‌گ شا سه‌لمان فه‌رمان لاوردن ئه‌حمه‌د عه‌سيرى جيگر سه‌رۆك هه‌واڵگرى گشتى و سعود بن عه‌بدوڵڵا قه‌حتانى راوێژكار له ديوان پاشايه‌تى و ده‌ركردن چه‌ن ئه‌فسه‌ريگ تر دا له هه‌واڵگرى گشتى.
