داودخان كه‌ڵهوڕ چوين ده‌سڵات په‌يا كرد؟
شه‌فه‌ق نيوز/ ژيان سياسى داودخان ئێڵخان كه‌ڵهوڕ له‌وه‌وه ده‌س وه‌پى ئه‌كا، ك هه‌ناى باپيره گه‌وراێ(سه‌فه‌ر له‌ك)كوڕيگ ديرێد وه‌ناو عه‌بدولمحه‌مه‌د، ئى كوڕه ئه‌دێده راوێژكار كه‌ريم خان زه‌ند.
ئى عه‌بدولمحه‌مه‌ده هاوسه‌رگيرييگ ئه‌را كه‌ريم خان زه‌ند ريكخستگه، ئمجا وه گووره‌ى چه‌ن سه‌رچه‌وه‌يگ، دوياێ چه‌ن ساڵێگ عه‌لى خان كه‌ڵهوڕ كوور ئه‌دێ و كه‌س نازانێد هووكاره‌گه‌ى چه بويه، ئه‌و ماوه له شار ئه‌يوان غه‌رب - هه‌يوان بوود ك مه‌ڵوه‌ن عه‌لى خان بويه، وه‌لێ وه خاستر زانسته‌سه‌ێ جيواز بدێ ئه‌را گه‌يڵان، ك له‌و سه‌رده‌مه گه‌يڵان ئاواييگ بويچگ بويه، هه‌ر وه‌و خاتريشه كاروبار بنه‌ماڵه‌گه‌ێ وه ئه‌وڵابه‌گ كوڕى سپاردگه.
يه‌يش وه ده‌سميه‌ت سێ براى خوه‌ى پله‌و پايه‌ێ به‌رزيگ له ناوچه‌گه په‌يا كردگه‌و فاكته‌ر ده‌سڵاتدارێتى ئه‌را ئه‌سه‌د خان فه‌راهه‌م كردگه، وه‌لێ له‌وه‌ر ناكووكيه‌گه‌ێ وه‌ل زه‌ينولعابدين خان ئێڵ به‌گ كه‌ڵهوڕ، ئه‌سه‌د خان كوشيه‌ێد و بنه‌ماڵه‌گه‌ێ ك سه‌ر وه تيرى عه‌بدولمحه‌مه‌د بوين وه سه‌رۆكايه‌تى عه‌باس ئه‌سه‌د به‌گ(كوڕ ئه‌سه‌د خان)روێ كردنه ناوچه‌ێ ترساق ك ئه‌كه‌فێده دويرێ 70كم باشوور مه‌نه‌لێ له خوارگ ئاوايى دوشێخ سه‌ر وه عراق و هاومه‌رز ساڵح ئاباد سه‌ر وه ئيران، ئمجا ئه‌را ماوه‌ى(7 - 10)ساڵ له‌ورا مينێده‌و، دوياێ ئه‌وه‌يش گله‌و خوه‌ێد ئه‌را گه‌يڵان غه‌رب و له ميواندارييگ زه‌ينولعابدين خان بكوش ئه‌سه‌د خان كوشێد و وه‌و نيازيشه(سه‌يد محه‌مه‌د سه‌ليم)سه‌رۆك تيره‌ێ خاڵديش بكوشێد، وه‌لێ ته‌نيا وه لاوردن و ده‌س له‌كاركيشانه‌وه‌ى واز له‌لى ئه‌يه‌رێد.
له‌و سه‌رده‌مه ك دويا ده‌يه‌ێ سه‌ده‌ى سێنزه‌يه‌م كووچى بويه، سه‌رۆكايه‌تى تيره‌ێ خاڵدى وه عه‌باس باوگ داودخان سپاريه‌ێد و ئه‌ويش وه ده‌سميه‌ت و كوومه‌ك هووزه‌يل تر ئه‌تويه‌نێد تيره‌ێ خه‌مان و تيره‌ێ سياسيا بپه‌زنێد و بخاده‌يانه ژير ده‌سڵات خوه‌ى، وه‌يه‌يش قه‌ڵه‌مڕه‌وى و له‌وه‌ڕگايه‌يل خوه‌ى زياتر و فراوانتر ئه‌كا.
عه‌باس ئه‌سه‌د به‌گ له ساڵ(1296 يا 1298 ك)له‌لايه‌ن ميرييه‌و ده‌سگير كرياو كاروبار هووز وه داودخان سپاريا، جه‌نگ دادوخان وه‌ل تيره‌ێ سياسا فيشتر په‌ره سينێد وه شيوه‌يگ ك ئيقبال ئه‌لده‌وله‌ێ كاشانى فه‌رماندار ئه‌و سه‌رده‌م كرماشانه له‌ئاكام فراوانبوين ده‌سڵات داودخان نگه‌ران ئه‌دێ و وه‌ل تيره‌يل كه‌ڵهوڕ و سياسيا په‌لامار خاڵديه‌يل ئه‌يه‌ن ك داودخان سه‌رۆكايه‌تيى كردياد و شكه‌ست وه‌پى ئه‌يه‌رن.
فريه وه‌پى نه‌چى داودخان توڵه‌ێ ئه‌و په‌لاماره له فه‌رماندار كرماشان و تيره‌ێ سياسيا كرده‌وه‌و وه‌و شيوه‌يشه ئه‌كبه‌رخان كڵانته‌ر له مياندارييگ له‌لايه‌ن جوامير خان كوڕ داود خانه‌و كوشيه‌ێد، ئمجا وه قسه‌ێ مه‌هدى خان شيرزادێ بيجگه تيره‌ێ سياسيا، پشتكوويش دژ ده‌سڵات وه‌رگرتن داودخان بويه.
عه‌لى ره‌زا گۆده‌رزى
