ئه‌ردۆغان جيوازكردن سه‌دان چه‌كدار داعش ئه‌را تره‌مپ ئه‌خاده ڕوێ
شه‌فه‌ق نيوز/ هووكاره‌يل ره‌سانن توركى باس له‌وه كردن ره‌جه‌ب ته‌يب ئه‌ردۆغان سه‌رۆك توركيا وه‌رپرسيارێتى جيوازكردن 800 چه‌كدار ئۆرپى سه‌ر وه ريكخرياگ تيرۆريستى داعش له باكوور خوه‌رهه‌ڵات سورياوه ئه‌را دۆناڵد تره‌مپ سه‌رۆك ئه‌مريكا خسته‌سه ڕوێ.
له‌ى باوه‌ته‌و، رووژنامه‌ى "حوڕيات" توركى وت: ئه‌ردۆغان وه شيوه‌يگ له‌ناكاو ئه‌وه ئه‌را تره‌مپ خسته‌سه ڕوێ ك واشنتۆن وه‌رپرسيارێتى جيوازكردن ئه‌و چه‌كداره‌يله له ناوچه‌يل ژير ده‌سڵات كورده‌يل ئه‌را ناوچه‌يل ژير ده‌سڵات توركيا له باكوور سوريا.
رووژنامه‌گه له زووان سه‌رچه‌وه‌يگ باڵاى توركيه‌و ئاماژه وه‌يه‌يش كردگه ك تره‌مپ هه‌ميشه وه‌ل ئه‌ردۆغان باس له چاره‌سه‌ر كيشه‌ى چه‌كداره‌يل ئۆرپى سه‌ر وه داعش ئه‌كاو نگه‌رانى خوه‌ى له واين ئه‌و چه‌كداره‌يله ده‌رئه‌خا له‌ژير ده‌سڵات هيزه‌يل سورياى ديموكرات.
