ئه‌وان ياد مه‌زڵوميه‌ت له‌بان كورد زياێ ئه‌كه‌ن
سوبحى ساڵه‌يى/ به‌شيگ له ره‌ساننكار و سياسى و نويسه‌ر و رووژنامه‌نويسه‌يل عه‌ره‌ب له عراق، ئه‌را ماوه‌ى ساڵه‌يليگه وه‌رده‌وامن له خستنه‌ڕوێ هوير و ڕا و ديد و ئه‌ڕاى چوين و ئامار و شماره، ك له‌تى باس له باس مه‌زڵوميه‌ت ك هاته تويش ئاده‌ميزاد كورد زياێ ئه‌كريه‌ێد، ك ئه‌و هه‌وڵه‌يليشه ئه‌چێده هه‌فت روێ:
يه‌كه‌م: سه‌رقاڵكردن ئاده‌ميزاد كورد وه مه‌سه‌له‌يليگ لاوه‌كى ك دويريه‌و ئه‌خا له زه‌ره‌ده هه‌ميشه‌ييه‌گه‌ى وه‌ل عه‌ره‌ب له عراق، ئه‌و هاوبه‌شى زووره‌ملييه وه‌رجه 2003 و بژارده‌ييه دوياى 2003 و قه‌بولكردنى وه خه‌ڵه‌تانن خاكه‌يل كيشه‌يل له‌سه‌ر.
دويه‌م: شيوانن هزر ده‌روينى راسكانى كورد ك روێ وه‌ره‌و سه‌ره‌وه‌خوه‌يى ئه‌كا، ئه‌ويش له‌ڕێ دقه‌تكردن له‌بان قسه‌و ره‌فتار كه‌سه‌يليگ ك زياتر له 7% له ريژه‌ى كوردستانيه‌يل نين، و مه‌يل راسكانى زياتر له 93% له مه‌ردم كوردستانى فه‌رامووش كردنه ك ده‌نگ له به‌رژه‌وه‌ندى سه‌روه‌خوه‌يى و جيابوينه‌وه له عراق دان له‌و راپرسييه ك له ئه‌يلوول 2017 ئه‌نجام دريا.
سێيه‌م: رازاننه‌وه‌ى روخسار ناشيرين حكومه‌ته‌يل يه‌ك له‌شوون عراق و په‌رده‌پووشكردن زوڵم و خراوه‌كارى سياسى و ئدارى و ئابوور و سه‌ربازى و كۆمه‌ڵايه‌تييان و سه‌رپيچيكردن وه‌رده‌وام له مافه‌يل و ئازاديه‌يل ئاده‌ميزاد كورد.
چواره‌م: ره‌سانن په‌يامه‌يليگ ئسپات ئه‌وه ئه‌كا ده‌سڵاته‌يل له به‌غدا سه‌ربار نيگه‌رانى و تويشهاتنيان وه قه‌يران و ئاڵشتكردنيان وه كوده‌تا يا له‌ڕێ هه‌ڵوژاردنه‌يل و تويشهاتن بڕيگى وه پاكسازيه‌يل سياسى يا لاشه‌يى، دادگه‌ر بوينه له زوڵمه‌يليان له‌گشت عراقيه‌يل، يه‌يش له‌وه‌ختيگ نادادگه‌رى ده‌سڵاته‌يل عراقى وه‌رانوه‌ر وه‌كورد له‌لاى گشت كه‌سيگ ئاشكراس، جوور راسيه‌يل هاتن جومعه دوياى په‌نجشه‌ممه‌و جه‌ژن ره‌مه‌زان دوياى مانگ ره‌مه‌زان و رووژ له دوياى شه‌و.
