وه‌رده‌وامى رفانن هاووڵاتيه‌يل له‌ساى نه‌وين سزاى ياسايى
شه‌فه‌ق نيوز/ دوياى ئه‌وه‌گ چه‌ن رووژيگ وه‌رجه ئيسه هه‌فت چالاكوان مه‌ده‌نى ئازاد كريان و له‌ناونيايش خوه‌ندكاره‌يليگ زانكۆيى ك له‌لايه‌ن جه‌ماعه‌تيگ چه‌كداره‌و له به‌غدا رفياوێن و وزاره‌ت ناوخوه‌يى عراقى ئاشكراێ كرد، پرسياريگ په‌يا ئه‌دێ، ك ئه‌ويش ئه‌وه‌سه ئايا له‌وه‌رچه ده‌سڵاته‌يل ئاسايشى هه‌ميشه باس له رفاننكاره‌يل ناكه‌ن و ئازادكردن ئه‌و رفياگه‌يله چوين ئه‌نجام ئه‌گرێد وه‌بى زانستن ئه‌وه‌گ كى ها پشت ئه‌و تاوانه‌يله، يه‌يش گومانيگ له باره‌ى كزى ده‌سڵاته‌يل له وه‌رانوه‌ر ميلشيايه‌يل رفاننكار دروس ئه‌كا يا شايه‌ت ستر له‌بانيان بكريه‌ێد له‌وه‌ر خار به‌رژه‌وه‌نديه‌يل هاوبه‌ش ناونيان.
وه‌هاب ئه‌لتائى يه‌كيگه له راوێژكاره‌يل وه‌زير ناوخوه‌يى، وت: ئه‌و هه‌فت جايه‌ڵه ك رفيانه وه سه‌ڵامه‌تى ئه‌يه‌نه‌و ئه‌را ناو خيزانه‌يليان، ئه‌ويش له‌وه‌ر هه‌وڵ وه‌زير ناخوه‌يى و دوياى زه‌مانه‌تكردن كاره‌يل ئازادكردنيان له‌ڕى تيميگ تايبه‌ت.
ئه‌لتائى چشته‌يل تر په‌يوه‌س وه ناسنامه‌ى ئه‌و رفياگه‌يله يا چوينێتى ئازادكردنيان باس نه‌كرد له ناڕاس به‌غداى پايته‌خت و نزيك له‌و شوونه ك له‌تى رفياوێن.
زويتريش ئه‌فسه‌ريگ تر له وزاره‌ت ناوخوه‌يى وت: ئه‌و چه‌كداره‌يل نه‌ناسرياگه سه‌ياره‌يگ وه‌پيان بويه‌و ده‌مه‌و شه‌وه‌كى زوى بويه‌و هه‌فت كه‌س رفاننه‌و له‌ناونيانيش خوه‌ندكاره‌يليگ زانكۆيى وجوود داشتنه‌و تائيسه‌يش چاره‌نويسيان نه‌زانرياگه.
جاسم ئه‌لحلفى ك يه‌يش چالاكوانيگ مه‌ده‌نيه‌و يه‌كيگه له سه‌ركرده‌يل خوه‌ينيشانداين دژ گه‌ناته‌كارى ئه‌را(فرانس پرێس)وت: له رووژ 8 ئايار له سه‌عات يه‌ك و نيم دوياى نيمه‌شه‌و جه‌ماعه‌تيگ چه‌كدار هه‌فت خوه‌ندكار چالاكوان رفاننه له خوه‌ينيشانداينه‌يل ئاشتيانه له ناو شوقه‌گه‌يان له ناوچه‌ى به‌تاوێن له ناوڕاس به‌غداى پايته‌خت.
دوياى رووژيگيش له‌و روێداگه، سه‌ركردايه‌تى فه‌رمانده‌يى به‌غدا له به‌ياننامه‌يگ جه‌خت كرد و وت: هيزه‌يل ئاسايشى و هه‌وڵ هه‌واڵگرى وه‌رده‌وامه له گه‌ردين و وشكانن ئه‌را ده‌رخستن چاره‌نويس ئه‌و چالاكوانه‌يل مه‌ده‌نيه ك له ناوچه‌ێ به‌تاوێن رفيانه.
حه‌يده‌ر عبادى سه‌رۆك وه‌زيره‌يل عراقييش هه‌مان رووژ ده‌مه‌و ئيواره داواى ئازادكردن ئه‌و جايه‌ڵه‌يله كرد و كرده‌وه‌يل رفانن وه تاوانيگ خه‌ته‌رناك و به‌شيگ له كرده‌وه‌يل ترۆريستى تاريف كرد.
