ئه‌رك نه‌ته‌وايه‌تی
. زوورم عراقيه‌يل وه‌ناو موسڵمان ده‌ميان ئه‌وه نيه‌گريگ بويشن (حكوومه‌ت عراق فيدراڵی يه‌كگرتگ) ، ك هه‌رچه‌نی ئی ناوه وه‌ئاشكرا له‌ناو ده‌ستوور عراق فيدراڵ يه‌كگرتگ جيگير بويه .
زوورم برايه‌يل عراقی وه‌ناو موسڵمان له‌عراق ئاماده نين سه‌رشماری گشتی له‌سه‌رانسه‌ر عراق بكريه‌يگ ، ك ٢٢ ساڵه ئه‌نجام نه‌درياگه‌و خواستيگه ئه‌را گشت عراقييگ ، ك ته‌نيا له‌وه‌ر خاتر ئه‌و مه‌رامه ك كورد له كه‌ركووك و ناوچه‌يل داوڕياگ تر هه‌ريم كوردستان زه‌ره‌د بكه‌ن . وه‌ل ئه‌وه‌يشا له‌ناو ماڵ خوه‌مانيش مه‌ردمان خوه‌يفرووش و لايه‌ن سه‌ر وه دوشمنه‌يل كورد وه‌ئاشكرا كريه‌نه‌دی ، وه‌و مه‌عنا ك داره‌گه‌مان كرمه‌گه‌ی له خوه‌يه .
بيگومان هووشياری نه‌ته‌وه‌يی كزه‌و گيان خودپه‌رسی وه زوورم شيوه‌يله‌وه زاڵه له‌بان هويرو هووش زوورممان ، هه‌ر له‌وه‌ر ئه‌وه‌يش ئه‌گه‌ر دڵسووز و يه‌كگرتگ و بته‌و نه‌ويمن ، ئه‌وه ده‌سڵات دوشمنه‌يلمان له‌بانمان زاڵ بووگ و دوباره له‌مه‌يدان سياسی كه‌نه‌مانه ده‌يشت و هووكار سه‌ربازی وه‌لمانا تيه‌رنه‌كار و بايه‌سه وه نان و ئاويگ رازی بويمن . له‌وه‌ر ئه‌وه ئيمه‌ی هاووڵاتيه‌يل كوردستان بايه‌سه وشيار بويمن و بويشيمنه سه‌ركرده‌و رابه‌ره‌يل ريزدارمان : ئيمه هويچ له‌ليدان نيه‌توايم و ئاماده‌يم زياتر وه‌رگه‌ی ناخوه‌شی و ژان وئازار و نه‌داری بگريم له‌وه‌ر خاتر سه‌ركه‌فتن يه‌كجاری نه‌ته‌وه‌گه‌مان وه مه‌رجيگ : وجوود لوجنه‌يگ مه‌رجه‌ع يه‌كگرتگ كوردی وه‌مه‌رج گونجياگ ئه‌را داناين سياسه‌ت وڵات و مقه‌يه‌تيكردن ئاسايش نه‌ته‌وه‌يی و له‌هه‌مان وه‌خت وه پيرووزيه‌وه ريز له‌لی بگيريه‌يگ و گشت تاكيگ كورد پابه‌ند بوون وه بڕياره‌يلی .
ئه‌ركيگ دينی و نه‌ته‌وه‌يی و نيشتمانپه‌روه‌ری گشتيه له‌بان وه‌رپرسه‌يلمان وه‌رجه هاووڵاتيه‌يلمان ، ك خوه‌يان وه گه‌وه‌را نه‌زانن و به‌رژه‌وه‌نديه‌يل وه‌رته‌نگ و تاكه كه‌سی نه‌كه‌نه ئامانج و به‌رژه‌وه‌نديه‌يل گشتی له‌هويره‌و نه‌وه‌ن و عاقڵانه‌تر و دويرتر ته‌ماشا بكه‌ن و مقه‌يه‌ت بوون له‌وه‌ك دوشمن جاريگتر زه‌فه‌ر له‌ليمان نه‌وه‌ن و ئه‌زمه‌ه‌ن چه‌ن ساڵه‌مان وه‌تاڵان بچووگ .
ئمڕوو بايه‌سه كورد يه‌كتر قه‌بوول بكه‌ن و دی نه‌فامی و خودپه‌رسی و دوياكه‌فتگی بخه‌نه ئه‌ولاوه‌و هه‌وڵ به‌يگ براگه‌ی خوه‌ی سه‌ربخه‌يگ . چوينكه عه‌يبه‌و شه‌رمه‌زاريه ئيمه‌ی كورد له‌شوون ئه‌و ئه‌زموون و ئه‌و هه‌مگه په‌ند و عيبره‌ت و پيشكه‌فتنه سياسه‌ته له‌جه‌هان ده‌رس وه‌رنه‌گرتويم و هه‌ر له‌يوا دوياكه‌فتگ بويمن ، دويای ئه‌وه‌يش ئايا بايه‌سه چ جواويگ داشتويم ئه‌را كوڕه‌يل و دويه‌ته‌يل ئيسه‌و ئاينده‌مان و ته‌نانه‌ت دويارووژمانيش .