په‌نجه‌م: هاوردنه‌وه‌ى مه‌هانه له هه‌وڵه‌يل به‌ش كورد، وه ريگرى له كلكردن مووچه‌يل پێشمه‌رگه‌و كارمه‌نده‌يل و خانه‌نشينه‌يل هه‌رێم كوردستان و نه‌داين هه‌قده‌س جفتياره‌يل له ساڵ 2014ه‌وه و ته‌كان نه‌داين وه‌رانوه‌ر هه‌ڵمه‌ته‌يل ته‌عريب و ئاڵشتكارى ديموگرافى و ئدارى و هه‌وله‌يل زاڵبين له‌بان خاكه‌يل كورد له ده‌ورگرد كه‌ركوك و ئالشتكردن گه‌ورا كارمه‌نده‌يل كورد وه عه‌ره‌ب و فه‌رامووشكردن كاره‌يل تر فريه‌يگ و هه‌قه‌يل مرۆيى و سياسى له‌و په‌ڕى گرنگييه.
شه‌شه‌م: وه‌يادخستن كورد له مه‌سه‌له‌ى ئه‌وانه‌گ هه‌وڵ رمانن و ئاڵشتكردن حكومه‌ته‌يل سته‌مكار و ناوزڕ دان وه‌رجه 2003، ك بڕيگ له‌ليان رميان و بڕێگيانيش ئاڵشت كريان، ئه‌ويش وه ئه‌وه‌گ ئو چينه‌يله ك قورتار بوون وه روخساريگ تر ئه‌يه‌نه‌و ئه‌را مه‌شقكردن هه‌مان ريڕه‌و، به‌ڵكوو فريه‌جار زياتر و وه‌شيوه‌يگ خراوتر.
هه‌فته‌م: جه‌ختكردن له‌وه‌گ گومبويه‌يل له ده‌رياى دژايه‌تى كورد ئه‌را ماوه‌ى ده‌يان ساڵ، مه‌يل يا نياز پاك نه‌يرن ئه‌را چاره‌سه‌ركردن كيشه‌يل هه‌ميشه‌ييان و ناخوازن پابه‌ند بونن وه ده‌ستوور و حاكم له به‌غدا چ ئسلامى يا نه‌ته‌وه‌يى يا به‌عسى يا ره‌جعى يا ته‌قه‌دومى سه‌ر وه ئه‌جنداى ده‌ره‌كى دژ وه كوردن و گاميگ جدى نه‌نانه له‌وه‌ر خاتر كووتاييهاوردن وه موسيبه‌ته‌يل و باروده‌خ دڵته‌زن ك گشت عراقيه‌يل ئه‌را ماوه‌ى ده‌يان ساڵه وه‌پيه‌و ناڵنن، وه‌تايبه‌ت دوياى ساڵ 2003.
وه‌و خاتريشه كورد ماف خوه‌يه له ياد ئه‌و مه‌زڵوميه‌ته زياى بكا ك ده‌رهه‌قى ئه‌نجام دريا، مادام كرده‌وه‌ى نه‌ياره‌يل ئه‌راى ماناى هويچ سه‌ركه‌فتنيگ نايه‌ێد له‌هويچ شيوه‌يگ و رويداگ تازه نيه و مادام نائاشتيخوازه‌يل له‌ناونى خوه‌يان و وه‌ل خوه‌يان و ئه‌وانه‌گ هه‌ڕه‌شه‌ى خنيكان كريانه له ده‌رياى قه‌يران، وه‌رده‌وامن له دروسكردن قه‌يران ئه‌را هه‌رێم كوردستان وه‌بى هويچ پيشكه‌فتنيگ و مادام هه‌نارده‌ى كيشه‌يل ئه‌را كوردستان وه‌رده‌وامه، وه‌تايبه‌ت ئه‌را ئه‌و ناوچه‌يله ك هانه ده‌يشت ئداره‌ى حكومه‌ت هه‌رێم، ك هيزه‌يل عراقى ناتويه‌نن وه‌رگه‌ى وه‌رپرسيارێتيى بگرن وه‌ل وجوود داعش و ميليشيايه‌يل چه‌كدار ك رۆڵ ئاڵشت ئه‌كه‌ن وه‌شيوه‌يگ عه‌فوى و جارجاريگيش وه ئه‌نقه‌ز.
