ئاماده‌كارى ئه‌را جه‌نگ موسڵ
له‌ى باوه‌تيشه‌و، ئه‌سيل نوجێفى پاريزگار وه‌رين نه‌ينه‌واو سه‌ركرده‌ى حه‌شد نيشتمانى ئاماژه وه ئه‌وه كرد ك كه‌مى چه‌ك وه‌رده‌وامى ئه‌را جه‌نگ نانويسێد و جه‌خت له‌وه‌يش كرد ك جه‌نگ ته‌مام نادێ و له‌وه‌رجه ره‌سين ده‌سميه‌ت و هيزه‌يل عراقييش ده‌س وه‌پى ئه‌كا ك بڕياره ره‌سينيان ئه‌را ناوچه‌ى مه‌خموره‌و ده‌س وه‌پى بكا.
بيجگه حه‌شد نيشتمانى هيزه‌يل پێشمه‌رگه‌يش به‌شدارى له ئازادكردن شاره‌گه ئه‌كه‌ن وه پشتگيرى هيزه‌يل هاوپه‌يمان ناوده‌وڵه‌تى وه‌تايبه‌ت ته‌ياره‌يل جه‌نگى ئه‌مريكى.
وه‌ل ئه‌وه‌يشا رووژنامه‌ى شه‌رقولئه‌وسه‌ت له‌زووان نوجێفى ئه‌وه ده‌رخست ك پارت كارگه‌ره‌يل كوردستانيش نياز به‌شدارى له روى وه‌ڕوى بوينه‌وه‌ى ريكخرياگ ترۆريستى داعش ديرن له‌وه‌ر هووكاره‌يليگ ناديار، يه‌يش ماناى ئه‌وه‌سه ك شايه‌ت قاپى روى وه‌ڕوى بوينه‌وه‌ى سه‌ربازى وه‌ل توركه‌يل واز بكا.
ئمجا وه‌گووره‌ى وجوود زانياريه‌يليگ ئه‌وه ده‌ركه‌فێد ك كرده‌وه‌يل ئازادكردن شار موسڵ دويا ناكه‌فێد له‌شوون 10ى ئادار ئاينده.
سه‌رچه‌وه‌يگ ئاگاداريش ئه‌وه ده‌رخست و وت: ئه‌و هيزه‌يل عراقيه ك بڕياره به‌شدارى بكه‌ن له جه‌نگ موسڵ پيكهاتنه له تيم 15 و هه‌ردوگ ليواى 71 و 72 له پۆليس ناوه‌ندى، يه‌يش له‌وه‌ختيگ ئى هيزه‌يله به‌شدارى له هويچ جه‌نگيگ نه‌كردنه ته‌نانه‌ت تائيسه‌يش، ك يه‌يش ماناى ئه‌وه‌سه وه ته‌مامى ئاماده‌ن و برياره له مه‌خمور جيگير بوون تا كرده‌وه‌يل ئازادكردنن ديم چه‌پ ده‌س وه‌پى بكا سه‌ره‌تا له شه‌رقات و قه‌ياره‌و يه‌يش خسته‌ڕوى ك كار جيوازكردن ئى هيزه‌يله ئه‌را ئه‌و شوونه‌يله سه‌خته له‌وه‌ر نه‌وين ڕى راسه‌وخۆ له باره‌گايه‌يليانه‌و له يه‌غدا ئه‌را ئه‌و شوونه‌يله و هه‌ر وه‌و خاتريشه وه شيوه جيواز ئه‌كريه‌ن، يه‌كه‌ميان له‌ڕى ته‌ياره‌يل و دويه‌ميش له‌ڕى ره‌تڵه‌يل سه‌ربازى ك ڕى ئه‌گرنه وه‌ر ئه‌را پاريزگاى سلێمانى و دوياى ئه‌وه‌يش ئه‌را هه‌ولێر و كه‌ركووك و مه‌خمور.
هه‌ر له‌وه‌ر ئه‌وه‌يش ئوسامه نوجێفى سه‌رۆك ئئتلاف مته‌حدون جه‌خت له‌وه كرد ك جه‌نگ موسڵ هه‌وه‌جه وه به‌شدارى حه‌شد شه‌عبى نه‌يرێد.
