رێککەفتنەگە گریەبەس جیوەجیکردنە
![رێککەفتنەگە گریەبەس جیوەجیکردنە](https://media.shafaq.com/media/arcella/1602674909866.jpg)
2020-10-14T11:29:06+00:00
بەڵکم ئەوەیگ لەبانی رێککەفتن لەناوبەین حکومەت هەرێم و حکومەت بەغداد، وەڕاسی رێککەفتنیگ مێژوویە، ک هیچ حکومەتیگ ئەرا چەن ساڵیگ گوزەیشتە توانای جیوەجیکردنی نەیاشت، لە دویای دانوستانەیلیگ ماڕاسۆنی وەردەوام ئەرا چەن مانگیگ، تا واژوو بەندەیلی کریا ک لەبانی رێککەفتن بویە، وە ئامادەبوون نۆێنەر نەتەوە یەکگرتووەکان و نۆێنەر کۆتای ئەیزیەگان لە پەرلەمان عراق و نۆێنەرەیلیگ لە حکومەت هەرێم وەبەغداد، و رێککەفتنەگە تەنیا لەبان قاقەز مینێد وگریەبەسە وە جیوەجیکردنی وەراسی لەبان زەوی، تا وەگورەی میکانزمیگ وەهەماهەنگی وەگەرد حکومەت هەرێم کوردستان لەبان رێکبکەفن وبکەفێدە ئاست خوەی.
و ئەوەنە لە بەندەیل رێککەفتنەگە راگەیانن ، تا بەشیگ لە لایەنەگان دەنگ بەرزەوکردن تا هەڵوێست رەتکردنیان دژوە رێککەفتنەگە ئاشکرا بکەن، وە دەسپیچگ ئەوە ک سڵایان نەکریاگە، و بەشیگ لەلیان دویرەو خریانە، و لە بەرژەوەنی کەسایەتی خوەیان ئی دەنگە بەرزەوکردن ، دویای ئەوەگ قسەکەر وەناو موستەفا کازمی سەرۆک وەزیران راگەیان ک خوەی سەرپەرشتیاری رێککەفتنیگ مێژووی کرد، پاڵپشتی دەسەڵات حکومەت فیدڕاڵی لە شەنگال وەگورەی دەستور کەێد ، لە ئاست ئیداری و ئەمنی، و کۆتایی وە زاڵبوین کۆمەڵە بیگانەگان تیەرێد.
ئی رێککەفتنە زەمینەسازی ئەرا ئاوەدانکردنەوەی شارەگە کەێد، و هاتنەوڵی خەڵکە نەهامەتدیەگانی وەتەواوی، وە هەماهەنگی وەگەرد حکومەت هەرێم کوردستان.
لە لایبگ تر، شەنگالیەگان مزگانی وەرگردن لە راگەیانن رێککەفتنەگە، و جوور بڕیاریگ وەرەو ریە راسەگە دانانەی، و راسەوکردن کارە هەڵەگان و رەوشە ناگونجایەگان ک شارەگە ئەرا چەن ساڵیگ وەخوەی دی، تا وەوە گریەی ئاوارەیی بکریەیدەو و هەمیش ئاسۆەگان دویارووژ وازەو بوون، تا شەنگال ئەرا جار جارانیی بچوودەو، جور شاریگ پێکەوەژیانی، و مافەکان ئەرا خاوەنەیلیان بانەو، دویای داگیرکردنی لەلایەن توندڕەوترین ریخریاگ لە مێژوو نوو، و ئەوەگ لەلی پەیا بوی لەبان خەڵک شەنگال وەگشتی و وەتایبەتی باس برا ئەیزیدیەگان کەم ک کەفتنە وەر ناشرینترین چینەیل کوشتن لەبان شناسنامە و ئەشکەنجە و سەرگەردانی و رفانن و کویلەکردن و دوێەت فرووشتن لە بازاڕەیل نخاسە، و بیسەروشوون کردن سەدان لەلیان تا ئی رووژە، وەشیوەیگ دڵتەزین و وەپێچەوانەی گشت رسووم و کەلتورە کۆمەڵایەتیەگان، و پێشێلکردن گشت بنەمایل ئاینە ئاسمانیەگان و باوەڕە ئایینیەگان.
ئەراوە بایەسە وەزوی جیوەجی بەندەیل رێککەفتنەگە لەبان راسی زەویە تاڵەگە لە شار شەنگال بکریەێد.