كى له‌بان له‌هویره‌وبردن نه‌فتپاڵوو (وه‌ند) وه‌رپرسه؟
نه‌فتپاڵووه له‌كووتایى بیسه‌یل سه‌ده‌ى وه‌رین دامه‌زریا له‌ناوچه‌ى خانه‌قى ، له‌هه‌مان وه‌خت ئه‌و نه‌فتپاڵووه گشت ناوچه‌ى خانه‌قى و ده‌روه‌رى ئاڵشت كرد ئه‌را ناوچه‌یگ خه‌یر و پڕ له‌به‌ره‌كه‌ت ، بیگومان ئه‌ویش له‌ئه‌نجام وه‌كارخستن شماره‌ى فره‌یگ له‌مه‌ردم ناوچه‌گه ك له‌و نه‌فتپاڵووه دامه‌زریان و كه‌فتنه كاره‌وه ، ئه‌یه بیجگه ئه‌وانه‌ك ده‌سه‌و كاره‌و بوین له نه‌فتخانه‌و ئداره‌و شوونه‌یل تر و محه‌ته‌ى شه‌مه‌نده‌فه‌ر خانه‌قى ك له‌ڕى ئه‌و محه‌ته‌وه به‌رهه‌م نه‌فتى له‌نه‌فتپاڵوو (وه‌ند)ه‌وه جیواز بویاگ ئه‌را گشت شوونه‌یل عراق .
له‌لایگ تره‌وه ، هه‌ر وه‌ل سه‌ره‌تاى دامه‌زرانن نه‌فتپاڵووه‌گه‌ى وه‌ندا ، ماڵ و خانگیش ئه‌را كارگه‌ر و وه‌زیفه‌كاره‌یل دروس كریا له‌نزیك مه‌سفاگه ، ئه‌یه بیجگه دروسكردن شوونه‌یل خوه‌ش وه‌خت وه‌سه‌ربردن و بازاڕ سه‌رده‌میانه و خوندگاو چشته‌یل تر ، ئمجا له‌وه‌خت خوه‌ى ئداره‌ى نه‌فتپاڵووه‌گه خزمه‌تگوزارى فره‌یگیش پیشكه‌ش كرده وه‌زیفه‌داره‌یلى جویر دروسكردن ده‌واخانه ئه‌ڕایان و سه‌یاره‌ى جیوازكردن كارگه‌ره‌یل و مناڵه‌یلیان ئه‌را شار ، وه‌ل ئه‌وه‌یشا كاره‌با ئه‌ڕایان ده‌سه‌وه‌ر كریا و ئاو خواردن پاك و له‌تاوسانیش یه‌خ دیانه پیان وه په‌تى .
له‌ڕاسى ئه‌و ماوه بایه‌سه وه‌پى بویشیه‌یگ ماوه‌ى ته‌ڵایى له‌ژیان خانه‌قى و ژیان ئه‌وانه‌ك له‌و پرووسه‌یل نه‌فتیه كار كردیان ، وه‌لى دویاخر ئه‌وه بوى ك حكوومه‌ته‌یل یه‌ك له‌شوون یه‌ك كه‌فتنه ده‌ركردن وه‌زیفه‌كاره‌یل و كارگه‌ره‌یل كورد وه مه‌هانه‌ى جیوازكردنیان ئه‌را به‌غدا له‌وه‌ر خاتر وه‌كارخستن نه‌فتپاڵووه‌گه‌ى دۆره له به‌غدا ، دى وه‌و جووره له‌وه‌وه ده‌سكریا مه‌سه‌له‌ى ته‌هجیر و ته‌عریب ك ده‌سڵاته‌یل دكتاتۆرى ئه‌نجامى دان ، نه‌ك هه‌ر ئه‌وه‌یش ، به‌ڵكوو نه‌فتپاڵووه‌گه لاورد و گشت ئه‌و ده‌زگایه‌یلیشه ك په‌یوه‌س بوین وه‌پیه‌وه‌و ته‌نانه‌ت ئه‌و خه‌ت ئاسنین شه‌مه‌نده‌فه‌ریشه ك به‌غدا به‌سا خانه‌قیه‌وه نه‌یشته‌ى و هه‌رچى پاشمه‌نده‌ى ئه‌و كومپانیایه‌یله مه‌ندویگه‌وه جویر مه‌زاد فرووشته‌ى مه‌ردم ، دى وه‌و جووره ئه‌و نه‌فتپاڵوو وه‌نده وه‌خوه‌ى و هه‌رچى خانگ و شوونه‌یلیه‌وه بویه بیاوان چووڵیگ و بیجگه بنجگ و دڕگ هویچ تر له‌تى نیه . ئیسه‌یش له‌شوون رمیان دكتاتۆر و هاتنه‌وه‌ى مه‌ردم ڕه‌سه‌ن خانه‌قى ئه‌ڕا شوونه‌یل خوه‌یان و ئه‌را بان زه‌وى و زاریان ئومید فره‌یگ هه‌س ده‌وڵه‌ت سه‌رله‌نوو ئه‌و نه‌فتپاڵووه دامه‌زرنیگ له‌وه‌ر خاتر ئابوورى ناوچه‌گه و هه‌ر له‌وه‌ر ئه‌وه‌یش ده‌وڵه‌ت ئاشكراى ئه‌وه كرد ك چه‌نه‌ها نه‌فتپاڵوو تازه‌ى تر له‌سه‌رانسه‌ر عراق دامه‌زرنیگ و له‌وانه‌یش نه‌فتپاڵوو (وه‌ند).