نويسينگه نوجێفى له به‌ياننامه‌يگ له‌وه‌خت ديدارى وه‌ل باڵوێز فه‌ره‌نسى له عراق وت: جه‌نگ ئازادكردن موسڵ هه‌وه‌جه وه ئاماده‌كارى گه‌ورايگ ديرێد و له‌وانه‌يش زيايكردن شماره‌و هه‌وه‌جه‌يل حه‌شد نيشتمانى ك پيكهاتنه له رووڵه‌يل نه‌ينه‌وا تا نه‌خش بنه‌ڕه‌تى داشتوون له ئازادكردن و هاوردنه‌وه‌ى خاك، يه‌يش بيجگه به‌شدارى سوپاى عراقى و هيزه‌يل پێشمه‌رگه‌و هاويه‌يمان ناوده‌وڵه‌تى.
له‌باره‌ى نه‌خش حه‌شد شه‌عبييش، نوجێفى وت: سروشت جه‌نگ موسڵ و تايبه‌تمه‌نديه‌يلى هه‌وه‌جه وه به‌شدارى حه‌شد شه‌عبى ناكا تا ريكخرياگ ترۆريستى داعش كارت تايفى نارێده كار.
له‌ى روييشه‌و هوشام ئه‌لهاشمى شاره‌زاى ئاسايشى جه‌خت له‌وه كرد و وت: جه‌نگ موسڵ وه دو قوناغ ئه‌نجام ئه‌دريه‌ێد، يه‌كه‌ميان له ناوچه‌ى مه‌خموره‌و ده‌س وه‌پى ئه‌كاو يه‌كه‌م ريككه‌فتن به‌رز سه‌ربازى له‌ناونى هيزه‌يل پێشمه‌رگه‌و هيزه‌يل ناوه‌ندى ئه‌دێ، ك ئى ريككه‌فتنيشه له وه‌خت دويا سه‌ردان ه‌گه‌ى نه‌يچێروان بارزانى ئه‌نجام دريا وه‌ل وه‌رپرسه‌يل حكومه‌ت ناوه‌ندى له به‌غدا.
ئه‌لهاشمى هه‌ميش وت: قوناغ دويه‌م له ئازادكردن موسڵ له خود موسڵه‌و ئه‌دێ له‌لايه‌ن سه‌ركردايه‌تى فه‌رمانده‌يى نه‌ينه‌وا وه به‌شدارى حه‌شد نيشتمانى ك له‌ڕاسى پيكهاتنه له چوار حه‌شد، يه‌كه‌ميان ئه‌و حه‌شده ك ئه‌سيل نوجێفى سه‌ركردايه‌تى ئه‌كاو ريككه‌فتن ته‌ماتميگ وه‌ل توركه‌يل ديرێد و دويه‌ميش حه‌شد سه‌بعاوى و لهێبى و ريككه‌فتنه وه‌ل پێشمه‌رگه‌و سێيه‌ميش حه‌شد فه‌رمانده‌يى نه‌ينه‌وا ك راسه‌وخۆ له‌لايه‌ن سه‌ركردايه‌تى فه‌رمانده‌ييه‌و سه‌رپه‌رشى ئه‌كريه‌ێد، وه‌ل دويره‌وخستن حه‌شد شه‌عبى.
ئه‌لهاشمى باس له‌وه‌يش كرد ك گشت ئى كرده‌وه‌يله وه ريككه‌فتن وه‌ل حكومه‌ت عراقى و حه‌يده‌ر عبادى سه‌ركرده‌ى گشتى هيزه‌يل چه‌كدار ئه‌نجام ئه‌گرێد ته‌نيا توركه‌يل نه‌ود ك ريككه‌فتن وه‌ليانا نيه‌و ره‌زامه‌نى له‌بان به‌شداريكردنيان نه‌كرياگه، يه‌يش له‌وه‌ختيگ ك نزيكه‌ى 250 سه‌رباز ديرن.
