پلانێگ ئهمنی ئهڕا تهئمین كردن جادهێ خاڵس–كهركوك
![پلانێگ ئهمنی ئهڕا تهئمین كردن جادهێ خاڵس–كهركوك](https://media.shafaq.com/media/archive/files/Archive.jpg)
عودهی خهدران قایمقام خاڵس وه (شهفهق نیوز) وتگه: دهزگايهيل ئهمنی و پۆلیس و فرقهێ پهنج سوپاێ عراقی، بازگهيل و دهوریهيل خوهیان ئهڕا پاراستن جادهگه له خاڵس تا سنوور پاریزگاێ دیاله دانانهو لهو لایشهو پارێزگاێ كهركوك، هێزهیل ئاسایش و پۆلیس خوهی ئهڕا جیوهجی كردن پلانهگه وهكار گردگه.
زیاتر وتگه: ژويهر پرۆسهێ ئهمنی ئهرا زامنكردن ئاسایش جادهگه و چارهسهركردن كردهوهيل تيرۆریستی له باكوور خاڵس دامهزریاگه، ئهڕا پاراستن گیان مهدهنیهیل له ههڕهشه و پهلامارهيل تيرۆریستی.
خهدران وهیهیش ئاماژه كردگه، سهرلهنوو وازكردن جادهێ خاڵس–كهركوك تا ههرێم كوردستان، ڕهنج و مهینهت مهردم له هامشووكردن له ناونی پارێزگايهيل باكوور وهل پارێزگايهيل ناوڕاس و باشوور كهمهو ئهكا.
وهل دهسوهپێكردن پرۆسهێ ئازادكردن ناوچهگان پارێزگاێ سهڵاحدین ك له سهرهتاێ مانگ ئازار گوزهیشته دهسوهپیكرد، جادهێ خاڵس–كهركوك بهسریا و ئهو بڕیاره زهرهدهیل ماڵى فرهێگ وهپارێزگاگان ههرێم كوردستان و ناوڕاس و باشوور عراق ڕهسان و هامشوو زهمینی له ناونی ئهو پارێزگایهیله وسيا.
جادهێ كهركوك – بهغدا لهمانگ حوزهیران گوزهیشتهوه تا ماوهێ چهن مانگێگ كهفته دهس چهكدارهیل داعش و لهشوون شكانن گهمارووێ بان شار ئامرلی له مانگ ئاب گوزهیشته، كار ئهڕا وازكردن جادهێ ئستراتیجی بهغدا وهل باكوور عێراق دهسوهپێكردگه.