ئه‌و چالاكوانه‌يل خوه‌ندكاريشه له زانكۆيه‌يل به‌غدا، خه‌ڵك پاريزگايه‌يل به‌سره و زيقارن له باشوور عراق.
چه‌وديره‌يليش باوه‌ڕيان ئه‌وه‌سه ك كرده‌وه‌يل ئازادكردن رفياگه‌يل وه شيوه‌يگ نائاشكرا ئه‌نجام ئه‌گرێد، چوينكه ئاشكراى لايه‌ن رفاننكار ناكريه‌ێد وه ئه‌وه‌گ بخريه‌ێده ده‌س دادگاو سزا بدريه‌ێد و يه‌يش ره‌وايى ئه‌ياده كرده‌وه‌يل رفانن له‌ساى نه‌وين سزاى ياسايى و كزى ده‌وڵه‌ت له روى وه‌ڕوى بوينه‌وه‌ى ميليشيايه‌يل.
وه‌ل ئه‌وه‌يشا جيوه‌جيكاره‌يل كرده‌وه‌ى رفانن له عراق پايه‌ى به‌رزيگ له ريكخستن و چه‌كدارى ئه‌يه‌رنه كار وه‌ل له‌وه‌ركردن ره‌نگ يه‌كپووشى و سه‌ياره‌يل ك فريه‌جار چه‌ته‌يليگ نه‌يرنه‌ى، وه‌لێ ميليشيايه‌يل له‌لى ديرن.
فريه‌جار كاره‌يل رفانن وه ئاشكراو له‌وه‌رچه‌و مه‌ردميش ئه‌نجام ئه‌رديه‌ێد، ك يه‌يش بويه‌سه مايه‌ێ پرسيار له‌بان رۆڵ هيزه‌يل ئاسايشى وه‌تايبه‌ت له شاريگ جوور به‌غدا ك زوورم ناوچه‌يله كه‌فتنه‌سه ژير چه‌وديرى تون ئاسايشى و ده‌يان هه‌زار سه‌رباز و پياوه‌يل پۆليس له‌تيان وجوود ديرن.
ئمجا چه‌وديره‌يليش باس له‌وه ئه‌كه‌ن ك مه‌سه‌له‌ى رفانن وه شيوه ئه‌نجام ئه‌گرێد، يه‌كه‌ميان ماددى قانجازكردن ك مينێده بان به‌رژه‌وه‌ندى دارايى جوور فديه ئه‌را ئازادكردن رفياگه‌يل و دويه‌ميش له‌وه‌ر هووكاره‌يل تايفى و ئنتقامكردنه له‌ساى روێداگه‌يل سياسى ژير په‌رده‌ى به‌شبه‌شايه‌تى تايفى.
جاسم ئه‌لحلفى چالاكوان ئويشيد: ئه‌و جايه‌ڵه‌يله ك رفيان، دژ گه‌ناته‌كارى و گه‌ناته‌كاره‌يل و ريڕه‌و به‌شبه‌شايه‌تى تايفى بوينه‌و داواى ده‌وڵه‌تيگ مه‌ده‌نيانه كردنه.
ئه‌لحلفى باس له‌وه ئه‌كا ك رفانن ئه‌و جايه‌ڵه‌يله له‌وه‌ر ئه‌وه‌سه ئازادى راده‌رخستن وه‌رته‌نگه‌و بكريه‌ێد و ترس له دڵ مه‌ردم بكاڵن تا واز له خوه‌ينيشانداين بارن، وه‌لێ ئه‌وانه خه‌ياڵيان خاوه‌و ئى كيشه‌ى نيشتمانيه وه‌رده‌وامه‌و ئى كاره‌يل خوه‌ينيشانداينه فيشتره‌و ئه‌دێ ئه‌را ره‌سين وه ئامانج.
هه‌ر له‌وه‌ر ئه‌وه‌يش به‌غداو شاره‌يل تر خوه‌ينيشانداين هه‌فتانه له‌تيان ئه‌نجام ئه‌دريه‌ێد ئه‌را ره‌ته‌وكردن ديارده‌ێ گه‌ناته‌كارى ك كه‌رته‌يليگ فراوان گرته‌سه‌وه‌و رۆڵ گه‌ورايگ ديرێد له ده‌ركه‌فتن جه‌ماعه‌ته‌يل چه‌كدار و په‌يابوين بيكارى و نه‌وين خزمه‌تگوزارى له عراق.
