من نیەزانم ک° کەێ مرم
من نیەزانم ک° کەێ مرم
یا چ° وەختێ، یاگەر له کوو
یا کام کۊه...
مانشێت
پەڕاو
سەرکەش
شاهوو
له چ° پەلێ، له چ° پاڵێ
له چ° دەروەن‌و گڵاڵێ
خۆەم نیەزانم...
من نیەزانم ک° کەێ مرم
وەفره
واسه
ئەوره
ساێه
یا بان° زەۊ کەو یەخ ناێه
یا ئاسمان بڵاچه دەێ، جار وە جارێ
واران وارێ یا نیەوارێ
خۆەم نیەزانم...
من نیەزانم ک° کەێ مرم
لەساێ زڵف° قەجەر پاچ° پرچ° کەێکوو
یاگەر له داوان° وەنێ لە سەر ئاسوو
یاگەر له پاێ زڵف° ئارفانەێ شەنێ
ک° لە سەماێ دەوریشانەێ
وە بنیاد° بەڕۊ خەنێ
خۆەم نیەزانم...
من نیەزانم ک° کەێ مرم
سروه شەنێ یاگەر شەماڵ
کەلەوا تێ یاگەر سووەیل
خەزەو جمێ یاگەر خەزان
یاگەر سامەو خۆرما پەزان
خۆەم نیەزانم...
من نیەزانم ک° کەێ مرم
شەوکیە
نیمەرووە
ئێوارەسە
یا نیمەشەو
چەوەگانم زڕناقه دەن،
یا هانه خەو
خۆەم نیەزانم...
من نیەزانم ک° کەێ مرم
لە خۆەر° گەرم° تاوسان،
یاگەر خەزان° ڕەنڰ ڕەنڰێ
له ناو زیق° وڵنڰ باخێ
یاگەر چەرداخ° بێ‌دەنڰێ
خۆەم نیەزانم...
من نیەزانم ک° کەێ مرم
له چ° ساتێ
له چ° ڕووژێ
له چ° مانڰێ
له چ° ساڵێ
له وەرماێ هڵم° دەم° کی
له قەوچی نەرم° چ° باڵێ
خۆەم نیەزانم...
من نیەزانم ک° کەێ مرم
وە باڵ بەسه لە پاێ دیوار...
یا سەر° دار، یاگەر وه شکەنجەو ئازار
یا وه گۆله له پاێ سانێ،
یاگەر له سۊک° زندانێ
خۆەم نیەزانم...
من نیەزانم ک° کەێ مرم
له پای دار° بەرز° تۊێ
ک° دڵتەنڰه بووده سازێ
تا له باوش° گەرم° کەسێ
بشکێ تەزێ، بشکێ هازێ
یا له پاێ ڕیشێ ئەنجیرێ
له چەم° چووڵ° خۆەرئاوا
یاگەر له ساێ پڵک° پیرێ
پڵک° پۊتار° دڵگیرێ
ک° تەنیاێ خۆەێا گیرێ
خۆەم نیەزانم...
من نیزانم ک° کەێ مرم
له چ° مڵک‌و سەرزەمینێ
له چ° مەرام‌و ئائینێ
مەوداێ ئەنترناسیوناڵه
یا له بان° مەرزو سنوور
هێمان قرمه، هێما قاڵه
خۆەم نیەزانم...
من نیەزانم ک° کەێ مرم
له سەردەم° چارە نۊسەیل° ڕەوانی
ک° هانه فکر° وێرانی
ک° چیمەنەیل له خەوفێان هرێز چیەرن
وە ژنەیل° خۆەرهڵات
هەڵەج هەڵەج مناڵەیل° قیچ‌و ئەڵەج
ک° ماڵێان بووده جاێر
ک° کێشتێان بووده باێر
خۆەم نیەزانم...
من نیزانم ک° کەێ مرم...
سعید عبادتیان بانان
