ترامپ ئه‌را روێ وه‌ڕوێ بوينه‌وه‌ى تووفان ئاشكراى حاڵه‌ت ته‌وارێ كرد
2018-10-10T19:01:00+00:00
شه‌فه‌ق نيوز/ دوناڵد ترامپ سه‌رۆك ئه‌مريكى، ئاشكراى حاڵه‌ت ته‌وارى كرد له ولايه‌ت فلۆريدا، ئه‌ويش له‌وه‌ر هساوكردن ئه‌را ره‌سين تووفانيگ تون نزيك له كناراوه‌يل فلۆريدا.
ناوه‌ندى نيشتمانى ئه‌را گه‌رده‌لويل ك باره‌گاى ها مه‌يامى، وت: ئى تووفانه مه‌ترسيه‌يلێ زياێ كردگه و ئاڵشت بويه ئه‌را چين چواره‌م له‌بان پێوه‌ر له په‌نج چين و شايه‌ت زياتر كاولكاريش بدێ وه‌گووره‌ى تووفانه‌يل تر وه‌رين ده‌يان ساڵه له‌ى ولايه‌ته‌و هه‌ر وه‌و خاتريشه حاڵه‌ت ته‌وارێ ئاشكرا كريا.
ناوه‌نده‌گه هه‌ميش وت: دويريش نيه ئى تووفانه كوشياگ له‌لى بكه‌فێده‌و له باكوور خوه‌رهه‌ڵات كناراوه‌يل مه‌كسيك و ئاماژه وه‌يه‌يش كرد ك ئاشت شه‌پۆل ده‌ريايش ئه‌ڕه‌سێده 4 مه‌تر له چه‌ن ناوچه‌يگ.
