ووتار خوهن نماز جومعه ، داواێ لهێهكهوداین ڕهفتارهیل حكومهت ئهكا
![ووتار خوهن نماز جومعه ، داواێ لهێهكهوداین ڕهفتارهیل حكومهت ئهكا](https://media.shafaq.com/media/archive/files/Archive.jpg)
یاسری له ووتار نماز جومعهێ مزگهوت ئهلرهحمان ، گهڕهك مهنسور ك شهفهق نیوز ئامادهێ بوێه وتگه : دهوڵهت عراق پشت بهساسه بهعزی سهركردهیل له گشت جومگهیل وڵات لهوانهیش فهرمانده عهسكهریهگان ك وه زاڵم له قهڵهم دریهن و ئهنجام ئهو كاره ئهوهسه ك رووبهر وهرفراوانێگ له خاك عراق له دهس دایمه و بێجگه ئهوهیش جوانهیل و مناڵهیل و ژنهیلمان سهربڕیهن.
یاسری زیاتر وتگه : بهعزێ له سهركرده سیاسیهگان زهلیلن له وهراوهر ئدارهێ ئهمریكا و ههر وهێ خاتره ئهنبار كهفته دهس داعش ، یهیش خستگهسه ڕوی ئهڕا پشت وهخودا و بازو مهچهك خوهمان نهوهسیم و چاره ئهڕ گرفتهگان نهێونیمهو لهوانهیش سهرلهنوو وهكار خستن كارخانهیل سهنعهت سهربازی ئهڕا دروس كردن تهقهمهنی ، وهتایبهت ك هێزهیل چهكدار و حهشد شهعبی ههمیشه تهقهمهنی كهم دێرن.
یاسری پرسیار كردگه " ئهڕا چه حكومهت مووچهێ ناوچهیل ژێر كونتروڵ داعش دهێگ ؟ له وهختێگ دهزگاگان ڕاگهیاندن مهحهلی و جههانی ئهێوژن ، داعش له بووجهی فهرمانبهرهیل ناوچهیل ژێر دهسڵات خوهی ئستفاده ئهكا و ئیمه مهبهسمان نییه مووچهی فهرمانبهرهیل بوڕیم ، وهلێ گومان دیریم لهوهگ مووچهگان بڕهسێگه دهس خاوهنهگهێ و ئهوهیش جورێگه له پشتگیری كردن داعش.
وهیهیش ئشاره كردگه ، حكومهت تهنیا وهیهیش پهسهنده نهكردگه ، بهڵكم دهس كردێهسه دامهزرانن ئهوانهگ وه گرێبهس له فهرمانگهگان ژێر دهسڵات داعش كار ئهكهن و لهو لایشهوه مووچهی جهنگاوهرهیل عراقی ك خوێن خوهیان ئهكهنه قوربانی عراق و مهردمهگهێ نایهێ ، یهیش له وهختێگه ك بهعزێ لهو جهنگاوهرهیله ئهڕا تهئمین كردن نان ژن ومناڵیان و ڕهسانن خوهیان ئهڕا جهبههیل جهنگ قهرت ئهكهن.
یاسری له پهرلهمان عراقی داوا كردگه ، له وهراوهر ڕهفتارهیل حكومهت بێ دهنگ نهوسێ ، لهوهر ئهوهگ پهرلهمان وهرپرس یهكم و لایهن چاودیره له وهراوهر حكومهت و دهزگا جیوهجیكارهگان.
ئیمام جومعهێ مزگهوت ئهلرهحمان تهئكید كردگه ، باێهد گشت لاێگ له وهراوهر شههید كردن سهرباز مستهفا ئهلعزاری ههڵوێست وهربگرن و هاودهردی وهل خانهوادهێ بكهن له ڕهسانن مووچهگهێ و سهر سوێڕمان خوهێ له بێدهنگی و شهرمهزار نهكردن تاوانهگه له ئاست مهحهلی و ههریمی و ناودهوڵهتی دهربڕیه.
ج ك