ده‌رد دڵێ وه‌ل خودا
شه‌وێ هێمان نه‌خه‌فت‌ۊم
چمان کڵاس هه‌فت بۊم
ئی مه‌سڵه‌ت کوردییه
له داڵگم شنه‌فت‌ۊم
(وه‌ختێ واران زه‌ۊ ته‌ڕ که‌ێ
دۆعا فره ئه‌سه‌ر که‌ێ)
دۆعا کردیم له سه‌ر بای
واران خرمه‌که‌ر بای
دۆعا کردیم ئه‌سه‌ر کرد
وا، ئه‌سپه‌گه‌ێ جل‌وه‌ڕ کرد
هه‌ر چێ ئه‌وره جه‌ما بین
لاو و واران له سه‌ر کرد
واران وارێ، برام مرد
هه‌ر چێ داشتیم وه‌لا برد
وه‌ر کرد وه ناو شارا سه‌یل
لاو که‌فته ناو گڵاڵه‌یل
هه‌ر چێ نمامه ئاو برد
هه‌ر چێ گڵاڵه لاو برد
سه‌یل دا بان مانێشته‌و
که‌فت وه‌ێ رۊا له پێشته‌و
وه‌ر کرد وه ناو ئه‌یوانا
گڕه‌ی ده‌رۊنێ کوشته‌و
واران وارێ شه‌واره
خه‌ر کاو مه‌مر وهاره
تو خوه‌شته‌و دان و که‌ێ
بیلا واران گشت بوه‌ێ
هه‌ڕه‌کان و مه‌ڕه‌کان
بار خه‌ره‌م گرده‌کان
وا هات له پێشت ئه‌ورا
کڵاوِ گشت؛ رواکان
واران وارێ خشه‌ی تیه‌ێ
خودا ها خاو مشه‌ی تیه‌ێ
واران به‌سه خوه‌ر توایم
کڵاو فره‌س سه‌ر توایم
ئه‌ڔا هه‌ر چێ ره‌حمه‌ته
ئه‌ڕا ئیمه زه‌حمه‌ته
یه‌ک ساڵ جه‌نگ و یه‌ک ساڵ سه‌یل
خاڵوو! چه‌ته له کورده‌یل؟
خه‌م پێشتمان چه‌مانه‌و
بیله‌مانه خوه‌مانه‌و
ئاو له‌ێ خواره وڵات برد
تو کردیته له‌و بانه‌و
له بان ئه‌و عه‌رشته‌و
ته‌ک دایته وه‌و فه‌رشته‌و
هه‌ر چێ دڵت توای که‌ی
هه‌ر که‌س دڵت توای به‌ی
هه‌ر که‌سێ که‌م تا فره
بویشی، ئویشی: کافره
حه‌قیش دیری زوور دیری
مێشتێ شه‌ل و کوور دیری
مه‌ردم نمه‌ک‌خوه‌رده‌تن
به‌نده‌ت نیین، به‌رده‌تن
هه‌ر که‌س لاییندارته
فێشتر بدێهکارته
دووس و برای سه‌رت نیاو
تو دی کێیی؟ خودای کاو
ئایِم نمه‌ک‌خوه‌رده‌ته
به‌نده‌ت نییه، به‌رده‌ته
مه‌گه‌ر ئه‌وه‌ڵ قه‌رار نه‌ۊ
ساگه‌ی تو بوو له رۊ زه‌ۊ
ئه‌شره‌ف مه‌خڵووقات بوو
سه‌رگوڵ کائنات بوو
ئه‌ڕا به‌تاڵته‌و بۊ
دایته ژێرێ زۊ وه زۊ
به‌یته‌ی باخ سێف و به‌ی
ئویشی: بنووڕ ده‌س له‌ێ نه‌ی
هه‌ر جا یه‌ک نه‌ونمامه
ئویشی: مه‌نووڕ حه‌رامه
ئه‌ڕا دیین نه‌نایته؟
ئه‌ن چاو ئه‌ڔا چه دایته؟
مه‌خوه، مه‌نووڕ، مه‌که، مه‌ی
وه‌ی له ده‌سِت، خودا وه‌ی
وه‌و چاوه‌یل مه‌سِته‌و
زه‌ۊ ها سه‌ر دهسِتهو
وه یه‌ک کلِگ خڕێ ده‌ی
چۊ باڵفڕنه‌ک فڕێ ده‌ی
له‌ی ناو هه‌مگه‌ی سه‌یاره
هه زه‌ۊ لیته‌و دیاره؟
له رۊ زه‌ۊیش هه ئێران؟
هه ئێرانه‌ی هه وێران؟
له ئێرانیش هه کورده‌ێل؟
هه کورده‌یل وه‌ێل و چه‌ێل؟
ئه‌سڵه‌ن ئه‌ڕا وسایته؟
گشتێ بکوش لییان مه‌ێل
ئی مه‌ردم فه‌قیره
وه دهسِتهو ئه‌سیره
هاوردییه‌و بردییه
هه ئمته‌حان کردى
دهههی شه‌س، وه بومباران
دهههی نه‌وه‌د وه واران
دهههی هه‌فتا خودکوشی
دهههی هه‌شتا ناخۆشی
له‌ی‌وا بچوو زه‌مانه
ده ساڵێ تر قڕانه
دڵم پڕه لیم مه‌گِر
سه‌رِم پڕه لیم مه‌گِر
شاعر که‌مێ که‌م دیرێ
چۊ خوه‌ت خه‌م و چه‌م دیرێ
له لی مه‌گری، حه‌ساسه
نه‌ۊیشی خودا مه‌ناسه
ده‌ێ له سه‌رێ جار جارێ
تواێ ئه‌دا ده‌رارێ
وه‌لێ فه‌قه‌ت قوڕاته
مه‌فعوول و فاعلاته
هۊچ وه بن نه‌ۊ و هۊچه‌ڵ
چۊ گرده‌کان پۊچه‌ڵ
چمان فره وه‌تمه
مه‌ر تو بخه‌یته‌م ئه‌و خوه‌م
تا دی زوان بوه‌مه ده‌م
