جه‌نگ شوونه‌وار
عراق له‌و جه‌نگه شوونه‌وار فريه‌يگ زه‌ره‌د كرد له شوون ئه‌وه‌گ دزه‌يل تايبه‌تمه‌ند 15 خه‌زار پارچه شوونه‌وار له خاسترين شوونه‌واره‌يل موزه‌خانه‌ى عراقى دزين، ك يه‌كيگ بوى له گرينگترين موزه‌خانه‌يل جه‌هانى و مێژوويه‌گه‌يشى ئه‌چێده‌و ئه‌را ژياره‌يل وڵات ناونى دوچه‌مان و بى وينه بوى له جه‌هان.
دوياى ئه‌وه‌يش هه‌وڵ و ته‌قلايش سه‌ركه‌فتگ بوى ئه‌را هاوردنه‌وه‌ى فيشتر له چوار هه‌زار پارچه شوونه‌وار شارياگ، ك بيگومان ئه‌و رويداگه ك هه‌رچه‌نى 12 ساڵيش له‌بانى گوزه‌ر بويه، وه‌لى له هويره‌و ناچيد و زه‌خم مه‌ردم عراقى جاريگتر كولياوه له‌وه‌ختيگ ريكخرياگ ترۆيستى داعش جاريگتر شوونه‌واره‌يلى گرته ئامانج دوياى ئه‌وه‌گ له 10ى حزه‌يران 2014 ده‌س گرته بان شوونه‌واره‌يل شار موسڵ و ده‌سكرده رمانن مزگفت و په‌رسگايه‌يل ئايينى جياجياو رمانن كه‌نيسه‌يل و سزانن كتاوخانه‌و كتاوه‌يل نرخدار و دزين شوونه‌وار و ده‌سنويسه‌يل وه‌خاتر ته‌مويلكردن دارايى خوه‌ى ئه‌را جه‌نگ و بيگه ئه‌وه‌يش ئه‌نجامداين تاوان رمانن مه‌زارگه‌ى يونس په‌يامبه‌ر سڵام خودا له‌لى خاستر نيشانه‌ى دڕنده‌يى ئه‌و ريكخرياگه‌سه.
دويا تاوانيش ك ئه‌و ريكخرياگه ئه‌نجاميدا، ئه‌ويش ويرانكردن و كاولكردن شار مێژوويى نه‌مروود بوى پايته‌خت ئاشووريه‌يل ك مێژوو ده‌وڵه‌ته‌گه‌يان ئه‌چێده‌و ئه‌را سه‌ده‌ى 13ى وه‌رجه زايين، ك رووژ په‌نجشه‌ممه له 6 ئادار 2015 ئه‌نجام دريا، ك شايه‌ت يه‌يش جوور كاردانه‌وه‌يگ بويه ئه‌را په‌رده‌پووشكردن واينى له پاريزگاى سه‌ڵاحه‌دين له‌بان ده‌س هيزه‌يل چه‌كدار و رووڵه‌ى هووزه‌يل پاريزگاگه.
شار نه‌مروود مێژوويى ك له‌بان كنار دجله دامه‌زريا له باشوور موسڵ له‌ڕوى زانستيه‌و وه‌پى وتيان(كالح)ك يه‌كيگه له گرينگترين ئه‌و چوار پايته‌خته‌يل ئاشووريه ك پاشايه‌يل ئاشوورى يه‌ك له‌شوون يه‌ك پشت وه‌پى به‌سان، چوينكه سێ پايته‌خت تر داشتن ك ئه‌وانه‌يش(ئاشوور، دور شروكينو، نه‌ينه‌وا)ك له‌يه‌ن ئاشوور ناسربال دامه‌زريا له سه‌ده‌ى 9 وه‌رجه زايين(859 – 883).
ئى شاره زويتريش له‌ساڵ(612 و . ز) تويش كاولكارى هات له‌بان ده‌س كلدانيه‌يل و ميديه‌يل، ك دياره چاره‌نويسى له‌يوا بوى جاريگتر له‌بان ده‌س داعش بڕميه‌يد له 2015 له‌شوون 2388 ساڵ له‌و مێژووه.
هه‌ر وه‌و خاتريشه شوونه‌وار نه‌مروود يه‌كيگه له گرنيگترين ئه‌و شوونه‌واره‌يله له‌شوون قه‌ورسان پاشايه‌يل له ئه‌هرامه‌يل مسر، ك وه‌ل ئه‌وه‌يشا خه‌ت مسمارى له‌تى دوينرياوه‌و ده‌قه‌يل سه‌رده‌م فه‌رمانڕوايه‌يل ئاشوورى له‌تى بوى، يه‌يش بيجگه چشته‌يل تر مێژوويى ك ئيسه له موزه‌خانه‌ى بريتانى مقه‌يه‌تى له‌لى كرياگه، ئمجا جه‌نگ شوونه‌وار له‌عراق وه‌رده‌وامه‌و وه‌تايبه‌ت له شوونه‌واره‌يل موسڵ و هه‌ر له‌وه‌ر ئه‌وه‌يش بايه‌سه مه‌ردم عراق مقه‌يه‌ت ئى هه‌مه‌جيه‌ته بوون ئه‌را بان شوونه‌واره‌يل مێژوويى.
عه‌بدلزه‌هره تاڵه‌قانى
ج . أ
