سه‌ره‌تاێ سه‌رهه‌ڵداین كومه‌ڵه‌یل و جمشته‌یل ڕوشنهوێرى كوردی له سوریه 2
2015-04-23T18:54:46+00:00
توام ئاماژه وه‌ێه‌یش بكه‌م ئێ باوه‌ته ، یه‌كمین باوه‌ته ك باس مێژوو كومه‌ڵه‌یل كوردی له سوریه وه‌شێوه‌ێ كورت و پوخته كه‌ێگ و سه‌ختی نویسان ئێ باوه‌ته له‌وه‌سه ك سه‌رچاوه‌یل كه‌مێگ له‌وه‌رده‌س بوێه و هه‌ر وه‌ێ خاتره ناچار بوێمه وه‌شێوه‌ێ مه‌یدانی سه‌ردان ئیلا و ئه‌ولا بكه‌م ئه‌ڕا ئه‌وه‌گ زانیاریه‌گان له زوان ئه‌و كه‌سایه‌تیه‌یله بوه‌م ك له‌و سه‌رده‌مه ژیانه و بنویسمه‌یان و چه‌ن ڕه‌ش نوێسێگیش له ڕه‌حمه‌تى مێژوو ناس حه‌سه‌ن هوشیار و چه‌ن كه‌سێگتر كه‌فته ده‌سم و پشت وه‌و ڕه‌ش نویس و چه‌ن ژماره‌ێگ گوڤار ئاگاهی كوردی به‌سامه.
بیلا ئیسه‌ێش بچمه ناوه‌ڕوك باسه‌گه‌م :
ژماره‌ێ فه‌ره‌ێگ له نیشتمانپه‌روه‌ره‌یل و خه‌باتكاره‌یل كورد ك له شوڕش شێخ سه‌عید پیران و ڕاپه‌ڕین ئاگرى وه سه‌ركرداێه‌تی جه‌نه‌رال احسان نوری پاشا به‌شدارى كردوێن ، له شوون ناكامى و شكست خواردن هه‌ردو جمشته‌گه ، له‌ده‌س زوڵم و سته‌م توركه كه‌مالیه‌گان ، ڕوێ له ناوچه‌ێ جزیره له باكور سوریه كردن ، له‌وانه‌یش ئه‌میر جه‌لاده‌ت به‌درخان و دكتور ئه‌حمه‌د نافز و عوسمان سه‌بری و حه‌مزه مه‌كسی و ئه‌كره‌م جه‌میل پاشا و قه‌درى جه‌میل پاشا و مه‌مدوح سه‌لیم و قه‌دری جان دیركی و نورى دێرسمی و حه‌سه‌ن هوشیار و عه‌بدولره‌حه‌مان عه‌لی یونس ئاغا و ئه‌مین ئه‌حمه‌د بریخانى و نوره‌دین زازا و ژماره‌ێگتر ك ناوه‌گانیان له هوێرم نییه.
ده‌سه‌ڵات فه‌ره‌نسه ك له‌و سه‌رده‌مه خاك سوریه داگیر كردوێگ، ته‌نیا وه‌چه‌و به‌رژه‌وه‌ندى تایبه‌ت خوه‌ێ نوڕستیاده كورد و نواى چالاكیه‌یل كورد گردیاد و نه‌یشتیاد خه‌باتكاره‌یل كورد له ڕێ سنوره‌یله‌وه وه‌ره‌و خاك توركیه بچن ، وه‌لێ جار جارێگ ئه‌ڕا خاتر به‌رژه‌وه‌ندى فه‌ره‌نسه ڕێ دیاده پێێان ، دوێاخر ده‌سه‌ڵات فه‌ره‌نسی له سوریه ، هامشو كورده‌یل له سنوره‌یل توركیه و سوریه قه‌یه‌خه‌كرد و بڕیاردا له ناوچه‌یل سنوری دوێریانه‌و بخه‌ێگ و ڕێ داپێێان له دمه‌شق پایته‌خت نیشته‌جابوون.
ئه‌و سه‌ركرده و ڕوشنهوێره‌یل كورده ، له ڕوێ هه‌ست نه‌ته‌واێه‌تى و وه‌رپرسیارى خوه‌یان له وه‌راوه‌ر پرس ملله‌ته‌گه‌یان و شكست خواردن ڕاپه‌ڕین و شورشه‌گه‌یان ، بڕیاردان وه‌شێوازێگتر دریژه بێه‌نه خه‌بات خوه‌یان ، ئه‌وێش له ڕێ كاروچالاكى ئه‌ده‌بی و سیاسی و چاپ كردن گوڤار و كتاو ، ئه‌ڕا به‌رزه‌و كردن هه‌ست نه‌ته‌واێه‌تی له ناو جه‌ماوه‌ر كورد له سوریه و هه‌ر وه‌ێ خاتره ژماره‌ێگ له ڕوشنهوێره‌یل كورد له ده‌ور ئه‌میر جه‌لاده‌ت به‌در خان گرده‌و بوێن و (ئه‌میر به‌درخان)یش ، هانیان دیاد ك گرنگى زانست و ڕوشنهوێرى كه‌متر له گرنگى خه‌بات چه‌كدارى نییه ووت : (براێه‌یل كوردم ، ئه‌ى ڕوشنهوێره‌یل قاره‌مان ، شوڕش چه‌كداری و ڕاپه‌رینه‌یل نه‌توێه‌نستن ڕزه‌یل ملله‌ته‌گه‌مان یه‌ك بخه‌ن و نه‌ڕه‌سیمنه ئه‌و ئامانجه ك ئه‌ڕاێ خه‌بات كردیم ، هه‌ر وه‌ێ خاتره بایه‌د ئمڕوژه خوه‌مان وه‌زانست و ڕوشنهوێرى چه‌كدار بكه‌یم و ڕوشنهوێرى و فولوكلور خوه‌مان پێش بخه‌یم و زانیارى له باوه‌ت مێژوو خوه‌مان داشتوێمن و بیلا هه‌میشه زانست بووگه چه‌ك سه‌ره‌كیمان له وه‌راوه‌ر دوژمن)
ج ك
