هه‌ڤه‌خشتره چوين هه‌ق باوگى سه‌نده‌و؟
فره‌ڤه‌رتيش له‌وه‌ختيگ ك هاته بان ته‌خت ده‌سه‌ڵات، هووز سه‌كا ك هووزيگ شه‌ڕانى و جه‌نگاوه‌ر بوين له ده‌ورگرد ده‌رياچه‌ى ورمێ ژيان و فارسه‌يليش له باشوور ژيان. ئمجا فره‌ڤه‌رتيش هه‌ميشه هه‌وڵ ئه‌وه دياد ك مه‌رز ئمپراتۆريه‌ت ماد فراوانتر بكاو ئه‌وه بوى په‌لامار فارسه‌يل دا و ناوچه‌يليان خسته ژير ده‌سڵات خوه‌ى و فارمانڕه‌وايى ئمپراتۆريه‌ت ماديش فراوانتر كرد، وه‌لى ئه‌و له فكر ئه‌وه بوى ك په‌لامار ئمپراتۆريه‌ت ئاشوورى بيه‌ێد و كووتايى وه زوڵم و سته‌ميان بارێد، چوينكه بريگ نه‌ته‌وه ك ناچار بوين باج بيه‌نه ئاشووريه‌يل سه‌رانه له‌ليان سه‌نديان.
ئه‌وه بوى فره‌ڤه‌رتيش سوپاى قورسيگ گرده‌و كرد و كه‌فته‌ڕى وه‌ره‌و نه‌ينه‌واى پايته‌خت ئاشووريه‌يل، ئمجا هه‌واڵ ره‌سيه ئاشووريه‌يل و ئه‌وانيش ده‌سكردنه وه‌رگرى و روى وه‌ڕوى ماده‌يل بوينه‌و، له‌ى وه‌ختيشه سه‌كاكيه‌يليش ك له ده‌ورگرد ده‌رياچه‌ى ورمێ ژيان و هاوپه‌يمان ئاشووريه‌يل بوين، سوپاى فريه‌يگ له پشته‌و خستنه‌ڕى ئه‌را په‌لامارداين ماده‌يل و پشتگيرى له ئاشووريه‌يل، دى ماوه‌ى فريه‌يگ جه‌نگ قورس روێداو ماده‌يل ئابڵوقه دروياوين له‌ناونى ئاشووريه‌يل و سه‌كاكيه‌يل.
له يه‌كيگ له‌و جه‌نگه‌يله له‌ساڵ 655 وه‌رجه زايين فره‌ڤه‌رتيش كوشياو ده‌وڵه‌ت ماد كزه‌و بوى و سه‌كاكيه‌يل جوور هه‌ليگ كه‌فتنه داگيركردن و تاڵانكردن ناوچه‌يل نيشته‌جى ماده‌يل و نزيكه‌ى 28 ساڵ زاڵ بوينه بان وڵات ماده‌يل و كوشت و كوشتار فريه‌يگ ئه‌نجام دان.
له‌شوون كوشيان فره‌ڤه‌رتيش، كوڕه‌گه‌ى ك ناوى هه‌ڤه‌خشتره بوى ك وه كوردى كه‌يخوسره‌و بوى ده‌سڵات گرته ده‌س، يه‌يش كيشه‌ى فريه‌يگ داشت وه‌ل سه‌كاكيه‌يل، وه‌لى وه‌ل ئه‌وه‌يشا رابه‌ريگ ئازا بوى له وه‌ڕيه‌وبردن كاروبار وڵات و سه‌ركرده‌يگ بى نموونه بوى.
هه‌ڤه‌خشتره ئه‌را ئه‌وه‌گ بتويه‌نێد روى وه‌ڕوى سوپاى دوشمن بدێ، سوپايگ ريك وپيك گرده‌و كرد و شاره‌زايانه سه‌ركردتيه‌تييان كرد ك پيكهات له سوار و پياده، ئى سوپا فريه ئازاو بازا بوين له تير و كه‌وان و نه‌يزه‌و چه‌ك.
ئمجا له‌وه‌ر ئه‌وه‌گ وڵات ماد شوونيگ له‌بار بوى ئه‌را په‌روه‌رده‌ى ئه‌سپ و ماده‌يليش هه‌ر له مناڵيه‌و شاره‌زاى ئه‌سپ سوارى و تير وه‌شانن بوين، كار هه‌ڤه‌خشتره ئاسانتر بوى ئه‌را دامه‌زرانن هيز سوارى خاوه‌ن ئه‌زموون، هه‌ر وه‌و خاتريشه تويه‌نست شماره‌ى فريه‌يگ له سواره‌يل ئازاو چه‌ونه‌ترس دامه‌زرنێد وه جووريگ ك له هويچ چشتيگ نه‌ترسن.
هه‌ڤه‌خشتره وه پشتگيرى و ده‌سميه‌ت ئه‌و سوپاى ئازا تويه‌نست سه‌كاكيه‌يل بشكنێد ك ماوه‌ى فريه‌يگ له وڵات ماد كه‌فتوينه تاڵان و كوشت و كوشتار، هه‌ر وه‌و خاتريشه گشت سه‌كاكيه‌يل له‌وڵات تاران و وه‌و جووريشه توڵه‌ى باوگيشى كرده‌و له سه‌كاكيه‌يل.
كه‌ريم ره‌زا
