دۆمەگان کيين؟
دۆمه‌گان وه‌ل دامه‌زرانن شار سلێمانی وجوود داشتنه‌و به‌شدار بوينه وه‌ل دارشمانيه‌يل دژ سوپای روسيا، وه‌ل ئه‌وه‌يشا هاوشيوه‌ی هه‌وراميه‌يل ده‌سڕه‌نگين بوينه‌و بابانيه‌يليش ريز و حورمه‌ت فريه‌يگ له‌ی هووزه نانه‌و ته‌نانه‌ت وه‌ل هه‌وراميه‌يل سنه‌يی ژن وژنخوازين فريه‌يگ له‌ناونيان بويه.
دۆمه‌گان سلێمانی خه‌ريك كڵاشچنين بوينه‌و ئه‌ڵه‌ك دروس كردنه‌و عه‌ره‌بانه‌ی دو تايه‌رييش ئه‌وان دروسی كردنه وه‌ل مه‌شكه‌و چشته‌يل تر هه‌وه‌جه‌يل ئه‌و سه‌رده‌مه. دۆم وه‌گشتی مه‌ردمانيگ ئاييندار و ئازاو چه‌ونه‌ترس بوينه‌و زوورميانيش سۆفی بوينه‌و ده‌نگيانيش خوه‌ش بويه‌‌و ده‌ف دروس كردنه‌و ژه‌نياريشی بوينه‌و له بوونه‌يل ئايينييش هه‌ميشه وجوود داشتنه‌و يه‌كيگيش بوينه له پيكهاته‌يل شار سلێمانی.
دۆمه‌گان له‌ساڵ سه‌فه‌ربه‌لك له‌شار سلێمانی خزمه‌ت خاسيگ وه مه‌ردم ئه‌و شاره كردنه‌و له راپه‌ڕين وه‌رده‌م سه‌رايش پشتگير عه‌وله سيس بوين و له خوه‌ينيشانداينه‌يل ساڵه‌يل په‌نجای سه‌ده‌ی وه‌رينيش چالاكی فريه‌يگ داشتنه.
يه‌كيگ له كوڕه‌يل ئازی ئه‌و هووزه وه‌ناو عوسمان حاجی عومه‌ر ك ناسرياگ بوی وه" عوسه دۆم" فه‌لاقه‌ی حه‌سه‌ن ساقی توركمان كرد ك مير ئه‌و سه‌رده‌مه جوور قوميسه‌ر له سلێمانی دامه‌زرانوێده‌ی و دژ خه‌ڵك سلێمانی بوی وه‌ل يه‌هووديه‌يل له وه‌خت خوه‌ينيشانداينه‌يل.
بڕيگ له دۆمه‌گان ئێڵاخ و گه‌رمه‌سير كردنه، ئمجا له‌وه‌ر جيوازكردن ئاوايه‌يل كوردستان له‌لايه‌ن رژيم به‌عسه‌و ئه‌وانيش نيشته‌جی بوين له‌ناوچه‌يل سه‌ی سايه‌ق و ناوه‌ند شاره‌گه‌يش، وه‌رده‌واميش حه‌ز له خاڵ كوتان كردنه.
ئيسه‌يش بڕيگ له‌ليان له كويچه‌يل گاوره‌يل و سه‌ركارێز و ده‌سهاڕه‌گه‌ی سلێمانی نيشته‌جيين و مه‌ردم ئاينپه‌روه‌ر و خاوه‌ن زانست فريه‌يگيش له‌ناو شه‌ريعه‌ت ئسلامی ديرن و له هه‌مان وه‌خت بازرگان و مامۆستای خاس و خوه‌ندكار له زانكۆيه‌يل و پێشمه‌رگه‌و فه‌رمانبه‌ريش ديرن و له‌گشت چين ولايه‌نه‌يليش وجوود ديرن.
مه‌ردمانيگ باوه‌ڕيان ئه‌وه‌سه ك گوايا دۆمه‌گان قه‌رقه‌ره‌ن، وه‌لێ له‌ڕاسی ئه‌يه چه‌واشه‌كاری رژيمه‌يل عراق بوين ك له‌وه‌ر ئازايه‌تييان تۆمار ناونويسی نه‌كريان ك به‌شيگ له‌ليان بترازيه‌ێد ك له‌ساڵ ١٩٥٧ تۆمار كريانه‌و ئيسه فۆرم خوه‌راك ديرن.
ماکوان کەریم
