قه‌ڵاى "ئێگ" له مێژوو
بيگومان له سه‌رده‌م كويه‌ن له ئیرانیش هویچ كه‌سیگ چه‌وی نه‌كه‌فتوێده ئى جووره قه‌ڵایگ و ته‌نانه‌ت ناويشی نه‌ژنه‌فتوێد، وه‌لێ دوياتر له‌وه‌خت تاريفكردنه كه‌مه كه‌مه مه‌ردم ئه‌زه‌رت ديده‌نی كرديان.
ئى قه‌ڵا له‌وه‌خت خوه‌ی له‌بان كویه‌ى پان و وه‌رینیگ دروس كریاوێد، ك نزیكه‌ى ٥٠ كيلۆمه‌تر دویر بوى له‌لاى خوه‌رهه‌ڵات "ئسته‌هبانات"، ئمجا ئه‌و كويه‌يشه‌ك ئی قه‌ڵا له‌بانی دامه‌زرياوێد ئه‌وه‌نه به‌رز بوى هه‌میشه جوور ئه‌وه‌گ باس كرديان نكه‌گه‌ى له‌ئه‌ور بوى.
قه‌ڵاى ئێگ شوونه‌وار فره جوانیگ بوى و شه‌وق دیاده‌و، ئمجا ده‌ورگرد كویه‌گه له‌خواره‌و تا ژويه‌ر گشتی له تاشه كوچگ بوى و جووگه‌يليگ له‌لى دروس كرياوێد له‌وه‌ر ئه‌وه‌گ له‌ڕی ئه‌و جووگه‌يله‌و باخ و دارستانه‌يل ئاو بدريه‌ێد ك پیكهاتوێد له باخه‌یليگ پڕ له‌میوه‌جات فريه‌يگ جوور ئه‌نجیر و نارنج و سیف و قووخ و میوه‌یل تر.
له ناوقه‌ى جه‌وه‌ڵه‌گه 40 گووڵ ئاو گه‌ورايش له كوچگ تاشیاوێد، ك ئه‌ويش ئاوه‌يليان له كانیاوه‌یل بان جه‌وه‌ڵه‌گه‌و سه‌رچه‌وه گرتیان و وه‌رده‌وام پڕ له ئاو بوين و له هه‌مان وه‌خت ديمه‌ن جوانيگيش داوينه ته‌بيعه‌ت شوونه‌گه.
وه‌ل ئه‌وه‌يشا له‌بان ته‌ختایى جه‌وه‌ڵه‌گه‌يش شاریگ پڕ له جوانی دروس كریاوێدنزيكه‌ی 17 هه‌زار خیزان له‌تى وجوود داشتگه‌و ماڵه‌يليانیش له‌لایه‌ن شا نيزامه‌دین و باوگ و باپیریه‌یليه‌و دروس كریاوین و ئاويش ره‌سیاده گشت ماڵیگ.
ئى قه‌ڵای سه‌خته‌گه‌یش له هه‌مان وه‌خت ناويشى (دار الامان) بوى ، چوينكه وه‌ڕاسی مه‌ردمه‌گه‌ی ناوی ئحساس وه دڵنيايی و ئه‌مان كرديان. ئمجا له پشت كویه‌ى ئێگ كویه‌يگ تر بوی وه‌ناو كويه‌ی "سه‌لمانى"، ك ئه‌ويش له‌یوا ناودار بوی ك گوایا كان ئاڵتوین و نوقره‌و زریشك و ئاسن و پووڵاو مۆمیا و چشته‌یل تر بویه.
مه‌لا جه‌ميل رۆژبه‌يانی
